جاڭا ۋاقىت بەلدەۋى: قازاقستاندىقتار ءبىر جىلدا نەشە رەت ساعات ءتىلىن وزگەرتەدى
ساۋدا جانە ينتەگراتسيا مينيسترلىگى ۇيىمداستىرعان باسپا ءسوز كونفەرەنسيادا قولدانبالى حرونوبيولوگيا ساراپشىسى بولات نۇرحوجايەۆ ۋاقىت بەلدەۋىن وزگەرتۋ قالاي ىسكە اساتىنىن ءتۇسىندىردى، دەپ حابارلايدى Kazinform.
«اشىق ن ق ا» پورتالىنداعى قۇجاتقا سۇيەنسەك، 2024-جىلى ناۋرىزدا ۋاقىتتى وزگەرتەدى ەكەنبىز. سودان كەيىن ول قالا ما؟ الدە جىلىنا 2 رەت اۋىستىرىپ تۇرامىز با؟»، - دەپ سۇرادى جۋرناليست.
ساراپشىنىڭ ايتۋىنشا، بۇل - ءبىر-اق رەتتىك شارا.
«ءبىز 12 وبلىس پەن 3 قالانىڭ ۋاقىتىن تابيعي ۋاقىتقا ءبىر رەت كوشىرەمىز بولدى. ءبىز 1930-جىلى العا جىلجىپ كەتكەن ءبىر ساعات ۋاقىتپەن ءومىر ءسۇرىپ جاتىرمىز. كوپ ادام ونى بىلمەيدى»، - دەدى بولات نۇرحوجايەۆ.
ونىڭ سوزىنشە جاڭا ۋاقىت بەلدەۋى ەل استاناسىنىڭ تابيعي ۋاقىت كورسەتكىشىنە ساي.
«جالپى بەسىنشى ساعات بەلدەۋى دەگەن - استانا مەن شىعىس قازاقستاننىڭ تابيعي ۋاقىت بەلدەۋ. ءبىز سوعان قايتارايىق دەپ جاتىرمىز. الەۋمەتتىك جەلىدە كوپتەگەن سۇراق بولدى. تابيعي ۋاقىتقا كوشكەن زياندى ەكەنى تۋرالى پىكىرلەر تاراپ جاتىر. ءبىراق بۇل - عىلىمنىڭ ماسەلەسى. «+5» دەپ اتالاتىن ۋاقىت بەلدەۋى ەلدەگى 12 وبلىس پەن 3 وبلىسقا تەڭەستىرىلگەن قالانىڭ ۋاقىت بەلدەۋ بولادى. ونى ەسەپتەۋ وپ-وڭاي. كەزىندە 6- سىنىپتا وقىدىق ونى. ياعني، كەز كەلگەن قالانىڭ بويلىقتاعى كوورديناتىن الىپ، 15 گرادۋسقا بولسەك، سول وڭىردەگى ساعات بەلدەۋى شىعادى. ونى ۇيالى تەلەفونداعى كوورديناتتارمەن قاراپ، 15 گرادۋسقا ءبولۋ ارقىلى كەز كەلگەن ادام ەسەپتەي الادى»، - دەدى مامان.
