FAO باسشىسى: قازاقستان - تۇراقتى اگروسالادا جاھاندىق كوشباسشى بولۋعا دايىن ەل
استانا. KAZINFORM - پرەمەر-مينيستر ولجاس بەكتەنوۆ پەن FAO- نىڭ باس ديرەكتورى تسيۋي دۋنيۋ ازىق-تۇلىك قاۋىپسىزدىگىندەگى بىرلەسكەن جوبالاردى تالقىلادى، دەپ حابارلايدى ۇكىمەتتىڭ باسپا ءسوز قىزمەتى.
پرەمەر-مينيستر ولجاس بەكتەنوۆ استانا حالىقارالىق فورۋمىنا قاتىسۋ ءۇشىن قازاقستانعا كەلگەن بۇۇ ازىق-تۇلىك جانە اۋىل شارۋاشىلىعى ۇيىمىنىڭ (FAO) باس ديرەكتورى تسيۋي دۋنيۋيمەن كەزدەستى.
كەزدەسۋدە 2024-جىلى جوعارى دەڭگەيدەگى كەلىسسوزدەر بارىسىندا قول جەتكىزىلگەن ۋاعدالاستىقتاردى جۇزەگە اسىرۋ بارىسى قارالدى. سونداي-اق قازاقستان - FAO سەرىكتەستىك باعدارلاماسى اياسىنداعى وزەكتى ماسەلەلەر مەن جۇمىس جوسپارلارى تالقىلاندى.
وندا اۋىل شارۋاشىلىعى ونىمدەرىن قايتا وڭدەۋ سالاسىنداعى ىنتىماقتاستىقتى تەرەڭدەتۋ جانە قوسىلعان قۇنى جوعارى اگروونىمدەرى ەكسپورتىن ۇلعايتۋ پەرسپەكتيۆالارىنا نازار اۋدارىلدى.
ق ر پرەمەر-ءمينيسترى اۋىل شارۋاشىلىعى ۇلتتىق ەكونوميكانىڭ نەگىزگى سالالارىنىڭ ءبىرى ەكەنىن باسا ايتتى. قازاقستان اۋىل شارۋاشىلىعى ونىمدەرىن الەمنىڭ 80 ەلىنە ەكسپورتتايدى جانە جاھاندىق ازىق-تۇلىك قاۋىپسىزدىگى يندەكسىندە 113 ەلدىڭ ىشىندە 32-ورىندا.
- سالانى دامىتۋ جۇمىستارى ءوز ناتيجەسىن بەرۋدە: وتكەن جىلى ءبىز اۋىل شارۋاشىلىعىنىڭ جالپى ءونىمى %13,7 عا وسكەنىن اتاپ وتتىك. قازاقستان تاياۋ جىلداردا اۋىل شارۋاشىلىعى ونىمدەرىن وڭدەۋدى بەلسەندى تۇردە دامىتىپ، قوسىلعان قۇنى جوعارى ءونىم ۇلەسىن %70 عا جەتكىزۋگە نيەتتى. جاڭا وڭدەۋ كاسىپورىندارىن سالۋ جانە جۇمىس ىستەپ تۇرعاندارىن جاڭعىرتۋ جوسپارلانىپ وتىر. الداعى ءۇش جىلدا ءبىز اگروازىق-تۇلىك سالاسىندا جالپى قۇنى $4,8 ميللياردتان اساتىن 600 دەن استام ينۆەستيتسيالىق جوبانى جۇزەگە اسىرۋدى جوسپارلاپ وتىرمىز، - دەپ اتاپ ءوتتى ولجاس بەكتەنوۆ.
قازاقستان وزىق اگروتەحنولوگيالارمەن الماسۋعا، سونداي-اق وندىرىسكە عىلىمي كوزقاراستاردى دامىتۋعا مۇددەلى.
FAO- نىڭ باس ديرەكتورى قازاقستان الەۋەتىن جوعارى باعالاپ، ءوزارا ءىس-قيمىلدى ودان ءارى تەرەڭدەتۋگە سەنىم ءبىلدىردى.
- قازاقستان، ەۋرازيانىڭ قاق ورتاسىندا ورنالاسقان، وراسان زور جەر رەسۋرستارى مەن باي اگروبيوالۋانتۇرلىلىككە يە، ستراتەگيالىق ورنالاسۋىمەن تۇراقتى اۋىل شارۋاشىلىعىندا الەمدىك كوشباسشىعا اينالۋى ءۇشىن زور الەۋەتكە يە. الەمدە جەر كولەمى جاعىنان توعىزىنشى ورىنداعى ءىرى ەل رەتىندە قازاقستاننىڭ اگروازىق-تۇلىك جۇيەلەرىن ورنىقتى دامۋدىڭ، ەكونوميكالىق ءوسۋدىڭ جانە ەكولوگيالىق جاۋاپكەرشىلىكتىڭ قوزعاۋشى كۇشىنە اينالدىرۋدا الەۋەتى مەن امبيتسياسى جەتەرلىك. FAO قازاقستانمەن بەرىك سەرىكتەستىگىن ماقتان تۇتادى جانە ەلىمىزدى ازىق-تۇلىك قاۋىپسىزدىگىنە قول جەتكىزۋدە، يننوۆاتسيالاردى ەنگىزۋدە جانە بولاشاق ۇرپاق ءۇشىن ورنىقتى شەشىمدەردى ىلگەرىلەتۋدە ودان ءارى قولداۋ كورسەتۋگە نيەتتى، - دەدى تسيۋي دۋنيۋي.
ىنتىماقتاستىقتىڭ باسىم باعىتتارىنىڭ ءبىرى - اگرارلىق سەكتوردا سيفرلىق شەشىمدەردى ەنگىزۋ. قازاقستان شەگىرتكەلەرىنىڭ تارالۋىن باقىلاۋ جانە ونىڭ الدىن الۋ ماقساتىندا جاساندى ينتەللەكت نەگىزىندە گەواقپاراتتىق جۇيەنى جانە FitoSpace ءبىرىڭعاي سيفرلىق پلاتفورماسىن قۇرۋعا باستاماشى بولدى. اتالعان قىزمەت مونيتورينگىنىڭ دالدىگىن جاقسارتۋعا، پەستيتسيدتەر پايدالانۋدى جانە ەكولوگيالىق قاۋىپ-قاتەرلەردى ازايتۋعا مۇمكىندىك بەرەدى، بۇل اۋىل شارۋاشىلىعىنىڭ تيىمدىلىگىن ارتتىرۋعا جانە فيتوسانيتاريالىق باقىلاۋدى كۇشەيتۋگە ىقپال ەتەدى.
سونىمەن قاتار، ۆەتەرينارلىق جۇيەنى جانە بيوقاۋىپسىزدىكتى ودان ءارى دامىتۋ قاجەتتىلىگى اتاپ ءوتىلدى. سۋ رەسۋرستارىن تۇراقتى باسقارۋ بويىنشا ءوزارا ءىس-قيمىلدى نىعايتۋ پەرسپەكتيۆالارى تالقىلاندى. قازاقستان سۋ رەسۋرستارىن باسقارۋ بويىنشا قازاقستان مەن FAO- نىڭ جەكە سەرىكتەستىك باعدارلاماسىن قۇرۋ مۇمكىندىكتەرىن زەرتتەۋ جۇمىسىن باستادى.
سونداي-اق تاراپتار جەردىڭ توزۋى جانە شولەيتتەنۋىمەن كۇرەس بويىنشا بىرلەسكەن جۇمىستىڭ ماڭىزدىلىعىن اتاپ ءوتتى. قازاقستان قۇرعاقشىلىق پەن شاڭدى داۋىلدان زارداپ شەككەن ەلدىڭ جەتى ءوڭىرى ءۇشىن وزەكتى باستامالاردى جۇزەگە اسىرۋ ءۇشىن FAO- مەن ىنتىماقتاستىقتى كەڭەيتۋگە مۇددەلى.
جالپى، ب ۇ ۇ- نىڭ ازىق-تۇلىك جانە اۋىل شارۋاشىلىعى ۇيىمىنىڭ قازاقستانداعى قىزمەتى ەلدىڭ اگروونەركاسىپ كەشەنىن دامىتۋ سالاسىنداعى ۇلتتىق ستراتەگيالىق قۇجاتتاردى ازىرلەۋگە جاردەمدەسۋدى قامتيدى. قازىرگى ۋاقىتتا قازاقستانداعى FAO جوبالارىنىڭ قورجىنى 55 تەن استام باستامانى، ونىڭ ىشىندە 33 ىسكە اسىرىلعان جوبانى، سونداي-اق 22 جۇزەگە اسىپ جاتقان جوبانى قامتيدى.
بۇعان دەيىن پرەمەر-مينيستر ولجاس بەكتەنوۆ الداعى ءۇش ايدا وبلىس اكىمدەرى اتقارۋى ءتيىس ءبىرقاتار مىندەتتەردى اتاپ ءوتتى.
