قازاقستاندىق ستۋدەنت Huawei تەلەفونىنىڭ جاڭا ۇلگىسىن قۇراستىرۋعا قاتىسىپ جاتىر

نۇر-سۇلتان. قازاقپارات - قازاقستاندىق بەكجان بەكبولات ۇلى تەلەكوممۋنيكاتسيا سالاسىنداعى الەمدىك ءىرى كومپانيالاردىڭ ءبىرى Huawei Тechnologies - ءتىڭ لوندوندىق وفيسىندە تاعىلىمدامادان ءوتۋ مۇمكىندىگىنە يە بولدى.

قازىر ول تەلەفوننىڭ جاڭا مودەلىن جاساپ جاتقان كوماندامەن جۇمىس ىستەپ جاتىر. بەكجان اقتاۋدىڭ ءبىلىم جانە يننوۆاتسيا ليتسەيىنىڭ تۇلەگى. ول بىرنەشە رەت ينفورماتيكادان وتكەن رەسپۋبليكالىق جانە حالىقارالىق وليمپيادالاردىڭ جەڭىمپازى اتانعان. بۇگىندە ول وڭتۇستىك كورەيالىق ۋنيۆەرسيتەتتىڭ ءۇشىنشى كۋرسىندا گرانتتا وقيدى. ءبىراق IT- تەحنولوگيالار سالاسىنداعى ءىرى كومپانيادا تاعىلىمدامادان وتۋگە شاقىرۋ العاننان كەيىن اكادەميالىق دەمالىس الىپتى.

بەكجان بەكبولات ۇلى، «Huawei Technologies Ltd» كومپانياسىنىڭ تاعىلىمگەرى:

- قازىر مەن جاساندى ينتەللەكتتىڭ جاڭا ادىستەمەلەرىن جاساپ جاتىرمىن. وسى جىلى شىعارىلاتىن تەلەفونداردىڭ جاڭا مودەلدەرىندەگى فوتوسۋرەتتەردىڭ ساپاسىن ارتتىرۋ ءۇشىن ونىڭ قالاي كومەكتەسەتىندىگىن زەرتتەۋ ۇستىندەمىن.

بەكجان جۇمىسقا ءبىر اي بۇرىن عانا كىرىسكەن. سوندىقتان الدىمەن ءبىلىمىن جەتىلدىرىپ جاتىر. عىلىمي ادەبيەتتەردى وقىپ، نەگىزگى كوماندانىڭ جۇمىسىنا قوسىلۋعا تىرىسۋدا. جاساندى ينتەللەكتتىڭ كەڭ ەتەك جايۋىنىڭ ارقاسىندا جوعارى بىلىكتىلىكتى از قاجەت ەتەتىن سالالارداعى جۇمىسكەرلەردىڭ سانى كەلەشەكتە كەميتىندىگىنە كوزىم جەتتى دەيدى ول.

بەكجان بەكبولات ۇلى، «Huawei Technologies Ltd» كومپانياسىنىڭ تاعىلىمگەرى:

- مەنىڭشە، كوپتەگەن جۇمىستاردى جاساندى ينتەللەكت روبوتتارى اتقاراتىن بولادى. قازىردىڭ وزىندە جاقىن بولاشاقتا ماماندىقتاردىڭ % 40 جوعالىپ، قاراپايىم شارۋالاردى روبوتتار اتقارا بەرەدى دەگەن بولجام بار.

تاعىلىمداما 8 ايعا سوزىلماق. اياقتالعان سوڭ بەكجان كومپانيامەن كەلىسىم- شارتقا وتىرۋى مۇمكىن. قالاي بولعانىمەن ول ءوز بولاشاعىن ەۋروپانىڭ IT سالاسىنان كورىپ وتىر. قازاقستاننان ازىرگە جۇمىس ىزدەۋدى ويلاستىرماعان. ويتكەنى ءبىزدىڭ ەلدە بۇل سالا ءالى باستاپقى دەڭگەيدە، دەيدى ول. ءبىراق كەلەشەكتە تۋعان جەرىندە ەڭبەك ەتۋدى ارماندايدى.

www.24.kz