فين كومپانيالارى قازاقستاندا وكىلدىك اشىپ، ورتالىق ازيا نارىعىنا شىعا الادى
استانا. KAZINFORM - ەلوردادا قازاقستان-فين ساۋدا-ەكونوميكالىق ىنتىماقتاستىق جونىندەگى كوميسسياسىنىڭ 13-وتىرىسى اياقتالدى. وتكەن جىلى ەكى ەل اراسىنداعى تاۋار اينالىمى 208 ميلليون دوللارعا جەتكەن.
ءوز سوزىندە ق ر ەكولوگيا جانە تابيعي رەسۋرستار ۆيتسە-ءمينيسترى ج. اليەۆ قازاقستان فينليانديانى سولتۇستىك ەۋروپا وڭىرىندەگى نەگىزگى ارىپتەس رەتىندە قاراستىراتىنىن اتاپ ءوتتى.
«ءبىز ەكىجاقتى قاتىناستاردىڭ بارلىق سپەكترى بويىنشا ءوزارا ءىس-قيمىلدى ودان ءارى ارتتىرۋعا مۇددەلىمىز. 2023-جىلى ءبىزدىڭ ەلدەر اراسىندا ەكىجاقتى تاۋار اينالىمى الدىڭعى جىلمەن سالىستىرعاندا 3 پايىزعا ءوسىپ، 208 ميلليون دوللاردى قۇرادى. قازاقستان رەسپۋبليكاسىنان فينلياندياعا ەكسپورت 3 ميلليون دوللاردى، فينليانديادان قازاقستان رەسپۋبليكاسىنا يمپورت 205 ميلليون دوللاردى قۇرادى»، - دەدى ۆيتسە-مينيستر كوميسسيا وتىرىسىندا.
ونىڭ ايتۋىنشا، 2005-جىلدان 2023-جىلدىڭ 3-توقسانى ارالىعىنداعى فينليانديادان قازاقستان رەسپۋبليكاسىنا تىكەلەي ينۆەستيتسيانىڭ جالپى اعىنى 409,5 ميلليون دوللاردى، ال 2023-جىلى - 11,6 ميلليون دوللاردى قۇرادى.
«ەلىمىز ينۆەستيتسيالىق احۋالدى جاقسارتۋ بويىنشا تۇراقتى جۇمىس جۇرگىزىپ جاتىر جانە ينۆەستورلار ءۇشىن جاقسى جاعداي جاسالعان. سونىمەن قاتار، قازاقستان ءىرى ونەركاسىپتىك كاسىپورىندار مەن حالىقارالىق كورپوراتسيالاردى ەلگە كوشىرۋ شارالارىن بەلسەندى جۇزەگە اسىرۋدا. وسىعان بايلانىستى قازاقستانداعى بيزنەس-كليماتتىڭ دايەكتى جاقسارۋى اياسىندا فين بيزنەسى ورتالىق ازيا ءوڭىرىنىڭ نارىعىنا شىعۋ مۇمكىندىگى مەن كوشۋ ءۇشىن جاڭا پلاتفورما الا الادى. جوعارىدا ايتىلعانداردى ەسكەرە وتىرىپ، فين كومپانيالارىن قازاقستاندا ءوز وكىلدىكتەرىن اشۋعا شاقىرامىز»، - دەدى جومارت اليەۆ.
ايتا كەتەيىك، شەتەلدىك دەلەگاتسيا قۇرامىندا فينليانديانىڭ تەڭ ءتوراعاسى-فينليانديانىڭ سىرتقى ساۋدا جانە دامۋ ءمينيسترى ۆيللە تاۆيو، فينليانديا س ءى م رەسەي، شىعىس ەۋروپا جانە ورتالىق ازيا دەپارتامەنتى ديرەكتورىنىڭ ورىنباسارى ميككو كيۆيكوسكي، فينليانديا گەولوگيالىق قىزمەتىنىڭ باس ديرەكتورى كيممو تيليكاينەن بار.
وتىرىس بارىسىندا ەكىجاقتى ىنتىماقتاستىقتى ودان ءارى نىعايتۋ جانە كەڭەيتۋ بويىنشا كەڭ اۋقىمدى ماسەلەلەر تالقىلاندى. ونەركاسىپ، ءبىلىم بەرۋ، كولىك، ەنەرگەتيكا، سونداي-اق ورمان شارۋاشىلىعى سالالارىنداعى ءوزارا ءىس-قيمىلدىڭ قازىرگى جانە پەرسپەكتيۆالىق باعىتتارى قارالدى.
