حالىقارالىق قىزىل كرەست كوميتەتى قازاقستانعا العىسىن ءبىلدىردى
استانا. KAZINFORM - قازاقستاننىڭ سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين حالىقارالىق قىزىل كرەست كوميتەتىنىڭ (ح ق ك ك) ورتالىق ازياداعى وڭىرلىك دەلەگاتسياسىنىڭ باسشىسى بيليانا ميلوشيەۆيچپەن كەزدەستى، دەپ حابارلايدى ۆەدومستۆونىڭ باسپا ءسوز قىزمەتى.
- ب. ميلوشيەۆيچ قازاقستانعا ح ق ك ك-نىڭ گۋمانيتارلىق ميسسياسىن ورىنداۋدا تۇراقتى قولداۋ كورسەتكەنى ءۇشىن العىس ءبىلدىردى. ول قازاقستان ءوز ازاماتتارىن قارۋلى قاقتىعىستار ايماقتارىنان، اتاپ ايتقاندا سيريا مەن يراكتان قايتارۋ جونىندەگى كۇش-جىگەرىن جوعارى باعالادى، - دەلىنگەن مينيسترلىك حابارلاماسىندا.
قازاق ديپلوماتى ح ق ك ك-نىڭ گۋمانيتارلىق ميسسياسىنىڭ ماڭىزدىلىعىنا نازار اۋدارىپ، بيىل الەم مەرەكەلەپ جاتقان جەنەۆا كونۆەنسيالارىنىڭ 75 جىلدىعى مەن ونىڭ ءرولىن ەرەكشە اتاپ ءوتتى. ەلىمىزدىڭ حالىقارالىق قىزىل كرەست جانە قىزىل جارتى اي قوزعالىسىمەن بىرلەسكەن جۇمىسىنىڭ جالعاستىرۋىنا بەيىلدىك راستالدى.
تاراپتار قازاقستان، برازيليا، قىتاي، فرانسيا، يوردانيا جانە وڭتۇستىك افريكا رەسپۋبليكاسى 2024 -جىلعى قىركۇيەكتە نيۋ-يوركتە جاريالانعان حالىقارالىق گۋمانيتارلىق قۇقىققا ساياسي قولداۋدى ارتتىرۋ جونىندەگى جاھاندىق باستاما اياسىندا ودان ءارى ءىس-قيمىلداردى تالقىلادى.
بۇعان قوسا سۇحباتتاستار ورتالىق ازيا، اۋعانستان مەن تاياۋ شىعىستاعى حالىقارالىق قاتىناستاردىڭ وزەكتى ماسەلەلەرى بويىنشا پىكىر الماستى.
ح ق ك ك - سوعىس، زورلىق-زومبىلىق جانە گۋمانيتارلىق اپاتتار قۇرباندارىنا كومەك كورسەتۋدى ماقسات ەتكەن تاۋەلسىز ۇيىم. ول 1992 -جىلدان بەرى ورتالىق ازيادا قىزمەت اتقارادى، تاشكەنتتە وڭىرلىك وكىلدىگى جانە استانادا وكىلدىگى بار.
اۆتور
اينۇر تۋماكبايەۆا
