حالىقارالىق وليمپيادادان باس جۇلدە العان وقۋشى 6 ميلليون تەڭگە الادى

استانا. Kazinform - اۋىل مەكتەبىنىڭ وقۋشىلارىن زياتكەرلىك وليمپيادالار مەن بايقاۋلارعا دايىنداۋ ماقساتىندا «دارىن» ونلاين مەكتەبى ءوز جۇمىسىن باستادى. بۇل تۋرالى «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى گاجدەمبەك تۇرسىنوۆ ايتتى.

- قازىرگى ۋاقىتتا قازاقستان وليمپيادالاردىڭ جۇلدەگەرلەرىن ماراپاتتاۋ تاجىريبەسىنە يە از عانا ەلدەردىڭ ءبىرى. پرەزيدەنتتىڭ باستاماسىمەن 2022 -جىلدان باستاپ حالىقارالىق ءپان وليمپيادالارىنىڭ جەڭىمپازدارى مەن ولاردىڭ ۇستازدارىنا اقشالاي سىياقى بەرىلە باستادى. حالىقارالىق وليمپيادالاردا جۇلدەلى ورىن العان وقۋشىلار ءبىر رەتتىك مەملەكەتتىك سىياقى الادى: التىن مەدال ءۇشىن - 1500 ا ە ك، كۇمىس مەدال ءۇشىن - 1000 ا ە ك، قولا مەدال ءۇشىن - 500 ا ە ك مولشەرىندە، - دەدى ول.

2025 -جىلى ەلىمىزدە 1 ا ە ك 3932 تەڭگە بولىپ بەكىتىلگەن. سوعان ساي، «التىن مەدال» العان وقۋشى ناقتى 5898000 تەڭگە الادى.

سپيكەر، سونداي-اق، مۇنداي وقۋشىلاردى دايىنداعان پەداگوگتەردىڭ دە قانشا سىياقى الاتىنىن اتاپ ءوتتى.

- التىن مەدال العان وقۋشىنى دايىنداعان ۇستازعا - لاۋازىمدىق جالاقىسىنىڭ 26,5 ەسەلەنگەن مولشەرىندە، كۇمىس مەدال العانعا - 17,5 ەسەلەنگەن مولشەرىندە، قولا مەدال العانعا - 8,5 ەسەلەنگەن مولشەرىندە بىلىكتىلىك ارتتىرۋ دەڭگەيىنە سايكەس سىياقى بەرىلەدى، - دەدى گاجدەمبەك تۇرسىنوۆ.

ايتا كەتەيىك، ەلىمىزدە شالعاي اۋىلداردا تۇراتىن دارىندى وقۋشىلاردى وليمپياداعا دايىندايتىن ونلاين مەكتەپ اشىلدى.

اۆتور

ەربول جانات