فۋتبولدان ەل چەمپيوناتى: «قايرات» كوش سوڭىنداعى «قايساردان» ۇتىلدى

استانا. KAZINFORM - فۋتبولدان پرەمەر-ليگا كوماندالارى اراسىندا قازاقستان چەمپيوناتىنىڭ 6-تۋرىندا قىزىلوردانىڭ «قايسارى» ءوز الاڭىندا الماتىنىڭ «قايراتىن» قابىلدادى.

الماتىلىقتار بۇعان دەيىن توپ باستاۋشىلاردىڭ قاتارىندا بولسا، قىزىلوردالىقتار كوش سوڭىندا ەدى.

ءبىرىنشى تايم تەڭ جاعدايدا وتكەنىمەن، ەكىنشى كەزەڭدە جيىرەك شابۋىلداعان الماتىلىقتار ءوز مۇمكىندىكتەرىن پايدالانا المادى. ەسەسىنە 94-مينۋتتا «قايراتتىڭ» قاقپاشىسى دانيل ۋستيمەنكو دوپتى ۋىسىنان شىعارىپ العاننان كەيىن ايبار جاقسىلىقوۆ جەڭىس گولىن سوعىپ كەتتى - 1:0.

«قايرات» 8 ۇپايمەن تۋرنير كەستەسىندە 6-ورىندا قالسا، «قايسار» (4 ۇپاي) 12-ساتىدا تۇر.

جەكسەنبى كۇنى «ەلىماي» (سەمەي) - «ورداباسى» (شىمكەنت) جانە «جەتىسۋ» - «اقتوبە» ماتچتارى وتەدى.

ەسكە سالا كەتەيىك، بۇدان بۇرىن فۋتبولدان قازاقستان چەمپيوناتىندا «استانانىڭ» ەكىنشى ورىنعا كوتەرىلگەنىن جازعان بولاتىنبىز.