«حۋتور» ۇيىمداسقان قىلمىستىق توبى جوق - الەنوۆ

استانا. KAZINFORM - «حۋتور» ۇيىمداسقان قىلمىستىق توبى جوق. بۇل تۋرالى قونايەۆ قالاسىندا ءوتىپ جاتقان بريفينگتە ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ ايتتى.

«ءبىزدىڭ ەسەپتە «حۋتور» ۇيىمداسقان قىلمىستىق توبى دەگەن جوق... جالپى، قازاقستاندا قولدانىستاعى زاڭ مەن ءتارتىپ بار. مەنىڭشە، قازاقستاندا تۇراتىن بارلىق ازامات وسى ءتارتىپتى، زاڭدى ۇستانادى. ەلىمىزدە ۇيىمداسقان قىلمىستىق توپتاردى، ۇ ق ت- مەن اينالىساتىن تۇلعالاردى تىركەۋ دەگەن جوق»، - دەدى ول ب ا ق وكىلدەرىنىڭ ساۋالىنا وراي.

سونىمەن قاتار ءمينيستردىڭ ءبىرىنشى ورىنباسارى تالعار اۋداندىق پوليتسيا باسقارماسىنىڭ قىزمەتكەرلەرىنە قاتىستى ۇسىنىس ەنگىزىلەتىندىگىن ايتتى.

«قازىرگى ۋاقىتتا ەڭ باستىسى - قىلمىستى اشۋ. ەڭ باستى مىندەتىمىز - ءتارتىپ پەن زاڭدى قالپىنا كەلتىرۋ، ءۇيدى ورتەگەندەردى انىقتاۋ. مەنىڭ نەگىزگى مىندەتىم - وسى جۇمىستاردى قۇقىق اياسىندا ۇيىمداستىرۋ، ءورتتى جاساعان ادامداردى انىقتاۋ، وزگە تۇلعالاردى قاراۋ، تەكسەرۋ، ودان كەيىن مۇنداي جايتتىڭ نەلىكتەن ورىن العانىن انىقتاۋ»، - باۋىرجان الەنوۆ.

ونىڭ اتاپ وتۋىنشە، تالعارداعى قايعىلى وقيعاعا بايلانىستى بۇزاقىلىق، ادام ءولتىرۋ، قوقان-لوقى جاساۋ، قىلمىستى حابارلاماۋ تۋرالى دەرەكتەر بويىنشا قىلمىستىق ءىس قوزعالعان.

ەسكە سالايىق، 4-قازاندا تالعار قالاسىنداعى توبەلەستەن ءبىر ادام قايتىس بولعانىن جازعانبىز.

اشۋلى تالعارلىقتار جاس ءوسپىرىم ولىمىنە بايلانىستى نارازىلىققا شىقتى.

الماتى وبلىسىنىڭ پروكۋراتۋراسى كىسى ءولتىرۋ تۋرالى بۇل ءىس ەرەكشە باقىلاۋعا الىنعانىن رەسمي تۇردە حابارلادى.

ىشكى ىستەر ءمينيسترى ەرجان سادەنوۆ الماتى وبلىسى تالعار اۋدانىنداعى جاس ءوسپىرىمنىڭ ولىمىنە قاتىستى ءىستى جەكە باقىلاۋىنا الدى.

سونداي-اق، قۇقىق قورعاۋشى ايتبەك امانگەلدى قازا تاپقان جاس ءوسپىرىمنىڭ وتباسىنا ادۆوكاتتار تاۋىپ بەردى.

الماتى وبلىستىق پوليتسيا دەپارتامەنتى باستىعىنىڭ مىندەتىن اتقارۋشى سەرىك شالقاروۆ بەينەباقىلاۋ كامەرالارىنان الىنعان جازبالار زەرتتەلىپ جاتقانىن جەتكىزدى.

12-قازان كۇنى تۇندە قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

سونداي-اق، باس پروكۋراتۋرا قىلمىستى اشۋ ءۇشىن ۆەدومستۆوارالىق جەدەل-تەرگەۋ توبى قۇرىلعانىن مالىمدەدى.

ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ مارقۇم شەرزات بولاتتىڭ ءۇيىن ورتەۋ وقيعاسىن تەرگەۋ توبىمەن تالعارعا باردى.

كەيىن ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ ءورت قىلمىسى بويىنشا ايعاقتار الىنىپ، ءتيىستى ساراپتامالار جۇرگىزىلىپ جاتقانىن حابارلادى.

قوعامدىق ءتارتىپتى قاداعالاۋ ءۇشىن ۇلتتىق ۇلان اسكەرى جۇمىلدىرىلدى.