شۋچينسكىدەگى ستۋدەنتتىڭ ءولىمى: 10 ادامعا جازا كەسىلدى
استانا. KAZINFORM - اقمولا وبلىسى بۋراباي اۋدانى سوتىنىڭ ۇكىمىمەن جاس جىگىتتى سۋيتسيدكە يتەرمەلەگەن بۋراباي اۋدانىنىڭ 11 تۇرعىنى كىنالى دەپ تانىلدى.
«سوتتالۋشىلار بۋراباي اۋدانىندا ۇزاق ۋاقىت بويى (2 جىل ىشىندە) كۇش قولدانىپ، قورقىتىپ، 12 ادامنان 130-500 مىڭ تەڭگەگە دەيىن (جالپى سوما 1140000 تەڭگە) اقشا بوپسالاعان. سونىمەن قاتار ەكى سوتتالۋشى «ن» جانە «ا» جابىرلەنۋشى «ب» - ءنى وزىنە قول سالۋعا دەيىن جەتكىزگەن. سوت 7 سوتتالۋشىنى 4 جىلدان 5 جىلعا دەيىن مەرزىمگە باس بوستاندىعىنان ايىرىپ، ۇشەۋىنە 4 جىلدان 5 جىلعا دەيىن باس بوستاندىعىن شەكتەدى. كامەلەتكە تولماعان «ش. » جابىرلەنۋشىلەرمەن تاتۋلاسۋىنا بايلانىستى قىلمىستىق جاۋاپتان بوساتىلدى»، - دەلىنگەن سوت ۇكىمىندە.
سونداي- اق، سوت «ن»، «ك» جانە «ت» جەتكىنشەك بولعاندىقتان، ال «ر» كىناسىن مويىنداپ، شىنايى وكىنگەندىكتەن جانە «ك»، «سا»، «ت» - نىڭ بۇرىن سوتتى بولماعاندىقتان جازانى جەڭىلدەتەتىن جاعداي رەتىندە ەسكەرگەنى ايتىلدى. سوتتالۋشىلاردا اۋىرلاتاتىن ءمان- جايلار انىقتالماعان.
«سوتتالعانداردان جابىرلەنۋشىلەردىڭ پايداسىنا جالپى سوماسى 3 ميلليون تەڭگە كولەمىندە مورالدىق زيان جانە جالپى سوماسى 1140000 تەڭگەگە كەلتىرىلگەن ماتەريالدىق زالال ءوندىرىلدى. سونىمەن قاتار باستى سوت تالقىلاۋى بارىسىندا ءتارتىپتى بۇزعانى ءۇشىن پوليتسيا دەپارتامەنتىنىڭ اتىنا جانە اۋدان اكىمىنىڭ اتىنا جاستاردى جۇمىسپەن قامتۋ بولىگىندە جۇمىستى كۇشەيتۋگە نازار اۋدارا وتىرىپ، جەك قاۋلىلار شىعاردى»، - دەيدى اقمولا وبلىستىق سوتىنان.
سوت ۇكىمى زاڭدى كۇشىنە ەنگەن جوق.
ەسكە سالايىق، بىلتىر 7-قازاندا اقمولا وبلىسىندا تەمىرجولدان ستۋدەنتتىڭ دەنەسى تابىلعانى تۋرالى حابارلاعان ەدىك. 19 جاستاعى ستۋدەنت وزىنە 6-قازاندا قول جۇمساعان.
پرەزيدەنت شۋچينسك قالاسىنداعى ستۋدەنتتىڭ ولىمىنە قاتىستى ءىستى جەكە باقىلاۋىنا الدى.
مەملەكەت باسشىسى ىشكى ىستەر مينيسترىنە اتالعان ءىستىڭ ءمان- جايىن جان- جاقتى تەكسەرۋدى تاپسىردى.
ايتا كەتسەك، شۋچينسكىدەگى كوللەدج ستۋدەنتىنىڭ ولىمىنە قاتىستى ءىس سوتقا بىلتىر 6-جەلتوقساندا جولدانادى.
