كوروناۆيرۋس اۋرۋحاناسى بولعان Halyk Arena سپورتپەن اينالىسۋ ءۇشىن قايتا اشىلادى

الماتى. قازاقپارات - الماتىداعى Halyk Arena سپورتپەن اينالىسۋ ءۇشىن قايتا اشىلادى.

بۇل تۋرالى مەگاپوليس اكىمى باقىتجان ساعىنتايەۆ «الماتى» تەلەارناسىنداعى تىكەلەي ەفيرى بارىسىندا ايتتى، دەپ حابارلايدى قازاقپارات ءتىلشىسى.

«ك ۆ ي دەرتىن تاۋلىكتىك تىركەۋ سانىنىڭ ازايۋىنا بايلانىستى ءۇشىنشى ەشەلوننىڭ ينفەكسيالىق ستاتسيونارلارىنداعى توسەك-ورىن قىسقارتىلىپ جاتىر. سونىڭ ىشىندە Halyk Arena سپورت كەشەنىندەگى كوۆيد گوسپيتالىنىڭ جۇمىسى توقتاتىلادى. كەلەسى ايدا ونى نەگىزگى پروفيل بويىنشا بۇرىنعى جۇمىس رەجيمىنە قايتارۋ جوسپارلانىپ وتىر»، - دەدى الماتى اكىمى.

سونىمەن قاتار، باقىتجان ساعىنتايەۆ قالاداعى سانيتارلىق-ەپيدەميولوگيالىق احۋالعا توقتالدى.

«9 - قاراشا كۇنى الماتىدا 134 ادامنان كوروناۆيرۋس انىقتالدى. ونىڭ 130 ى سيمپتومدى، 8 ءى - انىقتالماعان پنيەۆمونيا. تاۋلىكتىك ءوسىم - %0,7. رەپرودۋكتيۆتى سانى - 0,88»، - دەدى ول.

باقىتجان ساعىنتايەۆ قالا تۇرعىندارىن كوروناۆيرۋسقا قارسى ەكپە الۋعا شاقىردى.

جاقىندا ريەۆاكسيناتسيا باستالاتىنىنا قاراماستان، كەيبىر قالا تۇرعىندارى ۆاكسينانىڭ العاشقى كومپونەنتىن ءالى العان جوق. قالا اكىمىنىڭ ايتۋىنشا، الماتىلىقتار وزدەرىن جانە جاقىندارىن قورعاۋ ءۇشىن جاۋاپكەرشىلىك تانىتىپ، ۆاكسينا العانى ءجون.