شۆەيتساريا تۇرعىندارى ۇكىمەتتى سوتقا بەرىپ، جەڭىپ شىقتى

بەرن. KAZINFORM - شۆەيتساريا قارتتارى ادام قۇقىقتارى جونىندەگى ەۋروپالىق سوتتا ەل ۇكىمەتىنىڭ كليماتقا قاتىستى ارەكەتسىزدىگىنە بايلانىستى ءىستى جەڭىپ شىقتى. اسا ىستىق اۋا رايى ولاردىڭ دەنساۋلىعىنا زيانىن تيگىزىپ، ءولىم قاۋپىن تۋدىرادى، دەپ جازادى CNN.

فرانسيادا ادام قۇقىقتارى جونىندەگى ەۋروپالىق سوت (ا ق ج ە س) شۆەيتساريانىڭ كليماتتىق داعدارىسقا قارسى ارەكەتسىزدىگىن ادام قۇقىقتارىن بۇزادى دەپ تاپتى. بۇل سوتتىڭ تاريحتا العاش رەت كليماتتىڭ وزگەرۋىنە بايلانىستى ءىستى قاراۋى.

64 جاستان اسقان 2 مىڭنان استام ايەلدەن تۇراتىن شۆەيتساريا ازاماتتارىنىڭ توبى ا ق ج ە س-كە شاعىم ءتۇسىردى. ولار قاتتى ىستىق كەزەڭدەردىڭ دەنساۋلىق پەن ءومىر ءسۇرۋ ساپاسىنا نۇقسان كەلتىرىپ، ءولىم ءقاۋپىن توندىرەتىنىن العا تارتقان.

سوت شۆەيتساريا ۇكىمەتى ءبىرقاتار ادام قۇقىعىن بۇزدى دەپ تاپتى. سوت ءتوراعاسى شيفرا و’ليري شۆەيتساريا ۇكىمەتىنىڭ كليماتپەن بايلانىستى ماقساتتارعا جەتە الماعانىن جانە ءتيىستى شارالار قولدانباعانىن اتاپ ءوتتى.

«شۆەيتسارياعا قارسى بۇگىنگى شەشىم بارلىق ەۋروپا ەلدەرى ءۇشىن تاريحي پرەتسەدەنت بولىپ تابىلادى. بۇل بارلىق ەۋروپا ەلدەرى وزدەرىنىڭ [كليماتتىق] ماقساتتارىن دەرەۋ قايتا قاراۋى كەرەك دەگەندى بىلدىرەدى. بۇل بارلىق ۇرپاق ءۇشىن ۇلكەن جەڭىس» - دەدى Global Legal Action Network زاڭگەرى دجەرري ليستون.

شۆەيتساريانىڭ اپەللياتسيالىق شاعىم بەرۋ قۇقىعى جوق، شەشىم زاڭدى كۇشكە يە. شەشىم سونىمەن قاتار شۆەيتساريانى قازبالى وتىندى تۇتىنۋدى تەزىرەك قىسقارتۋعا ءماجبۇر ەتۋى مۇمكىن.