شىندىق ەشكىمگە كەرەك ەمەس - بيشىمبايەۆ پەن بايجانوۆ سوتتا نە ايتتى
استانا. KAZINFORM - ەكس-شەنەۋنىك قۋاندىق بيشىمبايەۆ پەن ونىڭ ءىنىسى باقىتجان بايجانوۆ اپەللياتسيالىق ساتىداعى سوت وتىرىسىندا ءسوز سويلەدى.
«مەنىڭ تولىقتىرعىم كەلگەنى، ايتىلعانداردىڭ بارىنە دالەل كەلتىرۋگە مۇمكىندىك بەرىلمەدى. بىزگە كوپتەگەن ماتەريالدارمەن تانىسۋعا رۇقسات ەتىلمەدى. مەنىڭ ءبىر تۇسىنگەنىم، شىندىق ەشكىمگە كەرەك ەمەس. شەشىم الدىن-الا شىعارىلىپ قويعان. سوندىقتان نە دەرىمدى بىلمەيمىن، ءبارى ايتىلدى. ادۆوكاتتارىمنىڭ ۇستانىمىن قولدايمىن»، - دەدى ق. بيشىمبايەۆ بۇگىنگى اپەللياتسيالىق سوت وترىسىندا.
ءوز كەزەگىندە ب. بايجانوۆ ءوزىنىڭ زاڭسىز سوتتالعانىن مالىمدەدى.
«قۇرمەتتى القا، بۇگىن سىزدەر بۇل قاتەنى تۇزەتە الاسىزدار جانە ءبىزدىڭ جۇيەنىڭ ادىلەتتى ەكەنىن، بۇزۋدىڭ ورنىنا قورعايتىنىن دالەلدەيتىن مۇمكىندىك بار. مەنىڭ ىسىمدەگى فاكتىلەردى مۇقيات قايتا قاراۋىڭىزدى سۇرايمىن. سىزدەن ادىلەتتىلىك ورناۋى ءۇشىن قولدان كەلگەننىڭ ءبارىن جاساۋىڭىزدى سۇرايمىن. مەنىڭ ءۇمىتىم جانە وتباسىمنىڭ بولاشاعى سىزدەردىڭ قولدارىڭىزدا. مەنىڭ ادىلەتكە دەگەن سەنىمىمدى قالپىنا كەلتىرۋگە كومەكتەسىڭىزدەر، ويتكەنى مەن قىلمىس جاساعان جوقپىن جانە مەنىڭ كىنام دالەلدەنبەگەن»، - دەدى ول.
سونىمەن بىرگە، ب. بايجانوۆ سوتتان ۇكىمنىڭ كۇشىن تولىق جويۋدى جانە ءىستى جاڭا سوت تالقىلاۋىنا جىبەرۋدى سۇرادى.
ەسكە سالساق، 2023-جىلى 9-قاراشادا استاناداعى «Bau» مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم جەتكەنشە كوز جۇمدى. قۋاندىق بيشىمبايەۆ 24 جىلعا سوتتالدى.
بۇگىن بيشىمبايەۆ پەن بايجانوۆقا قاتىستى اپەللياتسيالىق سوت وتىرىسى باستالدى. وتىرىس تىكەلەي ەفيردە ءوتىپ جاتىر.
سونداي-اق، ەكس-شەنەۋنىكتىڭ مەرزىمىنەن بۇرىن بوساپ شىعۋى مۇمكىن بە دەگەن تاقىرىپتا شولۋ جاساعان ەدىك.
