شىرشا ارلەيمىن دەپ جانساقتاۋ بولىمىنە تۇسكەن سەمەيلىك مۇعالىمگە وتەماقى بەرىلە مە

استانا. KAZINFORM - پرەمەر-ءمينيستردىڭ ورىنباسارى تامارا دۇيسەنوۆا ۇكىمەت وتىرىسىنان كەيىن وتكەن باسپا ءسوز ءماسليحاتىندا سەمەيدە جاڭا جىل شىرشاسىن ارلەپ ءجۇرىپ جاراقات العان مۇعالىم تۋرالى پىكىر ءبىلدىردى.

- مۇعالىمنىڭ قوسىمشا جۇمىسقا تارتىلعانى قۇجات ارقىلى دالەلدەنسە، جۇمىس ۋاقىتىندا تارتىلعان بولسا، وندىرىستىك جاراقات دەپ تانىلادى. ال قۇجات ارقىلى دالەلدەۋ مۇمكىن بولماسا، ونداي ستاتۋس بەرىلمەيدى جانە وتەماقى تولەنبەيدى. بۇل زاڭنىڭ تالابى. ەشبىر كەلىسىمشارتسىز جۇمىسقا تارتىلعان بولسا، جۇمىسقا جەككەن ادامدار زاڭدى بۇزعانى ءۇشىن جازالانادى، - دەدى تامارا دۇيسەنوۆا.

سونداي-اق، جۋرناليست مۇعالىمدەردى ەرىكتى رەتىندە جۇمىسقا تارتۋ قانشالىقتى زاڭدى ەكەنىن سۇرادى.

- ەرىكتىلەر تۋرالى ايتساق، ول زاڭ ءبىزدىڭ مينيسترلىكتىڭ قۇزىرەتىندە ەمەس. ءبىراق قاجەتتى ۇسىنىس قاجەت بولاتىن بولسا، مىندەتتى تۇردە كوتەرەمىز. قۇزىرەتتى ورگان ءارى قاراي ءوزى قارايدى. ناقتى ءبىزدىڭ مينيسترلىك ونداي ۇسىنىس ەنگىزۋدى جوسپارلاپ وتىرعان جوق، - دەدى عاني بەيسەمبايەۆ.

ونىڭ پايىمداۋىنشا، پەداگوگ مارتەبەسى تۋرالى زاڭ مۇعالىمدى باسى ارتىق جۇمىسقا تارتۋدان تولىققاندى قورعاي الادى.

- جالپى 2019 -جىلى قابىلدانعان زاڭنىڭ شەڭبەرىندە جالپى مۇعالىمدەردى قانداي دا ءبىر ءوزىنىڭ ماماندىعىنا سايكەس ەمەس جۇمىستارعا تارتۋعا بولمايدى. بۇل زاڭنىڭ جەرگىلىكتى ورىنداردا قانشالىقتى ورىندالىپ جاتقانى ەكىنشى ءبىر ماسەلە. مەن تاپسىرما بەردىم. ءبىلىم ساپاسىن قامتاماسىز ەتۋ جونىندەگى جەرگىلىكتى دەپارتامەنتتەرىمىز بار. سولار تۇگەلدەپ، مونيتورينگ جۇرگىزىپ جاتىر. اۋدانداردا، اسىرەسە، الىس اۋىلداردا مۇعالىمدەردىڭ قۇقىعى قانشالىقتى ساقتالىپ جاتقانىن تەكسەرەدى، - دەدى مينيستر.

عاني بەيسەمبايەۆ سەمەيلىك مۇعالىم بۇگىن اۋرۋحانادان شىققانىن، ونىڭ حال-جاعدايى ءوزىنىڭ تىكەلەي باقىلاۋىندا ەكەنىن ايتتى.

ەسكە سالساق، 22-جەلتوقساندا سەمەيلىك مۇعالىم شىرشا بەزەندىرۋ كەزىندە جاراقات العانى ءمالىم بولعان.

اۆتور

ەسىمجان ناقتىباي