فريستايلدان الەم كۋبوگىنىڭ كەزەڭى شىمبۇلاقتا وتەدى
كەلەسى جىلى 8-10- ناۋرىز كۇندەرى موگۋل جانە شاڭعى اكروباتيكاسى بويىنشا الەم كۋبوگىنىڭ كەزەڭى «شىمبۇلاق» تاۋ-شاڭعى كۋرورتىندا وتەدى، دەپ حابارلايدى Kazinform.
«بىزدە الەم كۋبوگىنىڭ كەزەڭدەرى ۇنەمى ءوتىپ تۇرادى. ءبىز سونداي-اق بۇل جەردە فريستايلدان الەم چەمپيوناتىن وتكىزگەنبىز. مەن بارلىق جانكۇيەرلەردى ءبىزدىڭ سپورتشىلاردى بەلسەندى تۇردە قولداۋعا شاقىرعىم كەلەدى. ءبىزدىڭ سپورتشىلار بۇگىنگى كۇنى كۋبوكتىڭ باسقا كەزەڭدەرىندە قاتىسىپ ءجۇر. ولار ماقتانا الارلىقتاي جەتىستىكتەرى بار. فريستايلشى اناستاسيا گورودكو بۇعان دەيىن كۇمىس مەدالگە يە بولعان، وتكەن ماۋسىمدا پاۆەل كولماكوۆ فريستايلدان الەم كۋبوگىنىڭ ۇيدەگى فينالدىق كەزەڭىندە ەكىنشى ورىن العان»، - دەدى «شىمبۇلاق» تاۋ-شاڭعى كۋرورتىنىڭ كوممەرتسيالىق ديرەكتورى ۆاسيليي پودكورىتوۆ تاۋ-شاڭعىسى ماۋسىمىنىڭ اشىلۋ سالتاناتىندا.
«شىمبۇلاق» تاۋ-شاڭعى كۋرورتىنىڭ ديرەكتورى رينات ءابدىراحمانوۆ فريستايل جارىسى قازاقستاندا العاش رەت 2019-جىلى وتكەنىن ايتتى. ءارى سول كەزدە الەم كۋبوگىنىڭ كەزەڭدەرى ۇنەمى ءوتىپ تۇرۋى كەرەك دەپ شەشىلگەن ەدى. حالىقارالىق شاڭعى جانە سنوۋبورد فەدەراتسياسى (FIS) تاراپىنان بەلگىلى ءبىر تەحنيكالىق تالاپتار قويىلعان.
«تالاپتار كۋرورتقا، قار شاشۋ جۇيەسى مەن اسپالى جولعا قاتىستى بولدى. ءبىز ونىڭ بارلىعىن ورىندادىق. بۇل شارا سونداي- اق جىل سايىن FIS كۇنتىزبەسىنە ەنەدى. ودان بولەك، ءبىزدىڭ ماماندار تەحنيكالىق دەلەگات بولۋ ءۇشىن 2021-جىلدان باستاپ FIS مەكتەپتەرىندە ءبىلىم الادى. كەلەسى جىلى ءبىز قازاقستاننان شىققان ەكى دەلەگاتقا قۇرمەت كورسەتەتىن بولامىز. ولار تەك قازاقستاندا عانا ەمەس، الەم ەلدەرىندە وتەتىن جارىستاردى وتكىزىپ، ۇيىمداستىرىپ، ولارعا تورەلىك ەتەتىن بولادى»، - دەدى رينات ءابدىراحمانوۆ.
ول سونداي-اق بيىل جەلتوقسان ايىندا شاڭعى اكروباتيكاسى بويىنشا الەم كۋبوگىنىڭ كەزەڭى نە سەبەپتى وتپەيتىنىن ءتۇسىندىردى. رينات ءابدىراحمانوۆ وتكەن جىلى بۇل ماسەلە بويىنشا FIS- پەن كەلىسسوزدەر ءجۇرىپ جاتقانىن ايتقان.
«ءبىزدىڭ راسىمەن جەلتوقسان ايىندا شاڭعى اكروباتيكاسى بويىنشا، ناۋرىز ايىندا موگۋل بويىنشا الەم كۋبوگىنىڭ كەزەڭىن وتكىزۋ تۋرالى ويىمىز بولعان. ءبىراق اۋا رايى قولايسىز بولا ما دەپ قورىقتىم. وكىنىشكە قاراي بيىل قىس كەش كەلدى ءارى جىلى بولىپ تۇر. بيىل بۇل شارانى وتكىزە الماۋشى ەدىك جانە ودان باس تارتۋعا تۋرا كەلۋشى ەدى... قازىر ونى اقپان ايىنا اۋىستىرۋ ماسەلەسىن تالقىلاپ جاتىرمىز. قاڭتار ايىندا كوميسسيا وتىرىسى وتەدى، وندا 2025-جىلدىڭ كۇنتىزبەسى تالقىلانادى. بۇل رەتتە اقپان ايىندا شاڭعى اكروباتيكاسى بويىنشا، ناۋرىز ايىندا موگۋل بويىنشا الەم كۋبوگىنىڭ كەزەڭى ءوتۋى ءتيىس»، - دەدى سپيكەر.
ەسكە سالايىق، وتكەن ماۋسىمنىڭ 17-19- ناۋرىز كۇندەرى موگۋل جانە شاڭعى اكروباتيكاسى بويىنشا الەم كۋبوگىنىڭ فينالدىق كەزەڭى «شىمبۇلاق» كۋرورتىندا ءوتتى. جارىسقا الەمنىڭ 14 ەلىنەن سپورتشىلار قاتىستى. ول كەزدە قازاقستاندىق پاۆەل كولماكوۆ كۇمىس جۇلدەنى، ال جانبوتا الدابەرگەنوۆا 6-ورىندى يەلەنگەن ەدى.
سونداي-اق وتكەن ماۋسىمدا شىمبۇلاقتا موگۋلعا ارنالعان «سۋحوي لوگ» جاڭا تراسساسى اشىلعان بولاتىن.
ايتا كەتەيىك، فريستايلدان الەم كۋبوگىنىڭ كەزەڭدەرى 1980-جىلدان باستاپ حالىقارالىق شاڭعى فەدەراتسياسىنىڭ (FIS) قولداۋىمەن جىل سايىن ءوتىپ كەلە جاتقان جارىستار. وعان اۋستريا، اۋستراليا، ۇلى بريتانيا، گەرمانيا، نورۆەگيا، يتاليا، ا ق ش، كانادا، جاپونيا، شۆەتسيا، شۆەيتساريا، فينليانديا، قازاقستان جانە باسقا دا ەلدەردىڭ ەڭ مىقتى سپورتشىلارى قاتىسادى.
