فرانسيانىڭ مۇراجايلارى مەن كىتاپحانالارى العاش رەت ەجەلگى قازاق مەملەكەتىن زەرتتەۋگە كومەكتەسپەك
ستراسبۋرگتاعى قازاقستاننىڭ باس كونسۋلدىعىنىڭ قولداۋمەن لوتارينگيا مۇراجايى العاش رەت قازاق مەملەكەتى تۋرالى زەرتتەۋ ءۇشىن XVI عاسىردىڭ سيرەك كەزدەسەتىن گلوبۋسىن، ال ستراسبۋرگتىڭ ۇلتتىق كىتاپحاناسى قازاقتاردىڭ تاريحى تۋرالى ورتاعاسىرلىق اتلاستار مەن كارتالاردى كورسەتپەك، دەپ حابارلايدى قازاقپارات.

ق ر سىرتقى ىستەر مينيسترلىگىنىڭ مالىمەتىنشە، مۇراجاي فرانسيانىڭ شىعىسىندا نانسي قالاسىندا، لوتارينگيا گەرتسوگتارىنىڭ تاريحي سارايىندا ورنالاسقان. كارتوگرافيا كونتەكستىندە مۇراجايدىڭ باستى اسىل تاسى - «نانسي گلوبۋسى»، گەرتسوگ كارل IV تاپسىرىسى بويىنشا كۇمىس پەن التىننان ورتاعاسىرلىق كۋبوگى تۇرىندە جاسالعان. ونىڭ سىرتىندا سول كەزدەگى ەۋروپالىقتارعا بەلگىلى مالىمەتتەر مەن جاڭالىقتارعا نەگىزدەلگەن تۇبەگەيلى گەوگرافيالىق سيپاتتاماسى بار.
مۇراجاي جادىگەرىنىڭ ساقتاۋشىسى پەرر-يپپوليت پەنە، باس كونسۋل انۋاربەك احمەتوۆپەن جانە قازاق عالىمى مۇحيت-ارداگەر سىدىقنازاروۆپەن اڭگىمەلەسۋ بارىسىندا عىلىمي جانە مادەني تۇرعىدان قازاقستانمەن ىنتىماقتاستىققا دايىندىعىن ءبىلدىردى.
«ءبىزدىڭ الماسۋلارىمىز ناتيجەلى بولادى دەپ ۇمىتتەنەمىز. تاريح پەن مادەنيەت تۋرالى ودان دا كوپ ءبىلىم بەرۋ ارقىلى ءبىز مۇراجايلاردا بار بىرەگەي ارتەفاكتىلەر مەن جاۋھارلاردى تانىمال ەتە الامىز دەپ سەنەمىز. ءبىز ىنتىماقتاستىققا دايىنبىز جانە اشىقپىز. سيرەك گلوبۋسىمىز ءسىزدىڭ ەلىڭىزدىڭ بىرەگەي تاريحىن ايقىن كورسەتۋگە جانە قازاقتاردىڭ نازارىن اۋدارۋعا مۇمكىندىك بەرەتدى»، - دەدى پ. پەنە.
فرانسياداعى ماڭىزدىلىعى مەن كىتاپ قورى بويىنشا ەكىنشى ورىندا تۇرعان XVI- XVIII عاسىرلارداعى بىرەگەي اتلاستارى مەن كارتالارى بار ستراسبۋرگتىڭ ۇلتتىق كىتاپحاناسى ءبىزدىڭ عالىمدار مەن ديپلوماتتار ءۇشىن قازاق مەملەكەتىنىڭ گەوگرافيالىق ورنالاسۋى، ونىڭ ايماقتاعى ساياسي جانە ەكونوميكالىق ىقپالى تۋرالى قۇندى مالىمەتتەردى قامتيتىن ءوز قويمالارىن اشتى. ەۋروپا ورتالىعىندا ەجەلگى جول قيىلىسىندا ورنالاسقان ستراسبۋرگ كىتاپحاناسىندا قۇندى كىتاپتار مەن ارتەفاكتىلەردىڭ باي جيناقتاماسى بار.
كىتاپحانانىڭ عىلىمي ساياسات جانە حالىقارالىق ىنتىماقتاستىق جونىندەگى ديرەكتورى كريستوف ديدە قازاقستانعا تاريحىن زەرتتەۋگە جاردەمدەسۋ ۇلكەن مارتەبە ەكەنىن ايتىپ، عىلىمي، مادەني جانە گۋمانيتارلىق بايلانىستاردى دامىتۋعا قىزىعۋشىلىق ءبىلدىردى.
«ءبىز قازاقستانمەن بىرلەسكەن جوبالاردى قاراستىرۋعا دايىنبىز جانە كەلەشەكتە دە ىنتىماقتاستىعىمىز ارتا تۇسەدى دەگەن ۇمىتتەمىز. سىزدەرگە پايدالى بولاتىن كىتاپحانانىڭ بىرەگەي تاريحى مەن ۇلكەن الەۋەتى بار»، - دەپ اتاپ ءوتتى ك. ديدە.