حالىق پەن پرەزيدەنتتەن كەشىرىم سۇرايمىن - قايرات ساتىبالدى كىناسىن مويىندادى

  استانا. KAZINFORM - قايرات ساتىبالدى سوتتا سويلەگەن سوزىندە ءوزىنىڭ قاتەلىگىن مويىندايتىنىن ءمالىم ەتتى.

«كەز كەلگەن ازامات ءۇشىن مەملەكەت مۇددەسى بارىنەن بيىك بولۋعا ءتيىس. حالقىمىزدا ءسوز بار، «جاڭىلمايتىن جاق، سۇرىنبەيتىن تۇياق بولمايدى» دەگەن. مەن جاساعان قاتەلىكتەرىمدى مويىندايمىن. ماعان قاتىستى قىلمىستىق ءىس بويىنشا مەن ورگاندارعا كومەكتەسىپ، بۇكىل زاڭسىز قارجىنى قايتارىپ جاتىرمىن. ەلدەن زاڭسىز شىعارىلعان اكتيۆتەردى قايتارۋ - ەلدىڭ ىرىسىن وزىنە قايتارۋ دەپ بىلەمىن. بۇل - مەملەكەت باسشىسى قابىلداعان ماڭىزدى شەشىمدەردىڭ ءبىرى. مۇندايدى كورگەن سوڭ، ەندىگى جەردە ەشكىم ەلدىڭ ىرىسىن سىرتقا شاشپايدى»، - دەدى ق. ساتىبالدى.

سونىمەن قاتار ول مەملەكەتتە سوڭعى جىلدارى بولىپ جاتقان وڭ وزگەرىستەردى كورىپ-ءبىلىپ وتىرعانىن ايتتى.

«وسىندايدا ءبارىمىز ءبىر جاعادان باس، ءبىر جەڭنەن قول شىعارىپ، بىرگە جۇمىس ىستەۋىمىز كەرەك. مەن پرەزيدەنتىمىزدىڭ جۇرگىزىپ وتىرعان ساياساتىن تولىقتاي قولدايمىن. زاڭسىز كاپيتالدىڭ ءبارى -تيىنىنا دەيىن ەلگە قايتارىلىپ، زاڭ مەن ءتارتىپ بولۋعا ءتيىس! حالىقتان، كەزىندە تىزەم باتقان، اقىسىنا كىرگەن ادامداردان جانە مەملەكەت باسشىسىنان كەشىرىم سۇرايمىن»، - دەدى ول.

ونىڭ سوزىندە وسىعان دەيىن بارلىق ىستەگەن ءىس- ارەكەتتەرىن سارالاۋعا، وي قورىتۋعا ۋاقىت جەتكىلىكتى بولعانى اتاپ وتىلگەن. بۇل رەتتە جىبەرگەن قاتەلىگىن جانە كىناسىن تولىقتاي مويىنداي وتىرىپ، ىستەگەن ىسىنە وكىنەتىنى ايتىلعان.

ق. ساتىبالدىنىڭ ايتۋىنشا، تەرگەۋ ورىندارىمەن بىرلەسىپ جۇمىس جۇرگىزىلدى.

«مەملەكەت باسشىسىنىڭ زاڭسىز اكتيۆتەردى مەملەكەتكە قايتارۋ ءىسى بويىنشا جۇرگىزىپ جاتقان ساياساتىن تولىقتاي قولدايمىن. مەنىڭ ىستەگەن ءىسىم باسقالارعا دۇرىس شەشىم شىعارۋ ءۇشىن ساباق بولادى دەپ ويلايمىن. اعاتتىق ىستەپ، رەنجىتكەن ادامداردان كەشىرىم سۇرايمىن»، - دەدى ول.

بۇدان بۇرىن حابارلانعانداي، قايرات ساتىبالدىعا قاتىستى ۇكىم وزگەردى.

بۇل رەتتە، باس بوستاندىعىنان ايىرۋ تۇرىندەگى جازانىڭ وتەلمەگەن بولىگى 3 جىل 3 اي 7 كۇن مەرزىمگە باس بوستاندىعىن شەكتەۋگە اۋىستىرىلدى.