حيرۋرگ - ءاربىر ناۋقاستى ءوز باۋىرىنداي كورۋى ءتيىس - بۇركىت ارىنبەكوۆ
تۇركىستان. KAZINFORM - بۇركىت ارىنبەكوۆتى جەرلەستەرى قولى جەڭىل حيرۋرگ دەپ تانيدى. سەبەبى، اق حالاتتى ابزال جان 60 جىلدىق ەڭبەك جولىندا 10000 استام وتا جاساپ، كوپتەگەن ناۋقاستاردى ولىمنەن اراشالاپ الىپ قالعان. Kazinform ءتىلشىسى تەرىسكەيلىك تۇلعامەن تىلدەسەپ كەلدى.
قولى جەڭىل حيرۋرگتىڭ بىلىكتىلىگىن كوپشىلىك وتە جوعارى باعالايدى. سوندىقتان كورشىلەس اۋدانداردان كەلىپ كومەك بەرۋىن وتىنەتىندەر كوپ. ءتىپتى، كورشىلەس وبلىستاردان ارنايى ىزدەپ كەلىپ، كەڭەس الىپ كەتەتىندەر دە بار. ونداي جاعدايدا، بىلىكتى مامان ءاردايىم العاشقى كومەك بەرۋگە ءازىر. ال، اۋدان اۋماعىنداعى اۋىلداردان كەلگەن جاعدايى اۋىر ناۋقاستاردىڭ كوپشىلىگىنە وتانى ءوزى جاسايدى.
- بىردە اۋدان ورتالىعىنان 130 شاقىرىم جەردەگى قاراتاۋ اۋىلىنان شۇعىل حابار ءتۇستى. اڭعا شىققان اۋىل تۇرعىنى، ءسۇرىنىپ كەتىپ قۇلاعاندا، مىلتىعى ابايسىزدا اتىلىپ كەتىپتى. 12 كالبيرلى مىلتىقتىڭ وعى كەۋدەنى تەسىپ، وكپەنى زاقىمداپ، ارتقى جاۋىرىننان سىرتقى شىققان. جاعدايى اۋىر. سودان، اۋدانداعى دارىگەرلەر جينالىپ، اپپاراتتارىمىزدى الىپ اۋىلعا قاراي اتتاندىق. بارساق ناۋقاس ەسىن بىلمەيدى. بىردەن وتا جاساۋعا كىرىستىك. ول كەزدە قازىرگىدەي جاعداي جوق. اۋىلدىق اۋرۋحانا اياداي عانا ەكى بولمەدەن تۇرادى. جاتقىزاتىن دۇرىس ۇستەل دە كورمەدىك. ناۋقاستى ايەلدەر بوساناتىن ۇستەلگە جاتقىزىپ قويىپ، وتا جاسادىق. ءساتتى ءوتتى، - دەيدى دارىگەر.
بۇركىت ارىنبەكوۆتىڭ ەڭبەك جولىندا مۇنداي كۇردەلى وپەراتسيالار كوپ كەزدەسكەن. 10 جاستاعى قىزدان ەحينوكوككوز اۋرۋىن انىقتاپ، بىردەن وتا جاساعان. سونداي-اق، باسىنا مۇرجا قۇلاپ، ميى اشىلىپ كەتكەن جىگىتتى دە ەمدەپ، قاتارعا قوسقان.
- شولاققورعان اۋىلىنان شالعايدا ورنالاسقان تاستى دەگەن اۋىل بار. سوندا داۋىل بولىپ، ءۇيدىڭ شاتىرىن جەل ۇشىرىپ كەتكەن ەكەن. ال، ءۇيدىڭ مۇرجاسى ۇيىقتاپ جاتقان جىگىتتىڭ باسىنا تۇسكەن. ءۇستى باسىنىڭ ءبارى قان، ءوزى شالاجانسار. شىمكەنتكە الىپ بارايىق دەسەك، جولعا جارامايدى. ال، شىمكەنتتەن دارىگەرلەر شاقىرتايىق دەسەك، ۋاقىت تاپشى. سودان بىردەن وتاعا دايىندادىق. باسىنىڭ ءىشىن تازالادىق. كوپ قان كەتكەن ەكەن، قان قۇيدىق. ءبىر اپتا ەس-ءتۇسسىز جاتتى. كەيىن ەسىن جيدى. قازىر ۇيلەنىپ، ءۇيلى بولدى، - دەيدى دارىگەر.
اۋىل دارىگەرى بۇركىت ارىنبەكوۆ بيىل الەۋمەتتىك جەلىنىڭ «جۇلدىزى» بولدى. ستيلدى كيىنگەن ەل اعاسىنىڭ ايالدامادا كولىك كۇتىپ تۇرعان بەينەسى تيك-توكتا كەڭىنەن تارادى. ال، سول جاريالانىمعا پىكىر جازۋشىلار التىن قولى مەن مەيىرىمدى جۇرەگى تۋرالى كوپ جازبا قالدىردى. ءوز ماماندىعىنا شىن بەرىلگەن ناعىز ەڭبەك ادامى ەكەندىگىن ايتىپ، لەبىزدەرى مەن العىستارىن جەتكىزدى.
- قۇمكەنتتەگى اعايىندارعا بارۋىم كەرەك بولىپ، تۋىس ءىنىمدى شاقىرتتىم. كولىگىمەن كەلەتىن بولدى. «اپاڭدى دا الا كەل» - دەدىم. جۇمىستان سۇرانىپ شىعىپ، ايالدامادا 10 مينۋتتاي توسىپ تۇرىپ قالدىم. وسى ءساتتى قارسى بەتتەگى اسحانادا وتىرعان شاكىرتتەرىم ۆيدەوعا ءتۇسىرىپ الىپ، الەۋمەتتىك جەلىگە سالىپ جىبەرىپتى. ەكى-ءۇش كۇننەن سوڭ، نەمەرەم «اتا ءسىز تيك-توكتا ءجۇرسىز عوي - دەيدى. اشىپ قارادىق. كوپ ادامدار جاقسى پىكىر جازىپتى. بارلىعىنا ۇلكەن راحمەت. ءبىر كۇنى قارالىمى 500000 بولدى، ءبىر تاۋلىكتەن سوڭ 1 ميلليوننان اسىپ كەتتى. «اللاعا شۇكىر» دەدىم، - دەيدى دارىگەر.
بۇركىت ارىنبەكوۆ «ەرەن ەڭبەگى ءۇشىن» مەدالىنىڭ يەگەرى. ودان بولەك، وبلىس اكىمدىگى مەن وبلىستىق ءماسليحاتتىڭ جانە اۋدان اكىمدىگى مەن اۋداندىق ءماسليحات ءتوراعاسىنىڭ العىس حاتتارىمەن ماراپاتتالعان. سونداي-اق، دەنساۋلىق ساقتاۋ سالاسىنىڭ ۇزدىگى، سوزاق اۋدانىنىڭ قۇرمەتتى ازاماتى. بۇگىندە بوس ۋاقىتىن كىتاپ وقۋعا ارنايدى. ءوزى دە كىتاپ جازادى. ءومىر جولى مەن ەڭبەك جولىن بايلانىستىرىپ جازعان «قوش بول، قانداۋىر!» اتتى كىتابىن بۇگىندە جاس دارىگەرلەر قولدانىپ ءجۇر. العاشقىسى 2500 تارالىممەن جارىق كورگەن كىتاپ، كەيىننەن تاعىدا 3 رەت 1000 دانامەن باسىلىپ شىقتى. ياعني، تاجىريبەلى حيرۋرگتىڭ تىرناقالدى تۋىندىسىنا دەگەن سۇرانىس تا جوعارى.
- سوزاق اۋدانىنا قاراستى قۇمكەنت اۋىلىندا 1947 -جىلى دۇنيەگە كەلدىم. سوندا مەكتەپكە باردىم. لەڭگەردەگى مەديتسينالىق كوللەدجدە فەلدشەر ماماندىعىن مەڭگەردىم. الماتى مەملەكەتتىك مەديتسينا ينستيتۋتىنىڭ «ەمدەۋ ءىسى» فاكۋلتەتىندە وقىدىم. 1977 -جىلى سوزاق اۋداندىق ورتالىق ارۋحاناسىنا حيرۋرگ بولىپ جۇمىسقا قابىلداندىم. سودان بەرى 58 -جىل بويى ءۇزىلىسسىز ەڭبەك ەتىپ كەلەمىن. ءقازىر تۇسكە دەيىن جۇمىس ىستەيمىن. جاستارعا جاردەم بەرەمىن. وتا جاسايمىن. وسى ۋاقىت ىشىندە ومىردەن تۇيگەنىم كوپ. ەڭ الدىمەن اللانىڭ بەرگەن نىعمەتىنە شۇكىرشىلىك ەتەمىن. جار مەن ماماندىق تاڭداۋدا قاتەلەسپەدىم. ۋاقىتپەن ساناسپاي ەڭبەك ەتتىم. سول ەڭبەك جولىمدا كەزدەسكەن ءاربىر ءىستى اق قاعازعا ءتۇسىرىپ، كىتاپ ەتىپ شىعاردىم، - دەيدى دارىگەر.
ارىنبەكوۆتەر وتباسىن ارىپتەستەرى مەن تۋىستارى دارىگەرلەر ديناستياسى دەپ بىلەدى. سەبەبى، بۇركىت ارىنبەكوۆتىڭ جۇبايى گۇلباحيرا كوپتەگەن جىلدار بويى نەۆروپوتولوگ بولىپ ەڭبەك ەتكەن. ال، قىزى گۇلايشا اكۋشەر-گينەكولوگ. نەمەرەسى ءمادي دارىگەر حيرۋرگ بولىپ، اتاسىنىڭ جولىن قۋعان. قازىر رەسپۋبليكالىق پەدياتريا جانە بالالار حيرۋرگياسى عىلىمي ورتالىعىندا رەزيدەنتۋرادا وقىپ جاتىر. ال، ۇلى اليحان تەحنيك، كەنىشتە جۇمىس ىستەيدى.
بۇركىت اقساقال ءوزىنىڭ شاكىرتتەرمەن دە ماقتانادى. ەلىمىزدىڭ ءار ايماعىندا ابىرويلى ەڭبەك ەتىپ جۇرگەن بيجىگىت قاسىمقۇلوۆ، ەرشات اسىلبەكوۆ، اسىلبەك داۋلەتبايەۆ، ىلەسبەك ناحيپوۆ، مۇرات بەكتايەۆ، ەركەبۇلان بەكسەيتوۆ، ءومىرتاس شادىبەك، نۇرلىبەك وسپانوۆ، باعلان ىسقاقوۆ جانە وزگە دە شاكىرتتەرىنىڭ بولاشاعىنان ۇلكەن ءۇمىت كۇتەدى.
- جالپى، حيرۋرگ بولۋ ءۇشىن ادامعا ەڭ الدىمەن ءبىلىم كەرەك. سودان سوڭ، ءتوزىم، مەيىرىم قاجەت. جاناشىر، قاراپايىم بولۋ باستى مىندەتتىڭ ءبىرى. حيرۋرگ - ءاربىر ناۋقاستى ءوز باۋىرىنداي كورىپ، ەمدەۋى ءتيىس. ادامنىڭ قانىن كورۋ، دەنەسىن كەسۋ، ونىمەن جۇمىس جاساۋ كەز كەلگەن ادامنىڭ قولىنان كەلە بەرمەيدى» - دەيدى دارىگەر.
بۇگىندە، سوزاق اۋداندىق مۇراجايىندا ەل اعاسىنا ارنالعان ارنايى بۇرىش اشىلعان. وندا حيرۋرگتىڭ قولدانعان زاتتارى مەن العان ماراپاتتارى، مەدالدارى قويىلعان. كەز كەلگەن مۋزەيگە كەلۋشى ازاماتتىڭ بۇركىت ارىنبەكوۆ جايىنداعى مالىمەتتەرمەن كەڭ كولەمدە تانىسۋىنا مۇمكىندىك جاسالعان.
اۆتور
قايرات زاينيشەۆ
