جاڭا جىل ءتۇنى ەكى ادامدى ولتىرگەن سوتتالۋشىعا ۇكىم شىقتى

اقتوبە. KAZINFORM - اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا 2 ادامدى ءولتىرىپ، كەيىن ۇيگە وت قويعان سوتتالۋشىعا ۇكىم شىقتى. سوت القابيلەردىڭ قاتىسۋىمەن بولدى.

قىلمىستىق وقيعا 2022 -جىلدىڭ 31-جەلتوقسانى كۇنى اقتوبە وبلىسى تەمىر اۋدانى كەڭقياق اۋىلىندا بولدى. اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا قارالعان ءىس ماتەريالىنا سۇيەنسەك، سوتتالۋشى ە سول ءتۇنى ەكى جابىرلەنۋشىنى پىشاقتاعان. كەيىن ءۇي ىشىندە وت قويىپ، سالدارىنان ەكى جابىرلەنۋشى كومىرقىشقىل گازىنا ۋلانىپ كوز جۇمعان. ءدال وسى جاعدايدىڭ ءبارىن كوزبەن كورگەن ەكى كۋاگەر، سوتتالۋشى پوليتسياعا حابار بەرمەگەن.

اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا قارالعان ىستە م جانە ك-گە قىلمىستىق كودەكستىڭ «قىلمىس تۋرالى حابارلاماۋ» بابى بويىنشا ايىپ تاعىلدى. سوت وتىرىسى كەزىندە سوتتالۋشى ە ءوز كىناسىن مويىندامادى. ءتىپتى ادام ولتىرمەگەنىن، قاراقشىلىق وقيعاعا قاتىسى جوق ەكەنىن ايتىپ، باسقا سوتتالۋشىلاردىڭ وزىنە جالا جاۋىپ وتىرعانىن جەتكىزدى. ال وقيعانىڭ قالاي بولعانىن كوردىك دەگەن ەكى سوتتالۋشى ءوز كىناسىن مويىندادى.

- مەملەكەتتىك ايىپتاۋشى سوتتالۋشى ە-گە ءومىر بويىنا باس بوستاندىعىنان ايىرۋ جازاسىن، م-عا 6 جىل باس بوستاندىعىنان ايىرۋ جازاسىن، ال ك-عا 4 جىلعا باس بوستاندىعىن شەكتەۋ جازاسىن تاعايىنداۋدى سۇرادى. سوت ە-نى قىلمىستىق كودەكستىڭ 99-بابى 2-بولىگىنىڭ 1، 8-تارماقتارىمەن، 192-بابى 4-بولىگىنىڭ 2-تارماعىمەن كىنالى دەپ تانىپ، وعان تۇپكىلىكتى 22 جىل مەرزىمگە باس بوستاندىعىنان ايىرۋ جازاسىن تاعايىندادى. ك-گە 3 جىل 3 اي مەرزىمگە باس بوستاندىعىنان ايىرۋ جازاسىن، م-عا 5 جىل 6 اي مەرزىمگە باس بوستاندىعىنان ايىرۋ جازاسىن تاعايىندادى. سوتتالعاندار جازاسىن قىلمىستىق اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەيدى، - دەپ حابارلادى اقتوبە وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ باسپا ءسوز قىزمەتى.

سوت ۇكىمى زاڭدى كۇشىنە ەنگەن جوق.

اۆتور
التىناي ساعىندىقوۆا