حاماس تاعى ءۇش يزرايلدىكتى بوساتتى
استانا. KAZINFORM - گازا سەكتورىنداعى اتىستى توقتاتۋ كەلىسىمى اياسىندا حاماس سەنبى كۇنى تاعى ءۇش يزرايلدىكتى تۇتقىننان بوساتتى. ونىڭ ورنىنا يزرايل 180 نەن استام پالەستينالىقتى تۇرمەدەن شىعارۋى كەرەك، دەپ حابارلايدى BBC.

بۇل 19-قاڭتاردا اتىستى توقتاتۋ كەلىسىمى كۇشىنە ەنگەننەن بەرگى ءتورتىنشى تۇتقىن الماسۋ. اقپاننىڭ 1- كۇنى حاماس يزرايلگە تۇتقىنعا الىنعان ءۇش ادامنىڭ ەسىمدەرىن ايتتى. ولاردىڭ بارلىعى بەيبىت ەر ازاماتتار. اۋەلى ەكەۋى بوساتىلىپ، يزرايلگە بەرىلدى.
سونىڭ ءبىرى - نير-وز جەرىندە ەكى بالاسىمەن تۇتقىنعا الىنعان 54 جاستاعى وفير كالدەرون (ەكى بالاسى بوساتىلىپ قويعان).
ەكىنشىسى - نير-وزدا حاماس اسكەريلەرىنىڭ قولىنا تۇسكەن 35 جاستاعى ياردەن بيباس. سول كەزدە ونىڭ قاسىندا شيري ەسىمدى ايەلى مەن ەكى بالاسى - ءتورت جاسار اريەل مەن 10 ايلىق كفير (بالالاردىڭ تۇتقىنعا تۇسكەن كەزدەگى جاسى) بولدى.
بەلگىلى بولعانداي، بۇل وتباسىنى گازاعا بارار جولدا ەكى ءبولىپ، ياردەن بيباس ءبىر جارىم جىل بويى بالا-شاعاسىنان جىراقتا ۇستالعان. ونىڭ ايەلى مەن ەكى- بالاسى ءالى ورالمادى. تۋىستارىنىڭ ايتۋىنشا، ولار امان قالدى دەگەن ءۇمىت وتى كۇن وتكەن سايىن ءسونىپ بارادى.
ال 65 جاستاعى اقش پەن يزرايل ەلدەرىنىڭ ازاماتى كيت سيگەل بۇگىن يزرايلگە بەرىلدى. تۇتقىندا بولعان ونىڭ ايەلى 2023 -جىلدىڭ قاراشاسىندا بوساتىلعان ەدى.
وسىعان دەيىن حاماس-تىڭ كەلەسى بوساتىلاتىن كەپىلگە الىنعانداردىڭ ەسىمدەرىن جاريالاعانىن جازدىق.
اۆتور
تالعاتجان مۇحامەتبەك ۇلى