حۋسيتتەر ا ق ش-قا جەدەل ءارى جويقىن سوققى جاسايتىنىن ەسكەرتتى

بۇل تۋرالى FOX News-كە سىلتەمە جاساعان Kazinform اگەنتتىگىنىڭ ۆاشينگتونداعى مەنشىكتى ءتىلشىسى حابارلايدى.

- ەگەر ا ق ش يەمەنگە قارسى اسكەري ارەكەتتەرگە ارالاسسا، جاۋاپ قايتارۋدى ۇزاق كۇتتىرمەيمىز. ا ق ش-تىڭ وزىنە جانە ايماقتاعى بارلىق مۇددەسىنە باعىتتالعان جەدەل ءارى جويقىن سوققى جاسايمىز،-دەدى حۋسيتتەردىڭ ساياسي بيۋروسىنىڭ مۇشەسى مۇحاممەد ءال-بۋحايتي.

مۇحاممەد ءال-بۋحايتي ساۋد ارابياسىنداعى مۇناي نىساندارى مەن اۋەجاي قىزمەتكەرلەرىن بۇل ورىنداردان الىس جۇرۋگە شاقىردى. ونىڭ ايتۋىنشا، اتالعان نىساندار ەندى زاڭدى نىساناعا اينالعان.

بۇل مالىمدەمەلەر توپتىڭ ەر-ريادتاعى كورول حاليد اتىنداعى حالىقارالىق اۋەجايعا جاساعان جويقىن شابۋىلىنان كەيىن ايتىلدى. قايعىلى وقيعا 13 ادامنىڭ ءومىرىن قيىپ، جۇزدەگەن ادامدى جارالادى.

دۇيسەنبى كۇنى پرەزيدەنت دونالد ترامپ ەر-ريادتاعى شابۋىلدى ايىپتاپ، بۇل ارەكەتتى مۇلدە ورىنسىز دەپ مالىمدەدى.

- حۋسيتتەر وتە ورەسكەل قاتەلىك جاساپ وتىر. ولاردىڭ ءىسى مۇلدە دۇرىس ەمەس، - دەدى ا ق ش پرەزيدەنتى دونالد ترامپ.

بۇعان دەيىن يران ا ق ش-تىڭ پارسى شىعاناعىنداعى دەرەك ورتالىقتارىن جويامىز دەپ سەس كورسەتكەنى حابارلانعان بولاتىن.