حاكەرلىك شابۋىلعا ۇشىراعان سىرتقى ىستەر مينيسترلىگىنىڭ جۇيەسى تەكسەرىلىپ جاتىر
استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى ەلىمىزدىڭ سىرتقى ىستەر مينيسترلىگىنىڭ جۇيەسى قاۋىپسىزدىگىن جوسپاردان تىس تەكسەرىپ جاتىر. بۇل تۋرالى ۆەدومستۆونىڭ باسپا ءسوز قىزمەتى حابارلادى.
- Infosecurity Magazine سايتىندا تسيفرلىق قاۋىپسىزدىك ماسەلەلەرىمەن اينالىساتىن Sekoia كومپانياسىنىڭ ەسەبىنە سىلتەمە جاساي وتىرىپ، قازاقستان مەن ورتالىق ازيا ەلدەرىندە ستراتەگيالىق ماڭىزدى اقپاراتتى جيناۋ ماقساتىندا كيبەرشابۋىل تۋرالى اقپارات ورنالاستىرىلدى. بۇل كيبەرشابۋىلعا قاتىستى العاشقى ەسەپتى ۋكراينالىق CERT بىلتىر شىلدەدە جاريالادى. ەسەپتە جۇيەنى قاشىقتان باسقارۋ ءۇشىن پايدالانىلعان «HATVIBE» جانە «CherrySpy» زالالدى باعدارلامالارى سيپاتتالعان، - دەيدى مينيسترلىكتىڭ باسپا ءسوز قىزمەتىنەن.
اقپاراتتا ايتىلعانداي، قازاقستان رەسپۋبليكاسىنىڭ سىرتقى ىستەر مينيسترلىگىنە قاتىستى «CherrySpy» جانە «HATVIBE» فايلدارىن پايدالانا وتىرىپ، حاكەرلىك توپتىڭ كيبەرشابۋىلى «مەملەكەتتىك تەحنيكالىق قىزمەت» ا ق 2023-جىلدىڭ ەكىنشى جارتىجىلدىعىنان باستاپ قورعالۋ جاي-كۇيىنىڭ مونيتورينگى بويىنشا جۇرگىزىلەتىن ءىس-شارالار شەڭبەرىندە تىركەلدى.
وسى ورايدا سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەملەكەتتىك تەحنيكالىق قىزمەت اكتسيونەرلىك قوعامىمەن بىرلەسىپ، بىلتىر سىرتقى ىستەر مينيسترلىگىنىڭ اقپاراتتىق قاۋىپسىزدىگىنە تەكسەرۋ جۇرگىزدى.
- جاڭا ءمان-جايعا بايلانىستى ءبىزدىڭ مينيسترلىك سىرتقى ىستەر مينيسترلىگىنە قاتىستى جوسپاردان تىس تەكسەرۋ جۇرگىزۋدى جوسپارلاپ وتىر. ونىڭ ناتيجەسى بويىنشا ءتيىستى شارالار قابىلدانادى، - دەيدى ۆەدومستۆودان.
ەسكە سالا كەتسەك، بىلتىر جازدا ونەركاسىپ جانە قۇرىلىس مينيسترلىگىنە حاكەرلىك شابۋىل جاسالعان ەدى.
