فرانسيا قازاقستاندى ەۋروپا حالقىنا تانىستىرا باستادى
L’essentiel des Relations Internationales جۋرنالىنىڭ بۇگىنگى شىعارىلىمى - قازاق-فرانسۋز قارىم-قاتىناسىنىڭ دامۋىنا كۇمانسىز ۇلەس. مۇنداي پىكىردى ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ باس ساراپشىسى ءادىل كاۋكەنوۆ ايتتى، دەپ حابارلايدى Kazinform.
«فرانسيا پرەزيدەنتى ەممانۋەل ماكروننىڭ بيىل قاراشاداعى قازاقستانعا ساپارى كەزىندە قىتايدىڭ جاڭالىقتار قىزمەتىنە بەرگەن سۇحباتىمدا قازاق-فرانسۋز قارىم-قاتىناسى جايلى ءبىرقاتار تەزيس ۇسىنعان ەدىم. سول جايىندا ەسكە سالايىن. بىرىنشىدەن، فرانسيا - قازاقستانمەن ستراتەگيالىق ىنتىماقتاستىق تۋرالى شارتقا قول قويعان ءبىرىنشى ەۋروپالىق ەل بولدى. قازىرگى ۋاقىتتا گەوساياساتتا داۋىل سوعىپ تۇر. ءبىراق وسىنداي جاعدايدا فرانسيا پرەزيدەنتى ماكروننىڭ ساپارى قازاقستانمەن قارىم-قاتىناستىڭ جوعارى دەڭگەيىنىڭ كورسەتكىشىنە اينالدى. ءدال وسى وتكەن ساپاردىڭ تاريحي ميسسياسىن بىلدىرەدى. ەكىنشىدەن، ەۋروپا ساياساتكەرلەر مەن ءىرى بيزنەستى ەسەپكە الماساق، قازاقستان جانە بۇكىل ورتالىق ازيا جايلى ازىرشە وتە از بىلەدى. ءبىز فرانسۋز ادەبيەتى مەن تاريحىن بىلگەنىمىزبەن، فرانسۋزدار قازاقستاندىق مادەنيەتتىڭ جانە جالپى بۇكىل ەلىمىزدىڭ جەتىستىكتەرى جايلى بىلە بەرمەيدى. ارينە، بۇل ايتارلىقتاي اقپاراتتىق تەڭگەرىمسىزدىكتى قالىپتاستىرادى جانە قازاقستاننىڭ ەۋروپاداعى مۇمكىندىكتەرىن شەكتەيدى»، - دەپ جازدى ءادىل كاۋكەنوۆ Facebook پاراقشاسىندا.
دەگەنمەن ساراپشى ەممانۋەل ماكروننىڭ استاناعا سوڭعى ساپارى جاعدايدى وزگەرتە باستاعانىن تىلگە تيەك ەتتى.
«L’essentiel des Relations Internationales جۋرنالىنىڭ بۇگىنگى شىعارىلىمى قازاقستانعا ارنالدى. بۇكىل فرانسيادا، موناكودا، بەلگيادا، ليۋكسەمبۋرگتە جانە فرانكوتىلدەس افريكا ەلدەرىندە ساتىلاتىن بۇل باسىلىم حالىقارالىق ساياساتقا ماشىقتانعان. بۇكىل الەمدە 300 ميلليوننان استام ادام انا ءتىلى نەمەسە مەملەكەت ءتىلى رەتىندە فرانسۋز تىلىندە سويلەيدى. ياعني، قازاقستان تۋرالى اقپارات وسىناۋ ۇلكەن نارىققا كاسىبي تۇرعىدا ىلگەرىلەيدى. بۇل - ەلىمىز ءۇشىن ءبىرشاما جاعىمدى جاڭالىق. جۋرنالدا قاسىم-جومارت توقايەۆ پەن ەممانۋەل ماكروننىڭ كەزدەسۋ قورىتىندىسى بويىنشا ساراپتاما، قازاقستان جايلى جالپى اقپارات جانە قازاقستاندىق مينيسترلىكتەر مەن مەملەكەتتىك كومپانيالاردىڭ توپ-مەنەدجەرلەرىمەن ءبىرقاتار سۇحبات باسىلعان»، - دەدى ول.
ساراپشى ەندىگى ۋاقىتتا ەۋروپادا قازاقستان، جالپى ورتالىق ازيا تۋرالى اقپارات تاپشىلىعى قىسقارىپ، ىنتىماقتاستىق ءۇشىن زور مۇمكىندىكتەر اشىلاتىنىن ايتادى.
«مەملەكەت باسشىلارى اراسىنداعى كەزدەسۋ قورىتىندىسى تەك قانا بىرلەسكەن مالىمدەمە ەمەس، ءدال وسىلاي ازاماتتارعا پايدالى اقپاراتتاردى ىلگەرىلەتۋ دە بولۋى ءتيىس. L’essentiel des Relations Internationales جۋرنالىنىڭ بۇگىنگى شىعارىلىمى - قازاق-فرانسۋز قارىم-قاتىناسىنىڭ دامۋىنا كۇمانسىز ۇلەس»، - دەدى ءادىل كاۋكەنوۆ.
بۇعان دەيىن اتالعان جۋرنالدا مەملەكەتتىك كەڭەسشى ەرلان قاريننىڭ «قازاقستاننىڭ جاسامپاز كۇنتارتىبى» دەپ اتالاتىن ماقالاسى جاريالانعانىن جازعان ەدىك.
