ا ق ش پرەزيدەنتى كوروناۆيرۋس تۋرالى جالعان اقپارات ءۇشىن Facebook جەلىسىن سىنعا الدى
ۆاشينگتون. قازاقپارات - ا ق ش پرەزيدەنتى جو بايدەن Facebook الەۋمەتتىك جەلىسىنىڭ كوروناۆيرۋسقا قارسى ۆاكسينا تۋرالى جالعان اقپاراتپەن كۇرەستە جەتكىلىكتى جۇمىس ىستەمەگەنىن ايتىپ، قاتتى سىنعا الدى، دەپ حابارلايدى قازاقپارات BBC-گە سىلتەمە جاساپ.
جۋرناليستەر امەريكالىق كوشباسشىدان ۆاكسيناتسيا جانە كوروناۆيرۋس پاندەمياسىنا قاتىستى جالعان مالىمەتتەر تاراتۋداعى Facebook سياقتى كومپانيالاردىڭ ءرولى تۋرالى نە ويلايتىنىن سۇرادى.
«ولار ادامداردى ولتىرۋدە. پاندەميا قازىر ۆاكسينالانباعان ادامدار اراسىندا عانا ءجۇرىپ جاتىر»، - دەپ جاۋاپ بەردى بايدەن.
ا ق ش- تىڭ ەرەسەك تۇرعىندارىنىڭ شامامەن %67,9 ى كوروناۆيرۋسقا قارسى ۆاكسينالاردىڭ ءبىرىنىڭ العاشقى دوزاسىن الدى، ال %59,2 ى تولىق ۆاكسيناتسيادان ءوتتى. ءبىراق كوپتەگەن ادام ەكپە الماي جاتىر، ويتكەنى ولار ۆاكسيناتسياعا قارسى.
بەيسەنبى كۇنى ا ق ش-تا 33 مىڭنان استام جاڭا جاعداي تىركەلدى، ال جەتى كۇن ىشىندە اۋرۋ جۇقتىرۋشىلاردىڭ ورتاشا سانى الدىڭعى اپتامەن سالىستىرعاندا %70 عا ارتتى. بۇل رەتتە اۋرۋحانالارداعى پاتسيەنتتەر %36 عا، ال ءولىم-ءجىتىم %26 عا كوپ بولدى (ءبىر اپتا ىشىندە قايتىس بولعانداردىڭ ورتاشا تاۋلىكتىك سانى 211 ادامدى قۇرادى). اق ءۇيدىڭ كوروناۆيرۋسپەن كۇرەس جونىندەگى ۇيلەستىرۋشىسى جەفف زيەنس اۋرۋعا شالدىعۋشىلار مەن ءولىم جاعدايلارىنىڭ ارتۋى ادامداردىڭ ۆاكسيناتسيادان باس تارتۋىمەن بايلانىستى ەكەنىن ايتتى. جۇما كۇنى امەريكانىڭ اۋرۋلاردى باقىلاۋ جانە الدىن الۋ ورتالىقتارىنىڭ (CDC) باسشىسى روشەل ۆالەنسكي: «ءدال قازىر بۇل پاندەميا ۆاكسينالانباعاندار پاندەمياسىنا اينالادى دەپ ايتۋعا بولادى»، - دەپ قورىتىندىلادى.
ۆاكسيناتسياعا قارسىلىق تانىتقاندار الەۋمەتتىك جەلىلەردە اقپارات الۋ ارقىلى ۆاكسيناتسيادان باس تارتۋدا. سونىمەن قاتار، رەسپۋبليكالىق پارتيانىڭ كەيبىر ساياساتكەرلەرى ۆاكسيناتسيا ارقىلى بيلىك ا ق ش تۇرعىندارىن باقىلاۋعا تىرىسادى دەپ مالىمدەپ جاتىر. وسى جىلدىڭ ناۋرىز ايىندا Center for Countering Digital Hate ۇكىمەتتىك ەمەس ۇيىمى جاريالاعان زەرتتەۋگە سايكەس، ۆاكسيناتسيانىڭ قارسىلاستارى Facebook, YouTube, Instagram جانە Twitter- دە 59 ميلليوننان استام ادام وقىعان پوستتاردى جاريالاعان.
«وسىلايشا، ولار «انتيۆاكسەرلەر ءۇشىن ەڭ ۇلكەن جانە ماڭىزدى الەۋمەتتىك مەديا پلاتفورمالارعا اينالدى»، - دەلىنگەن باياندامادا.
الەۋمەتتىك جەلىلەردە نە جازىلعان؟
Facebook رەسمي وكىلى كيەۆين ماكالليستەر كومپانيا «فاكتىلەرمەن راستالماعان ايىپتاۋلارعا الاڭدامايدى» دەدى.
«ءبىز كوۆيد تۋرالى جالعان اقپاراتى بار 18 ميلليوننان استام جازبانى وشىردىك جانە ەرەجەلەردى ۇنەمى بۇزاتىن اككاۋنتتاردى بۇعاتتادىق»، - دەلىنگەن الەۋمەتتىك جەلى تاراتقان مالىمدەمەدە.
وسى جىلدىڭ كوكتەمىندە Facebook باسشىسى مارك سۋكەربەرگ، سونداي-اق Google جانە Twitter باسشىلارى سۋندار پيچاي مەن جەك دورسي امەريكالىق كونگرەسسمەندەردىڭ جەلىدەگى جالعان اقپارات تۋرالى سۇراقتارىنا جاۋاپ بەردى.
دورسي تۆيتتەر جازبالاردى مودەراتسيالاۋدى جاقتايتىنىن، ال پيچاي YouTube كوروناۆيرۋس تۋرالى جالعان اقپاراتتى ۇنەمى الىپ تاستايتىنىن جانە ۆاكسينالار تۋرالى دالەلدەنگەن جانە عىلىمي مالىمەتتەردى تاراتۋدا ماڭىزدى ءرول اتقاراتىنىن ايتتى. اق ءۇيدىڭ رەسمي وكىلى جەن پساكي الەۋمەتتىك جەلىلەر جالعان اقپاراتپەن كۇرەسۋگە تىرىسىپ جاتقانىن مويىندادى، ءبىراق ولار نەعۇرلىم باتىل ارەكەت ەتۋى كەرەك ەكەنىن اتاپ ءوتتى.
«ولاردىڭ قانداي دا ءبىر قادام جاساعانى انىق. ءبىراق كوپ نارسەنى جاساۋ كەرەك ەكەنى راس»، - دەدى ول.
اۆتور: اياۋلىم التىنبەك
