حارريستىڭ تانىمالدىلىعى ترامپتان جوعارى - سوڭعى ساۋالناما قورىتىندىسى

استانا. KAZINFORM - دەموكراتيالىق پارتيانىڭ ۇلتتىق سەزد الدىندا جانە ونىڭ بارىسىندا جۇرگىزىلگەن ءبىرقاتار ساۋالناما دەموكراتيالىق پارتيادان پرەزيدەنتتىككە ۇمىتكەر كامالا ءحارريستى قولداۋ دەڭگەيى رەسپۋبليكالىق پارتيانىڭ قارسىلاسى دونالد ترامپتان جوعارى ەكەنىن كورسەتتى.

«Gallup» ساۋالناماسى بويىنشا، دەموكراتتار مەن تاۋەلسىز سايلاۋشىلاردىڭ ۆيتسە-پرەزيدەنت كامالا حارريسكە دەگەن ىقىلاسى زور، جانە بۇرىنعى پرەزيدەنت دونالد ترامپ رەيتينگىنەن اسىپ ءتۇستى.

كامالا حارريستىڭ تانىمالدىلىعى تامىزدا 13 پايىزدىق تارماققا، 47 پايىزعا دەيىن ءوستى. ال بۇرىنعى پرەزيدەنت دونالد ترامپتىڭ رەيتينگى 5 پايىزدىق تارماققا، 41 پايىزعا دەيىن تومەندەپ، قاراشادا وتەتىن پرەزيدەنتتىك سايلاۋدى تارتىستى ەتتى.

كامالا حارريستىڭ قولايلى رەيتينگى دەموكراتتار اراسىندا %93، تاۋەلسىزدەر %41 جانە رەسپۋبليكاشىلار %5 عا دەيىن كوتەرىلدى.

ۆيتسە- پرەزيدەنتتىڭ جۇمىسىن ماقۇلداۋ رەيتينگى قازىر %47 قۇرايدى، بۇل جەلتوقسانداعى الدىڭعى كورسەتكىشتەن 7 تارماققا جوعارى. ك. حارريستىڭ ۆيتسە-پرەزيدەنتتىك مەرزىمى كەزىندە ول %40 دان %49 عا دەيىن اۋىتقىپ تۇردى.

سونداي-اق «Gallup» مالىمەتىنشە، پرەزيدەنت دجو بايدەننىڭ رەيتينگى تامىز ايىندا پرەزيدەنتتىك جارىستان شىعىپ قالعاننان كەيىن بىرنەشە اپتا ىشىندە 7 تارماققا، %43 عا دەيىن كوتەرىلدى، بۇل دەموكراتتاردىڭ شەشىمدى %89 ماقۇلداۋىنا بايلانىستى بولۋى مۇمكىن.

ساۋالناما 1-20-تامىز ارالىعىندا دەموكراتيالىق پارتيانىڭ 19-22-تامىزدا وتكەن ۇلتتىق سەزى كەزىندە جۇرگىزىلدى. قورىتىندى ا ق ش-تىڭ بارلىق 50 شتاتىندا جانە كولۋمبيا وكرۋگىندە تۇراتىن 1015 ا ق ش ەرەسەكتەرىنىڭ كەزدەيسوق تاڭداۋىنا نەگىزدەلگەن. تاڭداۋ قاتەلىگىنىڭ شەگى %95 سەنىمدىلىك دەڭگەيىندە 4+/-  پايىزدىق تارماق بولادى.

اۆتور
زارينا تۋعانبايەۆا