فرانسيا پرەزيدەنتى پاۆەل دۋروۆتىڭ ۇستالۋىنا قاتىستى پىكىر ءبىلدىردى

پاريج. KAZINFORM - فرانسيا پرەزيدەنتى ەممانۋەل ماكرون Telegram نەگىزىن قالاۋشى پاۆەل دۋروۆتى ۇستاۋعا قاتىستى مالىمدەمە جاسادى.

بۇل - فرانسۋز بيلىگىنىڭ العاشقى قوعامدىق پىكىرى.

- مەن پاۆەل دۋروۆ قاماۋعا الىنعاننان كەيىن فرانسيا تۋرالى جالعان اقپاراتتى وقىپ جاتىرمىن. فرانسيا ءسوز جانە كوممۋنيكاتسيا ەركىندىگىنە، يننوۆاتسيا مەن كاسىپكەرلىككە بۇرىنعىدان دا كوبىرەك ەركىندىك بەرگەن. سولاي بولىپ قالا بەرەدى، - دەپ جازدى ماكرون X الەۋمەتتىك جەلىسىندە.

Je lis ici de fausses informations concernant la France suite à l’arrestation de Pavel Durov.

La France est plus que tout attachée à la liberté d’expression et de communication, à l’innovation et à l’esprit d’entreprise. Elle le restera.

Dans un État de droit,…

— Emmanuel Macron (@EmmanuelMacron) August 26, 2024

دۋروۆتىڭ فرانسيادا ۇستالعانى 25-تامىزعا قاراعان ءتۇنى بەلگىلى بولدى. فرانسۋز اقپارات قۇرالدارىنىڭ حابارلاۋىنشا، دۋروۆ باكۋدەن جەكە ۇشاعىمەن كەلگەن لە-بۋرجە اۋەجايىندا ۇستالعان.

- زاڭ ۇستەمدىگى جاعدايىندا، ناقتى ومىردەگى سياقتى الەۋمەتتىك جەلىلەردە ازاماتتاردى قورعاۋ جانە ولاردىڭ نەگىزگى قۇقىقتارىن ساقتاۋ ءۇشىن بوستاندىقتار زاڭمەن بەلگىلەنگەن شەڭبەردە جۇزەگە اسىرىلادى. فرانسيادا Telegram باسشىسىن قاماۋعا الۋ - جۇرگىزىلىپ جاتقان سوت تەرگەۋى اياسىندا ورىن الدى. بۇل ساياسي شەشىم ەمەس. شەشىمدى سۋديالار قابىلدايدى، - دەپ قوستى فرانسيا پرەزيدەنتى.

Telegram نەگىزىن قالاۋشىسىندا رەسەيمەن قاتار فرانسيا ازاماتتىعى دا بار. سونداي-اق ونىڭ سەنت-كيتس پەن نەۆيس ارالدى مەملەكەتى، سونداي-اق Telegram شتاب-پاتەرى ورنالاسقان ب ا ءا ازاماتتىعى بار ەكەنى حابارلاندى.

فرانسۋزدىق TF1 تەلەارناسىنىڭ حابارلاۋىنشا، دۋروۆ فرانسيادا ىزدەۋدە جاريالانعاننان كەيىن، ءبىراز ۋاقىتقا دەيىن ەلگە بارۋدان باس تارتقان. ونىڭ بۇل جولى فرانسياعا نە ءۇشىن بارعانى بەلگىسىز.

ايتا كەتەيىك، Telegram پاۆەل دۋروۆتىڭ ۇستالۋىنا بايلانىستى مالىمدەمە جاسادى.

سوت پاۆەل دۋروۆتىڭ قاماۋداعى مەرزىمىن ۇزارتتى.

اۆتور
جاراسقان نۇرىبايەۆ