لومباردتا قاراقشىنى ۇستاعان ستۋدەنت وقيعانىڭ قالاي بولعانىن ايتتى
استانا. قازاقپارات - Qaz365.kz ءتىلشىسى شىمكەنتتە قارۋ ۇستاعان قىلمىسكەردى توقتاتقان جاس ءوسپىرىم ۇلىقبەك قۇرمانالي ۇلىمەن سۇحباتتاستى. ونىڭ لومباردقا تاپانشا ۇستاپ كىرگەن قىلمىسكەردى ۇرىپ قۇلاتقان ۆيدەوسى كەشەدەن بەرى الەۋمەتتىك جەلىدە قىزۋ تالقىلانۋدا.
وقيعا قالاي بولدى
ەسكە سالساق، شىمكەنت قالاسى رىسقۇلوۆ كوشەسىندە ورنالاسقان لومباردتاردىڭ بىرىندە بەتىنە مەديتسينالىق ماسكا كيىپ العان بەلگىسىز تۇلعا قولىنا تاپانشاعا ۇقساس زاتپەن لومبارد قىزمەتكەرلەرىن قورقىتىپ، 100 مىڭ تەڭگە قاراجات تالاپ ەتكەن. لومبارد ىشىندە تۇرعان 18 جاسار ەر ازاماتتار قىلمىستىڭ الدىن الۋ ماقساتىندا قۇقىقبۇزۋشىنى ءتارتىپ ساقشىلار كەلگەنشە ۇستاپ العان.
تۇران اۋداندىق پوليتسيا قىزمەتكەرلەرى دەر كەزىندە كەلىپ، قۇقىقبۇزۋشىنى تۇتقىنداعان. اۋداندىق پوليتسيا باسقارماسىنىڭ باستىعى تىلەۋوۆ نۇرجان ءوز كەزەگىندە جاسوسپىرىمدەردىڭ تانىتقان ەرلىگى ءۇشىن ارنايى العىس حاتپەن ماراپاتتادى.
ازىلدەپ تۇر ما دەپ ويلادىم
باتىرلىق تانىتقان ۇلىقبەك قۇرمانالي ۇلى نە ءۇشىن ول جەرگە بارعان؟ اتالمىش وقيعا قالاي بولدى؟ مۇنى وزىنەن سۇراپ كوردىك.
«ول جەكسەنبى كۇنى بولدى. ماعان وقۋدىڭ اقشاسىن تولەۋگە 360 مىڭ تەڭگە كەرەك بولدى. اتا-اناما سالماق سالمايىن دەپ تەلەفونىمدى وتكىزۋگە دوس بالامەن بىرگە لومباردقا بارعان ەدىم. سودان ول جەرگە كىردىم. تەلەفونىمدى تاپسىردىم. قاراپ تەكسەرگەنىن كۇتىپ وتىردىم. ءبىرازدان سوڭ ارتىمنان ماسكا كيىپ العان جىگىت كىرىپ كەلدى. كاسساداعى قىز ودان «قانداي كومەك كەرەك» دەپ سۇراعانىندا «قوسىمشانى تارتۋ كەرەك» دەدى ول. مەن ساعات 20.30 كەزىندە كىردىم. لومبارد ساعات 21:00-دە جابىلادى ەكەن. مەن تەلەفونىمدى وتكىزىپ تاياپ قالعان كەزدە ول تاپانشاسىن الىپ شىعىپ، كاسساداعى قىزعا تاقايدى. سودان اقشا تالاپ ەتەدى. مەن ودان «شىن ىستەپ تۇرسىڭ با، قالجىڭ ەمەس پە» دەپ سۇرايمىن. ويتكەنى ومىرىمدە مۇنداي جاعدايعا ءبىرىنشى رەت كەزدەسىپ تۇرعاننان كەيىن شىعار، ءازىل رەتىندە قابىلدادىم. ول جىگىت «ءيا» دەپ دورەكى تۇردە جاۋاپ بەردى»، - دەيدى ول.
وسىدان كەيىن ۇلىقبەك ونىڭ شىن ايتىپ تۇرعانىن تۇسىنە قويىپ، ۇرىپ قۇلاتقان. تاپانشاسى قولىنان تۇسكەنشە توقتامادىم دەيدى.
«جەرگە قۇلاتقان سوڭ قاسىمداعى دوس بالا قولىنداعى تاپانشاسىن تارتىپ الدى. ەسىن جيناتقىزىپ، سول جەردە ديۆانعا وتىرعىزدىم. سول كەزدە پوليتسيا قىزمەتكەرلەرى تەز جەتىپ كەلدى. تەرگەۋ باستالىپ كەتتى. ءسويتىپ لومباردتان ساعات 23.00-دە شىقتىق. ارى قاراي ءى ءى ب-گە باردىق. ول جەرگە بارعان كەزدە شىنىمەن سولاي بولىپ جاتقانىن قابىلدادىم. مەنەن جاۋاپ الدى. سودان لومبارد دوس بالا ەكەۋمىزگە سىيلىق رەتىندە Iphone 15 تەلەفونىن بەردى»، - دەيدى شىمكەنتتىك جىگىت.
ۇلىقبەكتىڭ وقۋىنا 360 مىڭ تەڭگە كەرەك بولعان. وزىنە سىيلاعان تەلەفون 240 مىڭ تەڭگەگە ساتىلىپتى. سونىمەن ءبىر جىلدىق وقۋىن جاۋىپ العان. ول - ورتالىق ازيا يننوۆاتسيا ۋنيۆەرسيتەتىندە دەنە شىنىقتىرۋ ماماندىعى بويىنشا 1-كۋرس ستۋدەنتى.
«وزىمە كەرەك بولار دەپ بوكسپەن ءتورت جىل اينالىسقانمىن. بولعان وقيعانى كورگەن سوڭ انام قورىققان ەكەن. ءولىپ كەتسەڭ نە بولادى دەپ ايتتى. ءبىراق قۇدايعا شۇكىر، ءبارى جاقسى مەندە. ءبىر جاعىنان وسىلاي قورعاعانىما قۋانىپ وتىر. لومبارد جانە دە پروكۋراتۋرا قۇتتىقتادى. العىس حات بەردى. بارلىق تۋعان-تۋىس قۇتتىقتاپ جاتىر»، - دەيدى ول.
«ەكىنشى رەت وسىنداي جاعداي بولسا نە ىستەيسىڭ؟ ويلاناسىڭ با؟» دەگەن سۇراققا ۇلىقبەك «الدا نە بولاتىنىن بىلمەيمىز عوي. مۇمكىندىك بولسا، قولدان كەلگەنىن ىستەيمىز» - دەيدى.
