جاڭا جىل قارساڭىندا 84 مىڭ دانا وتشاشۋ تاركىلەنگەن
استانا. KAZINFORM — جاڭا جىل قارساڭىندا ءتارتىپ ساقشىلارى كۇشەيتىلگەن جۇمىس رەجيمىنە كوشتى، - دەپ حابارلايدى «حابار 24» تەلەارناسى.
بۇگىندە سەرتيفيكاتتالماعان پيروتەحنيكالىق بۇيىمداردى انىقتاۋ جۇمىستارى قارقىندى ءجۇرىپ جاتىر. وسى ۋاقىتقا دەيىن 8 مىڭنان اسا رەيدتىك ءىس-شارالار ۇيىمداستىرىلعان. بۇل شارالارعا 4800 گە جۋىق پوليتسەي تارتىلدى.
رەيدتەر بارىسىندا 743 قۇقىقبۇزۋشىلىق انىقتالدى. الىپ-ساتارلاردىڭ باسىم بولىگى سەرتيفيكاتتالماعان وتشاشۋلاردى ساۋدالاعانى بەلگىلى بولدى. سونداي-اق، پيروتەحنيكالىق بۇيىمداردى ساقتاۋدا قاۋىپسىزدىك تالاپتارى ەسكەرىلمەگەن وننان اسا دەرەك تىركەلدى.
پوليتسەيلەر 84 مىڭ دانا وتشاشۋ تاركىلەدى.
ايتا كەتەيىك، ىشكى ىستەر مينيسترلىگى 5-جەلتوقسان مەن 3-قاڭتار ارالىعىندا «پيروتەحنيكا» جەدەل-پروفيلاكتيكالىق ءىس-شاراسىن وتكىزەدى.
تىيىم سالىنعان، شەكتەلگەن تاۋارلار جانە وزگە دە زاتتاردى ساتقانى ءۇشىن 86250 تەڭگە مولشەرىندە ايىپپۇل سالىنادى (ا ق ب ت ك 196-بابى).
جەكە تۇلعالاردىڭ تىنىشتىعىن، بەلگىلەنگەن ءتارتىپتى پيروتەحنيكانى قولدانا وتىرىپ بۇزعانى ءۇشىن 69000 تەڭگە مولشەرىندە ايىپپۇل سالىنىپ، پيروتەحنيكالىق بۇيىمدار تاركىلەنەدى (ا ق ب ت ك 436-بابى).
تۇرعىنداردىڭ دەمالىسى مەن تىنىشتىعىنا كەدەرگى كەلتىرەتىن، جۇمىس كۇندەرى ساعات 22:00 دەن تاڭعى 9:00 عا دەيىن، دەمالىس جانە مەرەكە كۇندەرى ساعات 23:00 دەن تاڭعى 10:00 عا دەيىن تىنىشتىقتى بۇزعانى ءۇشىن جەكە تۇلعالارعا 17250 تەڭگە، شاعىن كاسىپكەرلىك سۋبەكتىلەرىنە نەمەسە كوممەرتسيالىق ەمەس ۇيىمدارعا 69000 تەڭگە، ورتا كاسىپكەرلىك سۋبەكتىلەرىنە 103500 تەڭگە، ءىرى كاسىپكەرلىك سۋبەكتىلەرىنە 345000 تەڭگە مولشەرىندە ايىپپۇل سالىنادى.
