فۋتبولدان ۇلتتار ليگاسى: قازاقستان جانە گرەكيا كەزدەسۋى قاي ارنادان كورسەتىلەدى

استانا. قازاقپارات - فۋتبولدان ۇلتتار ليگاسى پلەي-وفف ساتىسىنداعى قازاقستان جانە گرەكيا قۇرامالارىنىڭ كەزدەسۋى قاي ارنادان كورسەتىلەتىنى بەلگىلى بولدى.

2024-جىلعى ەۋروپا چەمپيوناتىنىڭ جولداماسى ءۇشىن ەكى قۇراما 21- ناۋرىزدا باق سىنايدى. ويىن 21- ناۋرىزدان 22 نە قاراعان ءتۇنى ساعات 00:35 تە «Qazaqstan» جانە «Qazsport» تەلەارنالارىنان تىكەلەي ەفيردە كورسەتىلەدى.

قازىر ۇلتتىق قۇراما بىرىككەن اراب امىرلىگىنىڭ دۋباي قالاسىندا وقۋ-جاتتىعۋ جيىنىن وتكىزىپ جاتىر.

وقۋ-جاتتىعۋ جيىنى اياسىندا قازاقستاندىق فۋتبولشىلار تۇركىمەنستانمەن وتكەن جولداستىق كەزدەسۋدە قارسىلاسىن 2:0 ەسەبىمەن تىزە بۇكتىردى.

كەيىننەن وقۋ-جاتتىعۋ جيىنىنا باكتيەر زاينۋتدينوۆ پەن ابات ايىمبەتوۆ قوسىلدى.

ايتا كەتسەك، ەل قۇراماسى گرەكياعا 19- ناۋرىزدا اتتانادى.

جەڭگەن جاعدايدا 26- ناۋرىزدا تاعى دا سىرت الاڭدا گرۋزيا-ليۋكسەمبۋرگ جۇبىنىڭ جەڭىمپازىمەن شەبەرلىك بايقاسادى. جەڭىمپاز قۇراما 2024-جىلعى ەۋروپا چەمپيوناتى فينالدىق ساتىسىنا جولداما الادى.

قازاقستاندىق فۋتبولشىلار قۇرلىقتىق دودانىڭ ىرىكتەۋ ساتىسىندا H توبىندا سىنعا ءتۇسىپ، ءۇشىنشى ورىنعا تۇراقتادى. ولار بارلىعى 18 ۇپاي جيناپ، ۇلتتىق قۇرامانىڭ رەكوردىن جاڭارتتى.