حالىقارالىق بۇراندامۇيىزدى ەشكى كۇنىن مەرەكەلەۋ تۋرالى ۇسىنىس ماقۇلداندى

бұрандамүйізді ешкі
Фото: Ховар

استانا. KAZINFORM – ب ۇ ۇ باس اسسامبلەياسى تاجىكستان پرەزيدەنتى ەمومالي راحموننىڭ ۇسىنىسىن ەسكەرە وتىرىپ، 24-مامىردى حالىقارالىق مارحۋر كۇنى رەتىندە اتاپ ءوتۋ تۋرالى شەشىم قابىلدادى. بۇل تۋرالى «حوۆار» اقپارات اگەنتتىگى حابارلادى.

«حالىقارالىق مارحۋر كۇنىن جاريالاۋ تۋرالى قاراردىڭ دەمەۋشىلەرى اۋعانستان، ۆەنگريا، يزرايل، قازاقستان، قىتاي، پاكىستان، تاجىكستان، تۇرىكمەنستان جانە وزبەكستان»، - دەپ حابارلادى اگەنتتىك.

بۇل بىرەگەي تىرشىلىك يەسىنىڭ ءومىر سۇرۋىنە ەڭ ۇلكەن قاۋىپ -تىرشىلىك ەتۋ ورتاسىنىڭ جوعالۋى، زاڭسىز اڭ اۋلاۋ، ونىڭ ىشىندە براكونەرلىك جانە كليماتتىڭ وزگەرۋى.

شەشىمگە سايكەس، 24-مامىر - حالىقارالىق مارحۋر كۇنىندە ەلدەر مەن ۇيىمدار وسى ماڭىزدى بۇراندامۇيىزدىلەر ءتۇرىن ساقتاۋعا باعىتتالعان ءىس-شارالاردى وتكىزۋى كەرەك.

مالىمەت ءۇشىن، مارحۋر (Capra falconeri) - حالىقارالىق « قىزىل كىتاپقا» ەنگىزىلگەن تاۋ ەشكىسىنىڭ سيرەك ءتۇرى.

تاۋ ەشكىلەر تۇقىمداسىنا جاتاتىن مارحۋر اتاۋى پارسى تىلىندەگى مور - «جىلان» جانە حۋر - «جەۋ» سوزدەرىنەن شىققان. بەلگىلى ءبىر سەبەپتەرمەن جەرگىلىكتى تۇرعىندار مارحۋرلار جىلانداردى اۋلاپ، ولاردى جەيدى دەپ سەنگەن. سوندىقتان جەرگىلىكتى تۇرعىندار مارحۋر ەتى جىلان شاققان ادامعا ەم بولادى دەگەن. ارينە، بۇل اڭىزدىڭ عىلىمي دالەلى جوق، مارحۋرلار تەك ءشوپ جەيدى. ولاردىڭ جىلان جەگەنىن ەشكىم كورمەگەن.

مارحۋرلار سولتۇستىك جانە سولتۇستىك- باتىس ءۇندىستاندا، يراننىڭ وڭتۇستىك- شىعىسىندا جانە اۋعانستاندا تارالعان. وزبەكستاننىڭ تاستاق تاۋلارىندا دا كەزدەسەدى. بۇراندامۇيىزدى مارحورلار تىك جارتاستى تاۋ بەتكەيلەرىن مەكەندەيدى.

سوڭعى جاڭالىقتار