حاربين قىسقى ازيا ويىندارىن قانداي سپورت كەشەنىندە قابىلدايدى
استانا. KAZINFORM - حاربين قالاسىندا وتەتىن IX قىسقى ازيا ويىندارىنىڭ باستالۋىنا نەبارى ءبىر ايعا جۋىق ۋاقىت قالدى.
اق ازيادانى ەكىنشى مارتە وتكىزگەلى وتىرعان حاربين قالاسى بۇل كۇندە بارلىق دايىندىق جۇمىستارىن اياقتادى، سپورت نىساندارى جارىستى قابىلداۋعا دايىن.
IX قىسقى ازيا ويىندارى حاربين قالاسىنداعى مۇز سپورتى وتەتىن 5 ارەنا جانە يابۋلي تاۋ شاڭعىسى كۋرورتىندا قار سپورتى وتەتىن 8 جارىس الاڭىندا وتەدى.
1. حاربين حوككەي ارەناسى
سپورت نىسانى 1993 -جىلى سالىنعان، جالپى اۋدانى 32600 شارشى مەتر جانە حالىقارالىق ستاندارتقا ساي 4 مۇز ايدىنى بار. 5400 ورىندىق نىسان قالاداعى ەڭ ۇلكەن جابىق الاڭ بولىپ سانالادى. مۇندا قىسقى ازيا ويىندارىنىڭ ەرلەر اراسىنداعى شايبالى حوككەي جارىسى وتەدى.
2. حاربين سپورت ۋنيۆەرسيتەتىنىڭ مۇز ايدىنى
2007 -جىلى 31-جەلتوقساندا پايدالانۋعا بەرىلگەن نىسان 12060 شارشى مەتر اۋماقتى الىپ جاتىر. 2200 كورەرمەن قابىلداي الادى. عيماراتتىڭ جالپى سىرتقى بيىكتىگى - 19,6 مەتر، ەنى - 60 مەتر، ۇزىندىعى - 90 مەتر.
جوعارعى قاباتتاعى مۇز ايدىنى 1768 شارشى مەتر، ال تومەنگى قاباتتاعى مۇز ايدىنى 1580 شارشى مەتر. سونداي-اق، ءتورت قاباتتان تۇراتىن نىساندا سپورتشىلار، جاتتىقتىرۋشىلار مەن تورەشىلەرگە ارنالعان دەمالىس بولمەلەرى، قۇرال-جابدىقتار بولمەلەرى، پرەسس ورتالىعى جانە دەنە شىنىقتىرۋ ورتالىعى بار.
3. حاربين كەرلينگ ارەناسى
كەشەن 2017 -جىلى سالىنعان، جالپى اۋدانى - 9311 شارشى مەتر.
نىسان مۇز سپورتى بويىنشا بارلىق حالقارالىق تالاپقا ساي بولىپ، وسى ۋاقىتقا دەيىن كوپتەگەن حالىقارالىق جارىستاردى ءساتتى وتكىزگەن. كەشەندە قىسقى ازيا ويىندارىنىڭ كەرلينگ سپورتىنان جارىستار وتەدى.
4. حيلۋڭجياڭ مۇز ايدىنى جاتتىعۋ ورتالىعى (كونكيمەن جۇگىرۋ سپورتى كەشەنى)
حيلۋڭجياڭ مۇز ايدىنى جاتتىعۋ ورتالىعى 1973 -جىلى پايدالانۋعا بەرىلگەن، جالپى اۋدانى - 91545 شارشى مەتر. ورتالىقتا كونكيمەن جۇگىرۋ سپورتى كەشەنى، شورت-ترەك جانە مانەرلەپ سىرعاناۋ سپورتى كەشەنى بار.
كونكيمەن جۇگىرۋ سپورتى كەشەنى 1995 -جىلى سالىنعان. عيماراتتىڭ اۋدانى - 22268 شارشى مەتر، ۇزىندىعى - 192 مەتر، ەنى - 80 مەتر، ال بيىكتىگى - 29 مەتر. كەشەندە ءبىر مۇز ايدىنى جانە ەكى شورت- ترەك الاڭى بار. ءۇش قاباتتان تۇراتىن كەشەن شامامەن 1594 كورەرمەن قابىلداي الادى.
ايتا كەتەرلىگى، بۇل نىسان Ⅲ قىسقى ازيا ويىندارىن قابىلداعان.
5. حيلۋڭجياڭ مۇز ايدىنى جاتتىعۋ ورتالىعى (شورت-ترەك جانە مانەرلەپ سىرعاناۋ سپورتى كەشەنى)
شورت-ترەك كەشەنى 1983 -جىلى سالىنعان. جالپى اۋدانى - 9242 شارشى مەتر، كورەرمەندەرگە ارنالعان ورىن سانى - 2767. كەشەندە شورت-ترەك، مانەرلەپ سىرعاناۋ، شايبالى حوككەي، كەرلينگ جانە باسقا دا سپورت تۇرلەرى بويىنشا جاتتىعۋلار مەن جارىستار وتكىزۋگە بولادى.
مانەرلەپ سىرعاناۋ كەشەنى 2008 -جىلى پايدالانۋعا بەرىلگەن، جالپى اۋدانى - 12093 شارشى مەتر. حالىقارالىق ستاندارتقا ساي جارىس الاڭى جانە جاتتىعۋ مۇز ايدىنى بار.
6. يابۋلي تاۋ شاڭعىسى كۋرورتى
حيلۋڭجياڭ پروۆينسياسى يابۋلي تاۋ شاڭعى كۋرورتى Ⅲ قىسقى ازيا ويىندارىن قابىلداعان. قازىرگى ۋاقىتتا شاڭعى تراسساسى 118 گەكتار اۋماقتى الىپ جاتىر. كۋرورت تاۋ شاڭعىسى، شاڭعىمەن سىرعاناۋ، فريستايل، سنوۋبورد، ترامپليننەن سەكىرۋ جانە بياتلون سياقتى حالىقارالىق دەڭگەيدەگى قار سپورتى جارىستارىن وتكىزە الادى.
سونداي-اق، شاڭعى تراسساسىنىڭ جالپى ۇزىندىعى - 31 شاقىرىم، ال ەڭ ۇزىن تراسسا 5 شاقىرىمعا جەتەدى.
ايتا كەتەرلىگى، IX قىسقى ازيا ويىندارى ۇيىمداستىرۋ كوميتەتىنىڭ ايتۋىنشا، جارىس وتەتىن بارلىق ارەنا مەن الاڭ، قولدانىستاعى نىساندار جاڭارتىلىپ، ەنەرگيانى ۇنەمدەيتىن جانە ەكولوگيالىق تازا ماتەريالدار مەن جاسىل جانە تومەن كومىرتەكتى تەحنولوگيالار پايدالانىلدى.
ەسكە سالساق، IX قىسقى ازيا ويىندارى 2025 -جىلدىڭ 7-14-اقپانى ارالىعىندا قىتاي حالىق رەسپۋبليكاسى حيلۋڭجياڭ پروۆينسياسىنىڭ حاربين قالاسىندا وتەدى. سپورتشىلار 12 سپورت ءتۇرى بويىنشا 64 مەدال جيىنتىعىن ساراپقا سالادى.
ق ر تۋريزم جانە سپورت مينيسترلىگىنىڭ حابارلاۋىنشا، قازاقستاننان 139 سپورتشى ەل نامىسىن قورعايدى.
اۆتور
مۇحتار قاليموللا ۇلى
