08:58, 19 - اقپان 2021 | GMT +5
قازاقستاندىق دزيۋدوشى Grand Slam تۋرنيرىنىڭ قولا جۇلدەگەرى اتاندى
نۇر-سۇلتان. قازاقپارات - قازاقستاندىق عۇسمان قىرعىزبايەۆ تەل-اۆيۆ قالاسىندا ءوتىپ جاتقان «ۇلكەن دۋلىعا» تۋرنيرىنىڭ قولا جۇلدەگەرى اتاندى، دەپ حابارلايدى قازاقپارات ءتىلشىسى.
قازاقستاندىق دزيۋدوشى 60 كەلىگە دەيىنگى سالماقتاعى قولا جۇلدە ءۇشىن باسەكەدە ۋكراينالىق ارتەم لەسيۋكتى ۆازاري ۇپايىمەن تىزە بۇكتىردى.
دودا بارىسىندا ع. قىرعىزبايەۆ برازيليالىق اللان كۋۆابارانى جەڭدى. شيرەك فينالدا ءازىربايجاندىق داۆۋد ماممادسويعا ەسە جىبەرگەنىمەن، جۇبانىش بەلدەسۋىندە تاتامي يەسى ماتا كوكولايەۆتى قاپى قالدىردى.
بۇل - قازاقستاندىق دزيۋدوشىلاردىڭ جاڭا جىلداعى وسىنداي بايراقتى باسەكەدەگى العاشقى جۇلدەسى.
