ج س ن-نىڭ ءوزى كەي جاعدايدا دەربەس دەرەككە جاتپايدى - ەكاتەرينا سمىشليايەۆا
بۇگىندە اشىق قۇجاتتاردا دەربەس دەرەكتەردىڭ بەرىلۋى وتە كوپ كەزدەسەدى. دەربەس دەرەكتەردىڭ وسىنشا جيىنتىعىن جاريالاۋعا بولمايدى.

بۇل تۋرالى ءماجىلىس دەپۋتاتى ەكاتەرينا سمىشليايەۆا ايتتى، دەپ حابارلايدى قازاقپارات ءتىلشىسى.
«زاڭدا دەربەس دەرەك دەگەن ۇعىمنىڭ وزىنە انىقتاما ەنگىزىپ جاتىرمىز. ويتكەنى قازىر ونىڭ ناقتى تۇسىنىكتەمەسى جوق. ۇعىمنىڭ بۇلايشا ءتۇسىندىرىلۋى نورمانىڭ ەكىۇشتى ەكەنىن كورسەتەدى. بىرەۋلەر ج س ن-دى دەربەس دەرەك دەسە، تاعى بىرەۋلەر دەربەس دەرەك ەمەس دەيدى. قازىر زاڭ جوباسىنىڭ اياسىندا ساراپشىلارمەن بىرگە كەلەشەكتە وسىنداي ناقتى ەمەس نورمالاردى بولدىرماۋ باعىتىندا جۇمىس ىستەپ جاتىرمىز.
جاۋاپكەرشىلىككە كەلسەك، دەربەس دەرەكتەر تۋرالى زاڭنامانى بۇزعان كەز كەلگەن تۇلعا جاۋاپكەرشىلىك ارقالاۋ كەرەك. كەز كەلگەن ءتىزىم جاريا تۇردە جاريالانۋى كەرەك دەگەن تالاپ بار. ءبىراق ونىڭ ىشىندە دەربەس دەرەك بولۋى كەرەك دەگەن تالاپ ەش جەردە جوق»، - دەدى دەپۋتات.
ءماجىلىس وكىلى اتالمىش تىزىمگە ەنگەن تۇلعالار قارجى مينيسترلىگىن دەربەس دەرەكتەرىن جاريالادى دەگەن ۋاجبەن سوتقا بەرە الاتىنىن اتادى.
ونىڭ سوزىنشە، قازىرگى زاڭنامادا ج س ن مەن ادامنىڭ اتى-ءجونى ءبىر جاعدايدا دەربەس دەرەك بولىپ ەسەپتەلسە، تاعى ءبىر جاعدايدا دەربەس دەرەك بولىپ ەسەپتەلمەيدى.
«ج س ن ادامنىڭ اتى-ءجونىنسىز بەرىلسە، تۇلعانى انىقتاپ بەرە المايدى. ياعني، حالىقارالىق نورمادا مىنانداي - دەربەس دەرەك دەگەن تۇلعانىڭ كىم ەكەنىن انىقتاپ تۇرۋى كەرەك.
ج س ن ساندارى اتى- جونىمەن بىرگە بەرىلمەسە، يەسى كىم ەكەنىن تابۋعا كومەكتەسە مە؟ كومەكتەسە المايدى. مەملەكەتتىك ورگان سايتتارىنىڭ بىرىندە بۇرىن ج س ن ارقىلى ادامنىڭ كىم ەكەنىن بىلۋگە بولاتىن، كەيىن ول قىزمەتتى جاپتى. ياعني، ج س ن ادامنىڭ اتىمەن بىرگە جاريالانسا، ول دەربەس دەرەك بولىپ ەسەپتەلەدى. ءتىپتى ادامنىڭ اتى-ءجونى مەن اكەسىنىڭ اتى دا دەربەس دەرەك بولىپ سانالادى. قازىرگى زاڭدا وسىنداي قوسار ستاندارتتار وتە كوپ.
ءقازىر وسىنداي دەرەكتەردى جاريالاۋ گيگيەناسى دا پىسىقتاۋدى قاجەت ەتەدى. بۇگىندە اشىق قۇجاتتاردا دەربەس دەرەكتەردىڭ بەرىلۋى وتە كوپ كەزدەسەدى. مىسالى، سوت شەشىمدەرىندە دەربەس دەرەكتەر بار. ولار اشىق جاريالانىپ ءجۇر. بۇل - تالاپ جانە دۇرىس. ءبىراق ونىڭ ىشىندەگى كەيبىر دەربەس دەرەكتەردى جاسىرۋ جاعىن ويلاستىرۋ كەرەك. دەربەس دەرەكتەردىڭ وسىنشا جيىنتىعىن جاريالاۋعا بولمايدى»، - دەدى ەكاتەرينا سمىشليايەۆا.