شۋچينسكىدەگى جارىلىس: 12 ادام قازا تاپقان وقيعا بويىنشا اپەللياتسيالىق سوت شەشىم شىعاردى
استانا. KAZINFORM - اقمولا وبلىستىق سوتى شۋچينسكىدەگى «پالاۋ ورتالىعى» كافەسىندە بولعان جارىلىسقا قاتىستى ءبىرىنشى ساتىداعى سوت ۇكىمىن نەگىزىنەن وزگەرىسسىز قالدىردى.
سۋديا اسكەربەك جاقۋلين ءتوراعالىق ەتكەن سوت القاسى ۇكىمنىڭ سيپاتتاۋ-ۋاجدەۋ بولىگىنە عانا تۇزەتۋ ەنگىزدى.
شۋچينسكىدەگى «پالاۋ ورتالىعى» كافەسىندە گاز بەن اۋا قوسپاسى جارىلىپ، 12 ادام قازا تاۋىپ، تاعى 11 ادام زارداپ شەككەن ەدى. وسى وقيعاعا قاتىستى ءىس اقمولا وبلىستىق سوتىندا اپەللياتسيالىق تارتىپپەن قارالدى.
سوت وتىرىسىندا پروكۋرور ايىپتاۋشى تاراپتىڭ ءبىرىنشى ساتىداعى سوت ۇكىمىمەن جالپى كەلىسەتىنىن ايتتى. الايدا جانارماي قۇيۋ ستانتسياسىنىڭ يەسى مەن گاز جەتكىزۋشىنىڭ جاۋاپكەرشىلىگىن اۋىرلاتاتىن ءمان-جايلار ۇكىمنەن الىنىپ تاستالعاندىقتان، اپەللياتسيالىق ءوتىنىش بەرىلگەن.
پروكۋرور اتالعان ءمان-جايلاردى ۇكىمنىڭ سيپاتتاۋ- ۋاجدەۋ بولىگىندە كورسەتۋدى سۇرادى.
سونىمەن قاتار ايىپتاۋشى تاراپ كافە يەسىنە قاتىستى ۇكىمدە جارىلىستىڭ سالدارى دۇرىس كورسەتىلمەگەنىن اتاپ ءوتتى. ءبىرىنشى ساتىداعى سوت ۇكىمىندە 12 ادامنىڭ قازا تاپقانى جانە 11 ادامنىڭ دەنساۋلىعىنا اۋىر زيان كەلگەنى جازىلعان. الايدا 11 ادام جاراقات العانىمەن، ولاردىڭ سەگىزىنىڭ عانا دەنساۋلىعىنا اۋىر زيان كەلگەن.
وسىعان بايلانىستى پروكۋرور سوتتالۋشى ادۆوكاتىنىڭ ۇكىمنىڭ سيپاتتاۋ بولىگىن ناقتىلاۋ تۋرالى ءوتىنىشىن قولدادى. ال جابىرلەنۋشىلەردىڭ تالاپ ارىزدارىن وزگەرتۋ تۋرالى وتىنىشتەرىن قاناعاتتاندىرماۋدى سۇرادى.
سوت القاسى بۋراباي اۋداندىق سوتىنىڭ ۇكىمىنە وزگەرىس ەنگىزدى. اتاپ ايتقاندا، ۇكىمدەگى «11 ادامنىڭ دەنساۋلىعىنا اۋىر زيان كەلدى» دەگەن مالىمەت تۇزەتىلىپ، ونىڭ ورنىنا «11 ادام ءارتۇرلى دارەجەدە جاراقات الدى، ونىڭ ىشىندە سەگىز ادامنىڭ دەنساۋلىعىنا اۋىر زيان كەلدى» دەپ كورسەتىلدى.
ۇكىمنىڭ قالعان بولىگى وزگەرىسسىز قالدىرىلدى.
اپەللياتسيالىق سوتتىڭ قاۋلىسى جاريالانعان ساتتەن باستاپ زاڭدى كۇشىنە ەندى. دەگەنمەن سوت پروتسەسىنە قاتىسۋشىلار بۇل شەشىممەن كەلىسپەسە، كاسساتسيالىق ساتىعا جۇگىنە الادى.
ەسكە سالايىق، بۇعان دەيىن بۋراباي اۋداندىق سوتى «پالاۋ ورتالىعى» كافەسىنىڭ يەسىن ق ر قىلمىستىق كودەكسىنىڭ 292-بابىنىڭ 3-بولىگى بويىنشا كىنالى دەپ تانىپ، جەتى جىلعا باس بوستاندىعىنان ايىرعان ەدى. ول ءورت قاۋىپسىزدىگى تالاپتارىن بۇزىپ، ابايسىزدا اۋىر زارداپتارعا، ادامداردىڭ دەنساۋلىعىنا اۋىر زيان كەلۋىنە جانە ەكىدەن كوپ ادامنىڭ قازا تابۋىنا سەبەپ بولعان. سونداي-اق وعان ءۇش جىل بويى قوعامدىق تاماقتاندىرۋ سالاسىندا قىزمەت اتقارۋعا تىيىم سالىندى.
جانارماي قۇيۋ ستانتسياسىنىڭ ديرەكتورى قر قىلمىستىق كودەكسىنىڭ 306-بابىنىڭ 3-بولىگى بويىنشا كىنالى دەپ تانىلىپ، جەتى جىلعا سوتتالدى. ول تۇتىنۋشىلاردىڭ ءومىرى مەن دەنساۋلىعىنا قاۋىپسىزدىك تالاپتارىنا ساي كەلمەيتىن قىزمەت كورسەتىپ، سونىڭ سالدارىنان ابايسىزدا ەكىدەن كوپ ادامنىڭ دەنساۋلىعىنا زيان كەلۋىنە جانە ادام ولىمىنە جول بەرگەنى ءۇشىن جازالاندى.
ال گاز جەتكىزۋشى وسى باپ بويىنشا التى جىلعا باس بوستاندىعىنان ايىرىلدى.
