فەستيۆال كەزىندە 46 ادام سۋعا باتىپ كەتتى

استانا. KAZINFORM - ءۇندىستاننىڭ شىعىسىنداعى بيحار شتاتىندا بالالاردىڭ يگىلىگىنە ارنالعان ءۇش كۇندىك فەستيۆال كەزىندە كەم دەگەندە 46 ادام وزەنگە اعىپ كەتتى. ولاردىڭ 37 ءسى بالا، 7 ءى ايەل.

بۇل تۋرالى Hindustan Times باسىلىمىنا سىلتەمە جاساپ بەلتا اگەنتتىگى حابارلادى.

باسىلىمنىڭ مالىمەتىنشە، جىل سايىنعى «جيۆيتپۋتريكا ۆرات» فەستيۆالى نەگىزىنەن ءۇندىستاننىڭ سولتۇستىگىندە جانە نەپالدىڭ ءبىر بولىگىندە تويلانادى. مەرەكەدە ايەلدەر 24 ساعات بويى ورازا ۇستاپ، بالالارىنىڭ ۇزاق ءومىر ءسۇرۋى مەن دەنساۋلىعى ءۇشىن ارنايى دۇعالار وقيدى. ورازا كەزىندە انالار كەيدە بالالارىمەن بىرگە جەرگىلىكتى وزەن-توعاندارعا شومىلۋعا بارادى. ءۇندىستاننىڭ سولتۇستىگىندەگى جەرگىلىكتى بيلىك ادەتتە فەستيۆال كەزىندە پوليتسيا قىزمەتكەرلەرىن ورنالاستىرادى. الايدا بيىلعى فەستيۆال كەزىندە بيحار شتاتىندا قانداي قاۋىپسىزدىك شارالارى قابىلدانعانى بەلگىسىز.

ءۇندىستاندا ءدىني مەرەكەلەر كەزىندە جاپپاي سۋعا باتىپ كەتۋدەن باسقا كوپتەگەن ءولىم-ءجىتىم ورىن الاتىنى اتاپ ءوتىلدى. جەرگىلىكتى پوليتسيا قىزمەتكەرىنىڭ ايتۋىنشا، شتاتتىڭ 15 اۋدانىنداعى ءارتۇرلى وزەن مەن توعانداردا ادام ءولىمى تىركەلگەن. اتاپ ايتقاندا، اۋرانگاباد اۋدانىنىڭ ەكى اۋىلىندا كامەلەتكە تولماعان سەگىز بالا سۋعا باتىپ كەتكەن. جەرگىلىكتى تۇرعىندار سوڭعى كۇندەرى تولاسسىز جاۋعان جاۋىن-شاشىن سالدارىنان وزەندەر مەن توعاندارداعى سۋ دەڭگەيى كوتەرىلگەنىن حابارلادى. ءبىراق فەستيۆالگە قاتىسۋشىلار بۇعان ءمان بەرمەگەن جانە بالالاردىڭ جاپپاي سۋعا كەتۋىنە باستى سەبەپ وسى ەكەنى ايتىلۋدا.

بيحار شتاتىنىڭ شەنەۋنىكتەرى زارداپ شەككەن ءاربىر وتباسىنا وتەماقى تولەنەتىنىن مالىمدەدى.