حالىقارالىق وليمپيادالىق كوميتەتتىڭ مويىنداۋى بىزدە سپورت دۇرىس باعىتتا دامىپ جاتقانىن كورسەتەدى - گولوۆكين

استانا. قازاقپارات - 26- اقپاندا حالىقارالىق وليمپيادالىق كوميتەتى (ح و ك) World Boxing حالىقارالىق فەدەراتسياسىن ۋاقىتشا مويىنداعانىن رەسمي تۇردە جاريالادى.

بۇل شەشىمگە قازاقستان ۇلتتىق وليمپيادالىق كوميتەتىنىڭ پرەزيدەنتى، World Boxing وليمپيادالىق كوميسسياسىنىڭ ءتوراعاسى گەننادي گولوۆكين پىكىر ءبىلدىردى.

ح و ك-تىڭ ۋاقىتشا مويىنداۋى - ماڭىزدى جەتىستىك جانە ءبىزدىڭ سپورتتىڭ دۇرىس جولدا ەكەنىن كورسەتەدى. بۇل شەشىم ءبىزدى باستى ماقساتىمىز - بوكستى وليمپيادا ويىندارىندا ساقتاۋ جولىندا تاعى ءبىر قادام العا جىلجىتادى. مەن World Boxing-تى قولدايتىن بارلىق ادامداردىڭ ۇزدىكسىز ەڭبەگىنىڭ ارقاسىندا وسىنداي ناتيجەگە قول جەتكىزگەنىمىزگە قۋانىشتىمىن. بولاشاق سپورتشىلار مەن بولاشاق چەمپيوندار ءۇشىن ءبىزدىڭ ورتاق ماقساتىمىز - ادالدىق پەن بەيتاراپتىق قاعيداتتارىنا نەگىزدەلگەن حالىقارالىق فەدەراتسيا قۇرۋ. بارلىق ماقساتتارىمىزعا جەتۋ ءۇشىن ءالى دە كوپ جۇمىس ىستەۋىمىز كەرەك، سوندىقتان ءبىز وسى جەتىستىگىمىزبەن شەكتەلمەيمىز، - دەدى ول.

ايتا كەتەلىك حالىقارالىق وليمپيادالىق كوميتەتىنىڭ اتقارۋشى كەڭەسى قاشىقتان وتكەن وتىرىستا World Boxing حالىقارالىق فەدەراتسياسىن ۋاقىتشا مويىنداعان ەدى.

اۆتور

نازىم بولەسوۆا