ج ي نەيروحيرۋرگيادا: تەرىنى كەسپەي، ىسىكتى ءدال انىقتاۋعا بولادى

استانا. KAZINFORM - جاساندى ينتەللەكت (ج ي) مەديتسينادا، اسىرەسە نەيروحيرۋرگيا سالاسىندا جاڭا مۇمكىندىكتەرگە جول اشىپ وتىر. ج ي كومەگىمەن 700 دەن اسا وتا جاساعان نەيروحيرۋرگ ابىلاي سەرىكباي Jibek Joly تەلەارناسىنىڭ «بۇگىن LIVE» باعدارلاماسىندا وسى تەحنولوگيانىڭ ارتىقشىلىقتارىن ايتىپ بەردى.

ابىلاي سەرىكبايدىڭ ايتۋىنشا، ج ي دارىگەرلەرگە كۇردەلى شەشىمدەردى ءدال قابىلداۋعا كومەكتەسەدى.

- نەيروحيرۋرگيا سالاسىنداعى ج ي دەگەن نە؟ بۇل ۇلكەن كولەمدەگى مالىمەتتەردى تالداپ، ولاردىڭ زاڭدىلىقتارىن انىقتاپ، دارىگەرلەرگە ناقتىراق شەشىم قابىلداۋعا كومەكتەسەتىن تەحنولوگيا. ءبىزدىڭ تاجىريبەمىزدى الاتىن بولساق، نەيروناۆيگاتسيا - ءجاي عانا قۇرال. ال ءبىز سول ناۆيگاتسياعا ج ي كومەگىمەن دايىندالعان مرت سۋرەتتەرىن ەنگىزىپ، وپەراتسيا كەزىندە ناقتى شەشىم قابىلداۋعا مۇمكىندىك الامىز. ءبىز وپەراتسياعا دەيىن م ر ت سۋرەتتەرىن وڭدەيمىز. مىسالى، ىسىك پەن جۇيكە جولدارىنىڭ وتە ماڭىزدى قارىم-قاتىناسىن، ىسىكتىڭ ناقتى شەكاراسىن، ماڭىزدى فۋنكتسيونالدىق ايماقتاردى انىقتاپ، كورسەتە الامىز، - دەيدى نەيروحيرۋرگ.

ونىڭ سوزىنشە، بۇل تەحنولوگيا وپەراتسيا بارىسىندا دا كەڭىنەن قولدانىلادى.

- ءبىز مۇنى تەك وپەراتسياعا دەيىن قولدانبايمىز. ونى وپەراتسيا كەزىندە دە نەيروناۆيگاتسيالىق جۇيەگە ەنگىزىپ، وتا بارىسىندا قولدانا الامىز. ناقتىراق ايتساق، ناۋقاستىڭ تەرىسىن دە كەسپەي جاتىپ، ىسىكتىڭ شەكاراسىن انىقتايمىز. سوسىن كىشكەنتاي عانا جەردى كەسىپ، ناقتى بىزگە كەرەك جەرگە ءتۇسىپ، وتا جاساۋعا مۇمكىندىك بار. بۇل بىزگە ۋاقىت ۇنەمدەۋگە كومەكتەسەدى. بىزگە دەيىنگى راديولوگتار قولمەن ەسەپتەپ، ىسىكتىڭ شەكاراسىن انىقتاپ وتىراتىن. ءبىراق قازىر ءبىز ونى ارنايى باعدارلاماعا ەنگىزىپ، بىرنەشە مينۋتتىڭ ىشىندە بىلە الامىز. ارينە، ونىڭ ارتىنان تەكسەرىپ شىعادى. ويتكەنى ول وينايتىن نارسە ەمەس، ادام دەنساۋلىعى. ءار ميلليمەتر ءبىز ءۇشىن ماڭىزدى. ءبىر ميلليمەتر ارتىق كەسىپ الساق، ناۋقاستىڭ ماڭىزدى فۋنكتسياسى زاقىمدانۋى مۇمكىن، - دەيدى ستۋديا قوناعى.

دارىگەر سونداي-اق ءوز تاجىريبەسىندەگى ەڭ ۇزاق وپەراتسيالاردىڭ ءبىرى تۋرالى دا ايتىپ بەردى.

- مەنىڭ ەڭ ۇزاق جاساعان وتام 22 ساعاتقا سوزىلدى. بۇل كۇندەلىكتى جاسالاتىن وپەراتسيا ەمەس. ءبىراق كەي جاعدايلاردا جاساۋعا تۋرا كەلەدى. 19 ساعات تەك ءوزىم جاساعان وتام دا بار. ءبىراق بۇل وپەراتسيادا ارىپتەسىممەن اۋىسىپ وتىردىق: ول باستادى، سوسىن مەن ونى اۋىستىردىم، اراسىندا 3-4 ساعات ۇيىقتاپ الدىق. ءبىراق قۇدايعا شۇكىر، ءبارى جاقسى ءوتتى. ناۋقاس ءوز اياعىمەن، كوڭىلدى بولىپ ۇيىنە ورالدى. وتا وتە كۇردەلى بولدى، - دەيدى ابىلاي سەرىكباي.

ماماننىڭ سوزىنشە، قازىرگى تەحنولوگيالاردىڭ دامۋى نەيروحيرۋرگياداعى وپەراتسيالاردىڭ دالدىگىن ارتتىرىپ، ناۋقاستاردىڭ ساۋىعۋ مۇمكىندىگىن ەداۋىر جاقسارتۋعا سەپ بولىپ وتىر.

بۇعان دەيىن قازاقستاندا وسى سالاداعى كۇردەلى وتالاردىڭ %80 ەل ىشىندە جاسالاتىنى ايتىلدى.