Forbes تىزىمىنە ەنگەن 17 جاستاعى اسپاز تابىس قۇپياسىن اشتى

ول التى جىلدا YouTube ارقىلى 33 مىڭ دوللارعا جۋىق تابىس تاپقان. حالىقارالىق اسپازدار كۇنىنە وراي Kazinform ءتىلشىسى «يۋنىي پوۆاردىڭ» جەتىستىك سىرىن ءبىلدى.

- اسپازدىققا قىزىعۋشىلىعىڭىز قالاي باستالدى؟ كاسىبي اسپاز بولۋعا كىم شابىت بەردى؟

- مەن الماتىدا تۋىپ-ءوستىم. ءۇش اعام بار، وتباسىنداعى كەنجەسىمىن. اسپازدىققا 11 جاسىمدا قىزىعا باستادىم. ماعان تۇركيالىق اسپازدار بۋراك وزدەمير مەن نۋسرەت گوكچە شابىت بەردى. ولاردىڭ جۇمىسىن Instagram جەلىسىنەن ءجيى باقىلايمىن. «راتاتۋي» مۋلتفيلمى دە قىزىعۋشىلىعىمدى وياتتى.

العاش دايىنداعان تاعامىم - قاراپايىم جۇمىرتقا. ال تۇسىرگەن العاشقى بەينەروليگىم «ناپولەون» تورتىنىڭ رەتسەپتىنە ارنالدى. دامۋىما اعام دياس دەم بەردى.

- تاڭداۋىڭىزعا الەۋمەتتىك كوزقاراس كەدەرگى بولعان جوق پا؟ قوعامدا اس ازىرلەۋدى ءالى دە ايەلدىڭ مىندەتى سانايتىندار بار...

- بۇل - ەسكىرگەن تۇسىنىك. تاماق ءپىسىرۋ - ءار ادامعا قاجەت داعدى. مەن ءۇشىن اس ازىرلەۋ - شىعارماشىلىق، ودان ءلاززات الامىن.

قۇرداستارىمنان، ءتىپتى مەنەن كىشى بالالاردان دا ءجيى حابارلاما الامىن. ولار رەتسەپتتەرىم بويىنشا تاعام دايىنداپ كورگەنىن نەمەسە مەنىڭ ۆيدەولارىمنان كەيىن بلوگ جۇرگىزۋگە قىزىققانىن جازادى. بۇل مەنى قۋانتادى.

- قازىر ەرەكشە تاعامدار مەن اۋقىمدى اس ازىرلەۋگە باسىمدىق بەرەسىز. كونتەنت باعىتىن وزگەرتۋگە نە سەبەپ بولدى؟

- اۋديتوريا وسكەن سايىن باسقا فۋد-بلوگەرلەردەن ەرەكشەلەنىپ، ءوز قولتاڭبامدى قالىپتاستىرعىم كەلدى. سوندىقتان ەرەكشە تاعامدار ازىرلەپ، ولاردى اسەرلى ۇسىنۋعا تىرىسامىن. كەيدە وتە ۇلكەن كولەمدە اس دايىندايمىن. مۇنداي ۆيدەولار كورەرمەندەرگە قىزىق.

سونىمەن قاتار اتا-اناما ارناپ داستارقان جايعاندى جاقسى كورەمىن. جاقىندارىڭا قامقور بولىپ، ولاردى قۋانتۋ كەرەگىن كورسەتكىم كەلەدى. مەن ءۇشىن وتباسىلىق قۇندىلىقتاردى ناسيحاتتاۋ ماڭىزدى.

- الەۋمەتتىك جەلىدەگى تانىمالدىقتى كاسىبي اسپازدىقپەن قالاي ۇشتاستىرىپ ءجۇرسىز؟ بولاشاقتا شەف-اسپاز بولۋ ءۇشىن قانداي قادام جاساماقسىز؟

- بۇل - مەنىڭ ۇلكەن ارمانىم. جاقىندا Narxoz ۋنيۆەرسيتەتىنە «مەيرامحانا ءىسى جانە قوناقۇي بيزنەسى» ماماندىعىنا وقۋعا ءتۇستىم. مەيرامحانا بيزنەسىنىڭ ىشكى قۇرىلىمىن ءتۇسىنىپ، وسى سالادا ساپالى ءبىلىم العىم كەلەدى.

الداعى جوسپارىم - تاجىريبەلى رەستوراتوردىڭ قاسىندا ءجۇرىپ، ودان تاجىريبە جيناقتاۋ. كوماندانى قالاي باسقاراتىنىن، شەشىمدەردى قالاي قابىلدايتىنىن، قيىندىقتاردى قالاي شەشەتىنىن كورگىم كەلەدى. ناقتى تاجىريبە جيناۋ جەكە جوبامدى اشۋعا كومەكتەسەدى. بولاشاقتا ءوز مەيرامحانامدى اشۋدى جوسپارلاپ وتىرمىن.

- قازاق اسحاناسىن شەتەلدىك اۋديتورياعا تانىستىرۋ مۇمكىندىگى بولسا، قانداي ءۇش تاعامدى تاڭدار ەدىڭىز؟

- ءبىرىنشى كەزەكتە بەسبارماقتى ۇسىنار ەدىم. ونى ۇلكەن كولەمدە دايىنداپ، ەتتى قايناتۋدان باستاپ، تۇزدىق ازىرلەۋ مەن قامىر جايۋعا دەيىنگى پروتسەستى كورسەتكىم كەلەدى.

ەكىنشى تاعام -باۋىرساق. ونى ۇلپىلدەك، قىزارعان كۇيىندە ءپىسىرىپ، ىستىقتاي ءۇي قايماعىمەن ۇسىنار ەدىم. ءۇشىنشىسى - قوي ەتىنەن جاسالعان سىرنە.

- YouTube ارناڭىز العاشقى ءۇش جىلدا تابىس اكەلمەگەن. سوعان قاراماستان، جۇمىستى جالعاستىرۋعا نە كۇش بەردى؟

- 11 جاسىمدا مونەتيزاتسيا تۋرالى ويلاعان جوقپىن. مىڭداعان ادامنىڭ رەتسەپتىم بويىنشا تاعام دايىنداپ، جىلى پىكىر جازعانى مەن ءۇشىن ۇلكەن قۋانىش ەدى. بۇل ىسكە قىزىعۋشىلىقپەن، شىعارماشىلىق ءۇشىن كىرىستىم.

العاشقى تابىس تۇسە باستاعاندا، بلوگتىڭ جاۋاپكەرشىلىگى دە ارتتى. حوببيىمنىڭ بيزنەسكە اينالعانىن ءتۇسىندىم. اعام ەكەۋىمىز تاپقان اقشانى بىردەن جوبانى دامىتۋعا جۇمسادىق. پاتەر ساتىپ الىپ، ارمانىمىزداعى اس ءۇيدى جابدىقتادىق، جارىق پەن ىدىس- اياق الدىق. ساپالى كونتەنت ءتۇسىرۋ ءۇشىن ازىق-تۇلىككە دە كوبىرەك قاراجات بولە باستادىق. وسىلايشا، تابىس يدەيالارىمىزدى جۇزەگە اسىرۋعا مۇمكىندىك بەردى.

- قازىر ارناڭىزدا 4 ميلليوننان استام جازىلۋشى، ۆيدەولارىڭىزدا 2,5 ميللياردتان استام قارالىم بار. قانداي ۆيدەولار اۋديتوريانى كوبىرەك قىزىقتىرادى؟

- كورەرمەندەرگە شوۋ ەلەمەنتتەرى بار، ەرەكشە تاعامدار ازىرلەنەتىن ۆيدەولار ۇنايدى. مىسالى، جىلىك مايىنان تاعام دايىنداۋ، كوپ مولشەردە مانتى ءپىسىرۋ نەمەسە قامىردان جەۋگە بولاتىن ىدىس جاساپ، وعان دايىن استى سالىپ ۇسىنۋ كوپ قارالىم جينادى.

كورەرمەننىڭ نازارىن تاعامنىڭ اۋقىمى مەن ەرەكشە ۇسىنىلۋى ارقىلى اۋدارامىن. سونىمەن بىرگە جاڭا اسپازدىق ادىستەردى مەڭگەرۋگە تىرىسامىن.

- بلوگ جۇرگىزۋدى باستاۋ ءۇشىن العاشقى تەلەفونىڭىزعا اقشا جيناپ، ترايفل، تورت پەن كاپكەيك ساتقان ەكەنسىز. بۇل تاجىريبە سىزگە نە ۇيرەتتى؟

- ارمانعا جەتۋ ءۇشىن ەڭبەكتەنۋ كەرەك ەكەنىن ۇيرەتتى. تۇسىرىلىمگە تەلەفون قاجەت بولعاندا، ءوز قولىممەن دەسەرتتەر جاساپ ساتىپ، العاشقى iPhone تەلەفونىما اقشا جينادىم.

سول كەزدە-اق ماقساتقا جەتۋ ءۇشىن عاجايىپتى كۇتپەي، ارەكەت ەتۋ كەرەگىن ءتۇسىندىم. ءقازىر دە وسى ۇستانىمدى باسشىلىققا الامىن.

- الەۋمەتتىك جەلى ارقىلى تانىلىپ، تابىس تاپقىسى كەلەتىن جاستارعا قانداي كەڭەس بەرەر ەدىڭىز؟

- بىرىنشىدەن، قولدا بار مۇمكىندىكتەن باستاڭىزدار. قىمبات كامەرانى نەمەسە قولايلى ءساتتى كۇتۋدىڭ قاجەتى جوق. ەكىنشىدەن، ءوز ەرەكشەلىكتەرىڭىزدى تابىڭىزدار. فۋد-بلوگەرلەر كوپ، سوندىقتان كورەرمەندى نەمەن تاڭعالدىرا الاتىنىڭىزدى ويلاڭىزدار. ۇشىنشىدەن، ەڭبەكقور ءارى شىدامدى بولىڭىزدار. تاعام ازىرلەۋ پروتسەسىن ءتۇسىرۋ وڭاي ەمەس، سوندىقتان ناتيجەگە جەتۋ ءۇشىن تۇراقتى جۇمىس قاجەت.

ءمولدىر سنادين