حاماس بىتىمگە كەلۋ تۋرالى ۇسىنىستى قابىلدامادى
استانا. KAZINFORM - حاماس توبىنىڭ باسشىلىعى اتىستى 6 اپتاعا توقتاتۋ تۋرالى ۇسىنىستى قابىلداعان جوق. ولار يزرايل اسكەرىنىڭ گازادان شىعارىلۋىن تالاپ ەتىپ وتىر. بۇل تۋرالى euronews جازدى.
توپتىڭ رەسمي وكىلدەرى باسپا سوزگە جاساعان مالىمدەمەسىندە يزرايلدىڭ حاماستىڭ تۇراقتى اتىستى توقتاتۋ، اسكەردىڭ گازا سەكتورىنان شىعارىلۋىن، «سولتۇستىكتەگى تۇرعىنداردىڭ ۇيلەرىنە قايتارۋ جانە حالىقتى نەگىزگى قاجەتتىلىكتەرمەن قامتاماسىز ەتۋ» تالاپتارىن ورىنداۋدان باس تارتقانىن اتادى. دەگەنمەن، حاماس بىتىمشىلەرمەن كەلىسسوزدەردى جالعاستىراتىنىن اتاپ ءوتتى.
ولار بىتىمگە قاسيەتتى رامازان ايى باستالعانعا دەيىن كەلەتىنىنە ۇمىتتەندى، سەبەبى بۇل ايدا يەرۋساليمدەگى قاسيەتتى ورىندارعا كىرۋگە بايلانىستى پالەستينالىق-يزرايلدىك قاقتىعىستار جيىلەي تۇسەدى.
وسى ارادا پالەستينالىق ارىپتەسى ماحمۋد ابباستى قابىلداپ وتىرعان تۇركيا پرەزيدەنتى رەجەپ تايپ ەردوعان يزرايلدى يەرۋساليمدەگى قاسيەتتى جەرلەرگە مۇسىلمانداردىڭ كىرۋىنە شەكتەۋ قويۋ ارەكەتتەرى تۋرالى ەسكەرتتى. تۇركيا باسشىسى تاياۋ شىعىستاعى جانجالدى شەشۋ ءۇشىن تاۋەلسىز پالەستينا مەملەكەتىن قۇرۋ قاجەت ەكەنىن تاعى دا اتاپ ءوتتى. ول سونداي-اق ايماقتاعى توپتار اراسىنداعى ىنتىماقتاستىق «يزرايلدىڭ ەزگىسىنە ەڭ جاقسى جاۋاپتاردىڭ ءبىرى» بولاتىنىن ايتتى.
«يزرايلدىڭ راديكالدى ساياساتكەرلەرىنىڭ عيباداتحانا تاۋىنا مۇسىلمانداردىڭ كىرۋىنە شەكتەۋ قويۋ تۋرالى تالاپتارى — ساندىراق. مۇنداي قادامنىڭ سالدارى وتە اۋىر بولاتىنى ءسوزسىز»، - دەدى تۇركيا پرەزيدەنتى.
سوعىستىڭ 5 ايىندا انكلاۆتىڭ كوپ بولىگى ۇيىندىگە اينالعان. گۋمانيتارلىق كومەكتى جەرۇستى جەتكىزۋ سوعىس قيمىلدارى مەن بۇل ماسەلەنى تساحالمەن ۇيلەستىرۋ مۇمكىن ەمەستىگىنە بايلانىستى وتە قيىنعا سوقتى.
ب ۇ ۇ مالىمەتىنشە، گازا سەكتورىنىڭ 2,3 ميلليون حالقىنىڭ تورتتەن ءبىرى اشتىققا ۇشىراعان.
انكلاۆتىڭ سولتۇستىك بولىگىنىڭ تۇرعىندارىنا گۋمانيتارلىق كومەكتىڭ تاعى ءبىر پارتياسى اۋەدەن تۇسىرىلگەنى بەلگىلى بولدى. وپەراتسياعا ا ق ش، يوردانيا، مىسىر جانە فرانسيانىڭ ۇشاقتارى قاتىستى. ا ق ش رەسمي تۇلعالارىنىڭ حابارلاۋىنشا، ولار اۋەدەن 36800 بىرلىك ازىق-تۇلىك تاستاعان.
