حوستەل عيماراتى كىمگە تيەسىلى ەكەنى بەلگىلى بولدى

الماتى اكىمدىگى تاراتقان مالىمەتكە سايكەس، ءادي ءشارىپوۆ كوشەسىندە «Almaty Hostel» حالىق بانكىنە تيەسىلى عيماراتتا ورنالاسقان، دەپ حابارلايدى Kazinform.

«حوستەل ءبىر جارىم اي بۇرىن اشىلعان، عيمارات حالىق بانككە تيەسىلى. بانك ونى كەپىلمۇلىك رەتىندە جالعا بەرگەن. قىزىل جالىن 30 شارشى مەتردى شارپىعان. بۇل حوستەل الماتى قالاسىنىڭ جوعارى وقۋ ورىندارىمەن ستۋدەنتتەردى ورنالاستىرۋ ءۇشىن ىنتىماقتاستىق تۋرالى مەموراندۋمعا قول قويعان جوق»، - دەپ حابارلادى اكىمدىكتەن.

وقيعا ورنىندا الماتى اكىمى ەربولات دوسايەۆ، توتەنشە جاعدايلار ءمينيسترى سىرىم ءشارىپحانوۆ ءجۇر.

ەسكە سالايىق، بۇگىن تاڭەرتەڭ الماتىدا بولعان ءورت سالدارىنان 13 ادام كوز جۇمدى، ەكەۋى اۋرۋحاناعا جەتكىزىلدى. 59 ادام شۇعىل ەۆاكۋاتسيالاندى. 56 سى جاقىن ماڭداعى مەكتەپكە ۋاقىتشا ورنالاستىرىلدى. مۇنداعى تۇرعىنداردىڭ دەنى - شەت مەملەكەتتەردىڭ ازاماتتارى. ولار - ستۋدەنتتەر مەن جالدامالى جۇمىسشىلار.

پرەمەر-مينيستر ءاليحان سمايىلوۆتىڭ وكىمىمەن الماتى قالاسىنداعى حوستەلدە بولعان ءورتتىڭ سەبەبىن تەكسەرۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى.

اۆتور

الما مۇقانوۆا