فرانسياداعى شەنەۋنىك قازاق قىزىنىڭ اكەسى تەرى يلەپ، اناسى مەيرامحانادا جۇمىس ىستەيدى

 ەتنيكالىق قازاق ەسىم ساباش فرانسيانىڭ كرەي قالاسىندا تۇرادى. وسى قالا مەرىنىڭ ورىنباسارى. نەگىزىنەن قالانىڭ مادەنيەت سالاسىنا جاۋاپتى.

اتاجۇرتقا العاش تابانى تيگەن فرانسيانىڭ ساياسي قىزمەتكەرىمەن از- كەم تىلدەسىپ، ديدارلاسۋدىڭ ءساتى ءتۇستى.

- ەسىم حانىم، ءوزىڭىزدى تەرەڭىرەك تانىستىرساڭىز، فرانسيادا ومىرگە كەلدىڭىز عوي.

- ءبىزدىڭ اتا- بابالارىمىز 1920 -جىلدارداعى ۇركىن كەزىندە باس ساۋعالاپ گيمالاي اسىپ، اۋعانستان، يران ارقىلى تۇركيادان تۇراق تاپقان ەكەن. كەيىن اكەلەرىمىز فرانسياعا قونىس اۋدارعان. قىتايداعى قازاقتارعا قورعان، تىرەۋ بولعان زۋقا باتىر مەنىڭ تىكەلەي ناعاشى بابام. انام سول كىسىنىڭ ۇرپاعى. اكەم تەرى ءوندىرۋ ىسىمەن شۇعىلدانادى، انام مەيرامحانادا قىزمەت اتقارادى. ۇيدە ءۇش اعايىندىمىز. ءوزىم 17 جاسىمنان باستاپ ساياسات سالاسىنا ارالاسىپ قىزمەت اتقارىپ كەلەمىن.

- كرەي قالاسىندا قانشا قازاق بار؟

- كرەي قالاسىندا قازاقتار جوق، پاريج قالاسىندا قازاق دياسپوراسى بار. ءبىز ءجيى باس قوسىپ، ءتۇرلى مەرەكەلىك جيىنداردا جينالىپ تۇرامىز. ءبىزدىڭ ءتۇپ تامىرىمىز قازاقستانمەن تىكەلەي بايلانىستى ەكەنىن ەشقاشان ۇمىتپايمىز. سوندىقتان دا پاريج قالاسىنداعى قازاق دياسپوراسىنداعى قانداستارىمىزبەن ءجيى- ءجيى باس قوسىپ، ءتۇرلى مەيرام ۇيىمداستىرىپ، قازاقتىڭ ۇلتتىق تاعامدارىن ازىرلەپ جينالامىز. سپورتتىق، مادەني شارالار ءجيى ۇيىمداستىرىلادى. ەۋروپا قۇرلىعىنداعى قازاق ديسپورالارى دا ۇنەمى باس قوسامىز. مۇنداعى ماقسات ءوزىمىزدىڭ قازاقى بولمىسىمىزدان اجىراپ قالماۋدىڭ قامى. مەنىڭ اكەم فرانسياعا 1980 -جىلى تۇركيادان كوشىپ بارعان ەكەن، انامىز 1990 -جىلى قونىس اۋدارىپتى تۇركيادان وسى ەلگە. مەن فرانسيادا ومىرگە كەلدىم، وقۋدى وسى ەلدە اياقتادىم. فرانسۋز، تۇرىك، اعىلشىن تىلدەرىندە ەركىن سويلەيمىن. وكىنىشكە قاراي، قازاق ءتىلىن ءبىزدىڭ بۋىن جەتە بىلمەيدى. قازاقستانمەن تىعىز بايلانىس ورناتىپ، بارىس- كەلىستى جيىلەتۋ انا ءتىلىمىزدى ۇيرەنۋگە سەپتىگى تيەدى دەپ ويلايمىن. مىسالى جۋىردا استانا قالاسىندا وتكەن «وتانداستار - 2023» فورۋمىنا قاتىسۋ ءۇشىن قازاقستانعا العاش رەت كەلدىم. وتە ەرەكشە اسەر الدىم. كەلەشەكتە دە ءجيى كەلىپ تۇرامىن. قازاقستان دەگەندە مەنىڭ كوز الدىما بايتاق دالا، الىپ تاۋلار، ءورىستى دۇبىرگە بولەگەن جىلقىلار ەلەستەيتىن. استانا قالاسىنا كەلگەنىمدە ەرەكشە تولقىدىم. تاۋەلسىزدىگىن جاريالاعانىنا 30 جىلدان ەندى اسقان جاس مەملەكەتتىڭ كەلەشەگى كەمەل دەپ ويلايمىن. بولاشاقتىڭ تۇتقاسى - ءبىلىمدى ۇرپاق. سوندىقتان دا ءتىل ۇيرەنىپ، وركەنيەتتىڭ كوشىنەن قالماۋ ءۇشىن ءبىلىم الۋ ماڭىزدى دەر ەدىم. اتامەكەنىمىز قازاقستان كەلەشەكتە كوركەيە تۇسەدى دەپ سەنەمىن.

- استاناداعى فورۋم اياسىندا دەلەگاتسيا مۇشەلەرى پارلامەنت ماجىلىسىندە دەپۋتاتتارمەن كەزدەستى. وسى جيىندا ءوزىڭىز دە بولدىڭىز.

- ءيا، مەن دە كرەي قالاسى باسشىسىنىڭ مادەنيەت سالاسىنا جاۋاپتى ورىنباسارى لاۋازىمىنا تاعايىندالعانعا دەيىن دەپۋتاتتىق مانداتتى اتقارعانمىن. قازاقستانداعى دەپۋتاتتارمەن جۇزدەسىپ، جۇمىس بارىسىمەن تانىستىق. كىتاپحانادا دەپۋتتارمەن كەزدەسۋ دە اسەرلى بولدى. فرانسيادا قالا اكىمدەرىن جەرگىلىكتى تۇرعىندار داۋىس بەرۋ ارقىلى سايلايدى. اكىم ءوزىنىڭ ورىنباسارىن ءوزى تاعايىندايدى. ءار سالا بويىنشا جەكە ورىنباسارلارى بار. مەنى مادەنيەت سالاسى بويىنشا ورىنباسارلىققا بەكىتتى. ءبىزدىڭ اتقاراتىن جۇمىسىمىز مەملەكەتتىك قىزمەت سانالمايدى، ساياسي لاۋازىم دەپ اتالادى.

قۋانىش نۇردانبەك ۇلى

egemen.kz