جاڭا جىل: مەرەكەلىك كەشتەردى قانداي عيماراتتاردا وتكىزۋگە تىيىم سالىنادى

توتەنشە جاعدايلار مينيسترلىگىنىڭ رەسمي وكىلى جاننا داۋرەنبەكوۆا ورتالىق كوممۋنيكاتسيالار قىزمەتىندە وتكەن بريفينگىدە جاڭا جىل مەرەكەسى قارساڭىندا قانداي ساقتىق شارالارىن قاپەردە ۇستاۋ كەرەكتىگىن ايتتى، دەپ حابارلايدى Kazinform.

«ەلىمىزدە كۇنىنە ورتا ەسەپپەن 20-30 ءورت تىركەلەدى. جاڭا جىل مەرەكەسى قارساڭىندا ولاردىڭ سانى ەكى ەسە ارتادى. مىسالى، بىلتىر 31- جەلتوقساندا 40 ءورت تىركەلىپ، 4 ادام قازا تاپتى. ال 1- قاڭتاردا - 42 ءورت تىركەلىپ، 3 ادام قازا تاپتى. ايتا كەتۋ كەرەك، ءورتتىڭ كوبى تۇرعىن ءۇي سەكتورىندا بولادى»، - دەيدى رەسمي وكىل.

ونىڭ سوزىنشە، قالىپتى جاعدايدا ەلدەگى ورتتەردىڭ %60 تۇرعىن ۇيلەردە بولادى. ال جاڭا جىل مەركەسى كەزىندە بۇل كورسەتكىش %80 دەيىن ارتادى.

مەرەكەلەر كەزىندە ادامداردىڭ قىراعىلىعى ايتارلىقتاي تومەندەيدى.

«ۇيىم باسشىلارى جاپپاي مەرەكەلەردى وتكىزۋ كەزىندە مىنا ماسەلەلەردى ەسكەرۋ كەرەك:

- كەمىندە ەكى ەۆاكۋاتسيالىق ەسىگى بار، تەرەزەلەرىندە تور ورناتىلماعان، ەكىنشى قاباتتان بيىك ەمەس جەردە ورنالاسقان كەڭىستىكتى پايدالانۋ قاجەت؛

- شىرشا قۇرعان كەزدە بۇتاقتارى قابىرعا مەن توبەگە تيمەيتىندەي ەتىپ، ۇيدەگى قوزعالىسقا كەدەرگى كەلتىرمەيتىندەي، ەسىكتەردى جولىن جاپپايتىنداي ەتىپ ەتىپ ورناتۋ كەرەك؛

- ەلەكتر قۋاتىنا جالعاناتىن ساندىك بۇيىمداردى تەحنيكالىق نورمالاردى ساقتاي وتىرىپ قۇرۋ كەرەك؛

- ءىس-شارالاردى وتكىزگەن كەزدە ساحنا مەن زالداردا ءورت قاۋىپسىزدىگىنە جاۋاپتى ماماندار كەزەكشىلىك ەتۋ قاجەت»، - دەدى جاننا داۋرەنبەكوۆا.

ۆەدومستۆونىڭ رەسمي وكىلى جاڭا جىل مەرەكەسى كەزىندە قانداي ارەكەتتەرگە قاتاي تىيىم سالىناتىنىن ايتتى. ولار:

- ءۇي نەمەسە عيمارات ىشىندە ءورت قاۋپى جوعارى وتشاشۋ ۇيىمداستىرۋ؛

- مەرەكەلىك كەش وتەتىن زالداعى جولداردىڭ ەنىن تارىلتۋ، ادام جۇرەتىن جولدارعا قوسىمشا ورىندىقتار قويۋ؛

- ءىس-شارا كەزىندە بولمەدەگى جارىقتى تولىعىمەن ءوشىرۋ؛

- ءۇي-جايدى بەلگىلەنگەن نورمادان ارتىق ادامدارمەن تولتىرۋ.

«ەلىمىزدە جىل سايىن جۇزدەن استام ادام پيروتەحنيكالىق ونىمدەردەن زارداپ شەگەدى، ونىڭ 30 پايىزى - بالالار. پەتاردا، وتشاشۋلاردى ساتىپ العاندا ەڭ الدىمەن، ءونىمنىڭ سەرتيفيكاتى تۋرالى قۇجات سۇراڭىز جانە پيروتەحنيكالىق زاتتاردى پايدالانۋ ەرەجەلەرىمەن مىندەتتى تۇردە تانىسىڭىز.

اسىرەسە ساقتاۋ مەرزىمىنە نازار اۋدارۋدى ۇمىتپاڭىز. ەگەر تاۋاردىڭ جارامدىلىق مەرزىمى ءوتىپ كەتسە، ولاردى مۇلدە پايدالانۋعا بولمايدى. قاپتاما بۇزىلماعان جانە جىرتىلماعان بولۋ كەرەك. پيروتەحنيكالىق زاتتاردى ۇشىرۋ كەزىندە تەمەكى شەگۋگە قاتاڭ تىيىم سالىنادى. كولىكتەردىڭ جانىندا پيروتەحنيكانى اتۋعا بولمايدى. 50 مەتر راديۋستا ءورت قاۋىپتى وبەكتىلەر بولماۋى كەرەك.

كورەرمەندەر فەيەرۆەركتەردى ۇشىرۋ الاڭىنان 15-20 مەتر قاشىقتىقتا بولۋى كەرەك. ءونىمدى قولدا ۇستاپ اتۋعا تىيىم سالىنادى»، - دەيدى رەسمي وكىل.

سونداي-اق، ول «بەنگال شامىن» جانعىش ماتەريالداردان الىس پايدالانۋ كەرەكتىگىن ەسكەرتتى.