جاڭا اسفالت ۇگىتىلىپ جاتىر - ۇكىمەت باسشىسى جول ساپاسى تۋرالى
استانا. KAZINFORM - ق ر پرەمەر-ءمينيسترى ولجاس بەكتەنوۆ جول ساپاسى جونىندە تۇرعىندار شاعىمىنا دەر كەزىندە نازار اۋدارۋدى تاپسىردى.
«جول جاعدايىنا قاتىستى ايتىلىپ جاتقان ارىز-شاعىمدار ازايماي وتىر. ولاردىڭ نەگىزگى بولىگى جەرگىلىكتى جولدارعا قاتىستى. مۇنداي مىسالدار كوپ»، - دەدى و. بەكتەنوۆ ۇكىمەت وتىرىسىندا.
ماسەلەن، اقتوبە وبلىسى مۇعالجار اۋدانىنىڭ تۇرعىندارى جۇرىن مەن قاراكول اۋىلدارىنىڭ اراسىندا بيىل توسەلگەن اسفالتتىڭ ساپاسىن كورسەتتى - جاڭادان توسەلگەن اسفالت قولمەن ۇستاعاندا ۇگىتىلىپ جاتىر.
ال جەتىسۋ وبلىسى كەربۇلاق اۋدانى قويانكوز اۋىلىنىڭ تۇرعىندارى اسفالت توسەۋ تەحنولوگياسىن ساقتاماعان مەردىگەر كومپانيانى جۇمىسىن توقتاتۋعا ءماجبۇر ەتتى.
«ال اكىمدىكتەر قايدا، كۇندەلىكتى ساپالى باقىلاماي قايدا قاراپ وتىر؟ ءبىرىنشى كەزەكتە تۇرعىنداردىڭ شاعىمىنا دەر كەزىندە نازار اۋدارۋ كەرەك»، - دەدى و. بەكتەنوۆ.
بۇعان دەيىن پرەمەر-مينيستر ساپاسىز جولداردى قابىلداماۋ كەرەگىن، ءتيىستى اكتىلەردىڭ مىندەتتى تۇردە بولۋىن تاپسىرعان ەدى.
اۆتور
ايجان سەرىكجان قىزى
