«حۋتورلىق» توبى: حاسان قاسىمبايەۆقا قانداي ايىپ تاعىلىپ وتىر

استانا. KAZINFORM - الماتى وبلىستىق پوليتسيا دەپارتامەنتى باسپا ءسوز قىزمەتىنىڭ حابارلاۋىنشا، 2021 -جىلعى ماۋسىمدا ا. ەسىمدى ازاماتتىڭ دەنساۋلىعىنا قاساقانا اۋىر زيان كەلتىرىپ، سول كىسىنى ۇرلادى دەگەن كۇدىكپەن بەس ازامات ۇستالعان.

ولاردى الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى سوتتاپ، قازىرگى ۋاقىتتا جازاسىن وتەپ جاتىر.

جەدەل تەرگەۋ ءىس- شارالارىنىڭ ناتيجەسىندە، جوعارىدا اتالعان قىلمىستىق ارەكەتتەرگە قاتىسى بار دەگەن كۇدىكپەن 2024 -جىلدىڭ 2-قاراشاسىندا ق. ەسىمدى ازامات ۇستالىپ، ۋاقىتشا ۇستاۋ يزولياتورىنا قامالدى.

قىلمىستاردىڭ بارلىق ءمان- جايلارىن جان- جاقتى، تولىق جانە وبەكتيۆتى تەرگەۋدى قامتاماسىز ەتۋ ءۇشىن تەرگەۋ جالعاسۋدا.

ءىس ماتەريالدارى بۇلتارتپاۋ شاراسىن سانكتسيالاۋ ءۇشىن سوتقا جىبەرىلدى.

«تەرگەۋ بارىسى وبلىستىق پوليتسيا دەپارتامەنتى باسشىلىعىنىڭ باقىلاۋىندا. وزگە اقپارات تەرگەۋ مۇددەسىنە وراي جاريا ەتىلمەيدى»، - دەلىنگەن حابارلامادا.

وسىعان دەيىن اتىشۋلى حاسان قاسىمبايەۆتىڭ ۇستالعانى تۋرالى جازدىق.