جاڭا جىل قارساڭىندا پوليتسيا قىزمەتكەرلەرى كۇشەيتىلگەن قىزمەت رەجيمىنە كوشتى

استانا. KAZINFORM — جاڭا جىل مەرەكەسى قارساڭىندا پوليتسيا قىزمەتكەرلەرى مەن ۇلتتىق ۇلاننىڭ اسكەري قىزمەتشىلەرى كۇشەيتىلگەن قىزمەت رەجيمىنە كوشتى. بۇل تۋرالى Polisia.kz حابارلادى.

ىشكى ىستەر ءمينيسترى قىزمەتكەرلەرگە قوعامدىق ءتارتىپتى قورعاۋ جانە ازاماتتاردىڭ قاۋىپسىزدىگىن قامتاماسىز ەتۋ بويىنشا ناقتى تاپسىرمالار بەردى.

- پوليتسيا قىزمەتكەرلەرى مەن ۇلتتىق ۇلاننىڭ اسكەري قىزمەتشىلەرى وزدەرىنە جۇكتەلگەن مىندەتتەردى ابىرويمەن اتقارىپ كەلەدى. وسى مەرەكە كۇندەرى ءبىزدىڭ ازاماتتار وتباسىمەن جانە جاقىندارىمەن دەمالادى. سوندىقتان سىزدەر قوعامدىق قاۋىپسىزدىكتى جوعارى دەڭگەيدە قامتاماسىز ەتىپ، «زاڭ مەن ءتارتىپ» قاعيداتىن جۇزەگە اسىرۋعا تيىسسىزدەر، - دەپ اتاپ ءوتتى مينيستر ەرجان سادەنوۆ.

مينيستر وڭىرلەردە گارنيزوندىق جيىندار وتكىزۋ تۋرالى تاپسىرما بەردى.

- قوعامدىق ءتارتىپتى قامتاماسىز ەتۋدى، مەرەكەلىك شارالار وتەتىن ورىندارعا ناريادتاردىڭ جاقىن ورنالاسۋىن، ورتالىق الاڭداردى، ادام كوپ جينالاتىن جەرلەردى، وتشاشۋعا ارنالعان ورىنداردى باقىلاۋدا ۇستاۋدى تاپسىرامىن. جەدەل باسقارۋ ورتالىعى تاۋلىك بويى ۆيزۋالدى باقىلاۋدى قامتاماسىز ەتىپ، كەز كەلگەن وقيعاعا جەدەل دەن قويۋى قاجەت، - دەدى ىشكى ىستەر ءمينيسترى.

ايتا كەتەيىك، جاڭا جىل ءتۇنى 32 مىڭنان استام پوليتسيا قىزمەتكەرى مەن ۇلتتىق ۇلاننىڭ اسكەري قىزمەتشىلەرى كەزەكشىلىككە شىعادى. ولاردىڭ 12 مىڭى مەرەكەلىك شارالار وتەتىن ورىندارعا جاقىن جەردە بولادى.