Facebook كومپانياسى الەۋمەتتىك جەلىلەردەگى اقاۋدان 50 ميلليارد دوللار جوعالتتى
كەيبىر ادامدار سۋكەربەگتىڭ كەشىرىمىنە سەنبەسە، ەكىنشىلەرى ونى كەلەمەجدەدى. الەۋجەلىلەر اقاۋىنان ءلاززات العاندار دا تابىلدى، دەپ حابارلايدى قازاقپارات Dailymail-گە سىلتەمە جاساپ.
«Facebook, Instagram, WhatsApp پەن Messenger قازىرگى كەزدە قايتا ىسكە قوسىلدى. بۇگىنگى جاعداي بويىنشا كەشىرىم سۇرايمىن. ءبىزدىڭ سەرۆەرلەردىڭ سىزدەر ءۇشىن قانشالىقتى ماڭىزدى ەكەنىن تۇسىنەمىز»، - دەدى سۋكەربەرگ.
بۇل تەحنيكالىق اقاۋ سالدارىنان تسۋكەربەرگتىڭ داۋلەتى 7 ميلليارد دوللارعا كەمىگەن. كومپانيانىڭ حابارلاۋىنشا، اقاۋ جاڭارتۋ سالدارىنان بولعان. قاتەلىكتەرى بار جاڭارتۋ نەگىزگى سەرۆەرلەرگە جىبەرىلگەن. سالدارىنان ەلەكتروندى ينجەنەرلىك قۇرالدار مەن اقپارات الماساتىن سەرۆيستەر زاقىمدانىپ، ءتىپتى ەسىكتەردەگى ەلەكتروندى قۇلىپتار ىستەن شىققان. ينجەنەرلەر سەرۆەرلەردى قولمەن رەتكە كەلتىرۋ ءۇشىن دەرەكتەردى ساقتاۋ جانە وڭدەۋ ورتالىقتارىنا بارعان، الايدا ىشىنە كىرە الماعان. ماسەلە ينجەنەرلەردىڭ كومپانيانىڭ ينفراقۇرىلىمىمەن جۇرگىزگەن التى ساعاتتىق ارپالىسىنان كەيىن بارىپ شەشىلدى.
ينسايدەردىڭ اقپاراتىنا ساي، كومپانيانىڭ كوپتەگەن قىزمەتكەرى ءالى دە ۇيدەن جۇمىس ىستەپ وتىر. سول سەبەپتى ولاردىڭ ورتالىقتارعا جەتۋى ءبىراز ۋاقىت العان. وسى ورايدا Facebook كومپانياسىنىڭ اكسيالارى بەس پايىزعا تومەندەدى. ميلليونداعان قولدانۋشى Reddit پەن Twitter- گە كوشتى. دۇيسەنبى كۇنى كومپانيا دەرەكتەردى ساقتاۋ جانە وڭدەۋ ورتالىقتارى اراسىنداعى جەلىلىك ترافيكتى ۇيلەستىرەتىن نەگىزگى باعدارلاۋىشتار كونفيگۋراتسياسىنداعى وزگەرىستىڭ اتالعان جاعدايعا سەبەپشى بولعانىن ءتۇسىندىردى.
ورتالىقتار اراسىنداعى ساتىلى ەففەكت سالدارىنان سەرۆەرلەر جۇمىسى توقتاعان. اقاۋ كومپانيا سەرۆەرلەرىن قولمەن رەتكە كەلتىرۋ ارقىلى جوندەلدى. كەشە، دۇيسەنبى كۇنى كومپانيا ءوزىنىڭ Twitter اككاۋنتىندا جۇمىستارى Facebook كومپانياسىمەن بايلانىستى الەمدەگى بارلىق ادامدار مەن بيزنەستەن كەشىرىم سۇرادى. سونىمەن قاتار Facebook كومپانياسىنىڭ باس تەحنيكالىق ديرەكتورى كەشىرىم سۇرادى. كومپانيا وسى جاعدايدان 50 ميلليارد دوللار جوعالتقان.
