Forbes: بيىلعى ەڭ باي قازاقستاندىقتار انىقتالدى
استانا. KAZINFORM - بيىل Forbes تىزىمىنە ەنگەن قازاقستانداعى ەڭ اۋقاتتى ادامدار رەيتينگى جاڭاردى.
تىزىمگە ەنگەندەردىڭ جيىنتىق كاپيتالى 46,6 ميلليارد دوللاردان 57,5 ميلليارد دوللارعا دەيىن ءوستى، ال ورتاشا جاسى 55 كە دەيىن تومەندەدى. بىرنەشە جاڭا ەسىم تىزىمدە اكتيۆتەرىن نىعايتىپ، ءىرى مامىلەلەر ارقىلى ەنسە، تۇراقتى قاتىسۋشىلاردىڭ كەيبىرى ايتارلىقتاي جوعارىلادى.
رەيتينگ كوشباسشىسى ۆياچەسلاۆ كيم باستاپ تۇر، ونىڭ بايلىعى 1,3 ميلليارد دوللارعا ءوسىپ، 7,1 ميلليارد دوللارعا جەتتى. ەڭ قارقىندى ءوسىمدى تيمۋر تۋرلوۆ كورسەتتى، جىل ىشىندە 2,6+ ميلليارد دوللار تاپتى، بۇل رەيتينگ تاريحىنداعى ابسوليۋتتى رەكورد. وسىلايشا، ول بەسىنشى ورىننان ەكىنشى ورىنعا كوتەرىلىپ، بايلىعىن 5,8 ميلليارد دوللارعا جەتكىزدى. العاشقى وندىققا سونداي-اق ۆلاديمير كيم، تيمۋر مەن دينارا قۇلىبايەۆتار، بولات وتەمۇراتوۆ، يبراگيموۆتەر وتباسى، نۇرلان سماعۇلوۆ، سارسەنوۆتەر وتباسى جانە ايدىن راقىمبايەۆ كىردى.
اۋقاتتىلار قاتارىنا جاڭادان قوسىلعانداردىڭ ىشىندە اندرەي لاۆرەنتيەۆ ەرەكشە كوزگە ءتۇستى، ول «كارمەت» پەن Allur توبىن بىرىكتىرىپ، 840 ميلليون دوللارمەن بىردەن 12-ورىنعا كوتەرىلدى. العاش Forbes تىزىمىنە كىرگەندەر قاتارىندا نۇرلان ارتىقبايەۆ (قۇرىلىس جانە تەلەكوم) ، تورسەنعالي الاگوزوۆ (سۋسىندار مەن ازىق-تۇلىك)، اسقار بايتاسوۆ (ABR مەيرامحانالار جەلىسىنىڭ نەگىزىن قالاۋشى)، بۇرىنعى بوكس چەمپيونى سەرىك قوناقبايەۆ (مۇناي جانە گاز)، مەديا-كاسىپكەر ءاليدار وتەمۇراتوۆ جانە «وليمپ» كومپانياسىنىڭ نەگىزىن قالاعان ەرلان سۇلەيمەنوۆ بار.
جاڭا ءتىزىمنىڭ جاساقتالۋى جاھاندىق ەكونوميكانىڭ تۇبەگەيلى ترانسفورماتسياسى مەن قازاقستانداعى دوللارلىق ميلليونەرلەر بەلسەندىلىگىنىڭ ارتۋى اياسىندا ءوتتى. Global Wealth Report 2024 مالىمەتىنە سايكەس، قازاقستان باي ادامدار سانىنىڭ ءوسۋ قارقىنى بويىنشا الەمدە الدىڭعى ۇشتىككە ەنگەن.
تىزىمنەن شىققاندار قاتارىندا Hill Corporation نەگىزىن قالاۋشى دۋلات قوجامجاروۆ بار (زاڭسىز الىنعان اكتيۆتەردى قايتارۋ تىزىمىنە ەنگىزىلگەن)، سونداي-اق ەلدار ءابدىرازاقوۆ، بەرىك قانيەۆ، يۋري پاك جانە راۋشان ساگديەۆا بار.
ءبىر اي بۇرىن Forbes-تىڭ الەمدىك رەيتينگىنە ەنگەن قازاقستاندىق ميللياردەرلەر تۋرالى جازعان ەدىك.
