حالىقارالىق وليمپيادادا جەڭگەن وقۋشىلار 5,5 ميلليون تەڭگەدەن سىياقى الادى

استانا. KAZINFORM - قازاقستاندىق وقۋشىلار حالىقارالىق وليمپيادالارداعى جەڭىسى ءۇشىن 5,5 ميلليون تەڭگەدەن سىياقى الادى.

الەم بويىنشا توپ-7 بەدەلدى وليمپيادالاردا جۇلدەلى ورىن العان 26 قازاقستاندىق وقۋشى قارجىلاي سىياقى الادى.

سىياقىنىڭ جالپى سوماسى 77,5 ميلليون تەڭگەدەن اسادى.

2023-2024 وقۋ جىلىنىڭ قورىتىندىسى بويىنشا ەلىمىزدىڭ ۇلتتىق قۇراماسى ەڭ بەدەلدى الەمدىك پاندىك وليمپيادالاردا 2 التىن، 12 كۇمىس، 12 قولا مەدال جانە ءبىر ديپلوم يەلەندى.

بۇل وليمپيادالار: IMO (ماتەماتيكادان)، IPhO (فيزيكادان)، IBO (بيولوگيادان)، IChO (حيميادان)، IOL (لينگۆيستيكادان)، IGeO (گەوگرافيادان) جانە IOI (ينفورماتيكادان).

تالانتتى وقۋشىلاردى قولداۋ ماقساتىندا مەملەكەت باسشىسىنىڭ تاپسىرماسىمەن 2022 -جىلدان باستاپ حالىقارالىق وليمپيادالاردىڭ جۇلدەلى ورىنداردى يەلەنگەن وقۋشىلارعا جانە ولاردى دايىنداعان پەداگوگتەرگە مەملەكەت تاراپىنان ءبىرجولعى سىياقى تاعايىندالعان.

فوتو: وقۋ-اعارتۋ مينيسترلىگى

التىن مەدال جەڭىپ العان وقۋشى 1500 ايلىق ەسەپتىك كورسەتكىش (ا ە ك) مولشەرىندە، كۇمىس مەدال ءۇشىن - 1000 ا ە ك، قولا مەدال ءۇشىن - 500 ا ە ك مولشەرىندە اقشالاي سىياقى الادى.

ال التىن مەدال يەگەرىن دايىنداعان پەداگوگكە - بازالىق لاۋازىمدىق ايلىقاقى 26,5 ەسەلەنگەن مولشەرىندە؛ كۇمىس مەدال يەگەرىن دايىنداعان پەداگوگكە - بازالىق لاۋازىمدىق ايلىقاقى 17,5 ەسەلەنگەن مولشەرىندە؛ قولا مەدال يەگەرىن دايىنداعان پەداگوگكە - بازالىق لاۋازىمدىق ايلىق اقى 8,5 ەسەلەنگەن مولشەرىندە بەرىلەدى.

سونىمەن قاتار، حالىقارالىق وليمپيادالاردىڭ جەڭىمپازدارىنا قازاقستاندىق ج و و-نىڭ كەز كەلگەنىنە وقۋعا تۇسۋگە ءبىلىم گرانتى بەرىلەدى.

ەستەرىڭىزگە سالا كەتەيىك، وتكەن جىلى 23 وقۋشى 65,6 ميلليون تەڭگە، 20 پەداگوگ جالپى سوماسى 71,4 ميلليون تەڭگە ءبىرجولعى سىياقى العان بولاتىن.

جالپى 12 ءىرى حالىقارالىق جارىسقا قاتىسقان 1218 قازاقستاندىق وقۋشىنىڭ 603 ى مەدال يەگەرى اتاندى.

ياعني، الەمدىك دودالاردا ەلىمىزدىڭ نامىسىن قورعاعان ءاربىر ەكىنشى قاتىسۋشى جۇلدەلى ورىنعا يە بولدى.

اۆتور
جانات قاپالبايەۆا