شىمكەنتتەگى اسىراندى بالالار وقيعاسى: ءبىر بالانىڭ اجەسى وسكەمەندە تۇرادى

وسكەمەن. KAZINFORM - قازاقستاننىڭ ءار قالاسىنان التى بالانى اسىراپ العان شىمكەنتتىك ەمشىگە قاتىستى تىڭ دەرەكتەر انىقتالىپ جاتىر.

Наталья Устинова
Фото: Талғатжан Мұхаметбекұлы/Kazinform

بالالاردىڭ ءبىرىنىڭ اجەسى وسكەمەندە تۇرادى. Kazinform ءتىلشىسى 65 جاستاعى ناتاليا ۋستينوۆامەن جولىعىپ، جيەن نەمەرەسىنىڭ اسىراۋعا قالاي بەرىلگەنىن سۇراپ كوردى.

« قىزىم ولگا اسپاز بولىپ جۇمىس ىستەيتىن. بىردە بۇقتىرماداعى «چايكا» دەمالىس بازاسىنا جۇمىسقا ورنالاسىپ، دەمالۋشىلارعا تاماق ءپىسىرىپ ءجۇردى. سوندا سلەسار بولىپ ىستەيتىن قايراتپەن تانىستى. اڭگىمەسى جاراسىپ، كوڭىل قوسقان ەكەۋى بىرگە تۇردى. ءبىراق زاڭدى نەكەگە وتىرعان جوق»، - دەيدى ناتاليا ۋستينوۆا.

2019 -جىلدىڭ جازىندا ولگا جارىق دۇنيەگە ءسابي الىپ كەلدى. ول كەزدە جاسى 39 دا بولعان. بۇعان دەيىن تۇرمىسقا شىقپاعان، بالا ءسۇيىپ كورمەگەن. ۇلىنىڭ ەسىمىن رۋسلان دەپ قويادى.

«بالالى بولعاندارىنا اكەسى قۋانعان جوق. كەرىسىنشە ولاردى تاستاپ كەتتى. قىزىم دەپرەسسياعا ءتۇسىپ، سارى ۋايىمعا سالىندى. ىشىمدىك ءىشىپ ءجۇردى. ءوزىم دە، كۇيەۋىم دە وعان قولداۋ ءبىلدىرىپ، دەمەۋ بولۋعا تىرىستىق. بانكتەن 3 ميلليون تەڭگە نەسيە الىپ، ەسكى ءۇيىمىزدى جوندەتتىك تە، ەكەۋىن كىرگىزىپ الدىق. بالا ءۇشىن ءبىر بولمەنى ارنايى جابدىقتادىق. ولگا ساباسىنا ءتۇسىپ، قالىپقا كەلە باستادى. ءبىراق 2021 -جىلى ورشىگەن كوروناۆيرۋس اتتى كەسەل قىزىمدى اينالىپ وتپەدى. قاتتى اۋىرعان ول 14 كۇن بويى جانساقتاۋ بولىمىندە جاتىپ، ەش وڭالماي قايتىس بولدى. نەمەرەمىزدى اتاسىمەن ءوز قامقورلىعىمىزعا الدىق»، - دەپ ءسوزىن ساباقتادى ول.

«جۇت جەتى اعايىندى» دەگەندەي، بۇل وتباسىنا تۇسكەن تاعدىر تاۋقىمەتى وسىمەن ءتامامدالماعان. جارتى جىلدان كەيىن ينسۋلت العان اتاسى قۇرىعى ۇزىن اجالدىڭ كەمەسىنە مىنگەن.

балалар үйі
Фото: Талғатжан Мұхаметбекұлы/Kazinform

 

«تىرەۋىمنەن ايىرىلىپ، جالعىز قالدىم. نەسيە تولەۋ ءۇشىن قايتا جۇمىسقا شىعىپ، رۋسلاندى وسكەمەندەگى سابيلەر ۇيىنە وتكىزۋگە ءماجبۇر بولدىم. قىزىم سياقتى ءوزىم دە اسپازبىن. باسىندا ۋاقىتشا دەپ ويلادىم. ءبىراق قارىزدان قۇتىلا الماي، كۇندەر، ايلار سىرعىپ وتە بەردى. نەمەرەمە ۇنەمى بارىپ، قال- جاعدايىن ءبىلىپ تۇردىم»، - دەيدى ناتاليا ۋستينوۆا.

2023 -جىلدىڭ كۇزىندە رۋسلاندى شىمكەنتتىك وتباسى اسىراپ الۋعا نيەتتى ەكەندىگىن ەستىگەن. كىمدەر ەكەنىن زەرتتەپ، الەۋمەتتىك جەلىدەن ەر ادامنىڭ ەمشىلىكپەن اينالىساتىنىن كورگەن.

«رۋسلان ونى بىردەن «اكەلەپ» كەتتى. كورە سالا «اكە، اكە» دەپ جۇگىرە جونەلدى بالاپان.. . كىرشىكسىز تازا جۇرەگى ارامدىقتى قايدان سەزسىن.. . ءوزىن بايىپتى ۇستاپ، بالانى باسىنان سيپاپ، ەركەلەتىپ تۇرعان الگى ادامدى كورگەندە مەن دە سەنىپ قالدىم. ءسويتىپ، سول جىلدىڭ 16-قازانىندا ول رۋسلان مەن الەكساندر ەسىمدى تاعى ءبىر بالانى وسكەمەننەن شىمكەنتكە الىپ كەتتى. 6 بالانى اسىراعانىن كەيىن مىنا سۇمدىقتى ەستىگەندە بارىپ بىلدىك قوي»، - دەيدى.

2024 -جىلدىڭ اقپانىندا سول التى بالانىڭ ۇلكەنى وزدەرىنىڭ مۇشكىل حالدەرىن ايتىپ كومەك سۇراعان سوڭ تەكسەرۋ جۇرگىزىلىپ، ەمشىگە قاتىستى قىلمىستىق ءىس قوزعالعان. دەمەك، رۋسلان وسى وتباسىندا 4 اي بولعان. قازىر ول شىمكەنتتەگى كامەلەتكە تولماعانداردى بەيىمدەۋ ورتالىعىندا.

«جاۋىزدىڭ نەمەرەمە جانە باسقا بالالارعا قانداي قاتىگەزدىك كورسەتكەنىن ەستىگەندە جۇرەگىم قارس ايىرىلدى. بۇل -ناعىز ايۋاندىق! جانۋار ەكەش جانۋار دا بالاسىنا ولاي ىستەمەيدى. ال سول ادامنىڭ ءوزىن اكەدەي كورىپ تۇرعان كىشكەنتاي پەرىشتەلەرگە قيانات جاساۋىن ەش اقتاۋعا بولمايدى. ونى قاتاڭ جازالاۋ كەرەك!»- دەيدى ناتاليا ۋستينوۆا.

اجەسى نەمەرەسىنىڭ وسكەمەنگە قايتىپ كەلۋىن تىلەيدى. قارىزدان ءالى قۇتىلماعان. جاسى 65 كە كەلسە دە جۇمىس ىستەپ، نەسيە تولەپ وتىرعانىن ايتادى.

балалар үйі
Фото: Талғатжан Мұхаметбекұлы/Kazinform

«رۋسلاندى وسىنداعى بالالار ۇيىنە الدىرسا اپتا سايىن بارىپ تۇراتىن ەدىم. وعان دۇرىس كۇتىم جاسالىپ جاتقانىن قاداعالاپ، كەرەك- جاراعىن جەتكىزىپ وتىرامىن. جاسىم دا ءبىرازعا كەلدى. نەسيەدەن قۇتىلا الماي تۇرعانىم بولماسا نەمەرەمدى ءوزىم- اق باعۋشى ەدىم. مىنە، ءبىزدىڭ وقيعا وسىنداي»، - دەپ اۋىر كۇرسىنگەن زەينەتكەر ءسوزىن اياقتادى.

Kazinform ءتىلشىسى ناتاليا ۋستينوۆا ايتقان وسكەمەندەگى سابيلەر ۇيىنە دە بارىپ كوردى. ءبىراق ونداعى كۇزەتشى مەكەمە ديرەكتورى فاتيحوۆا سالتانات ەربولات قىزىنىڭ ورنىندا جوق ەكەندىگىن ايتىپ، قاقپا سىرتىنان ارى قاراي وتكىزبەدى.

ەسكە سالساق، بۇعان دەيىن شىمكەنتتە جەرگىلىكتى تانىمال ەمشىنىڭ 6 بالانى اسىراپ الىپ، ولارعا دۇرىس قاراماعانى، يت پەن مىسىق ەتىن بەرگەنى، ازاپتاپ كەلگەنى جازىلعان ەدى. كەيىنىرەك ەمشى تۋرالى تىڭ دەرەك شىقتى.

سونداي- اق وسى جاعدايعا قاتىستى ءبىلىم سالاسىنىڭ ءبىرقاتار قىزمەتكەرى جازالانعانى حابارلاندى.

 

سوڭعى جاڭالىقتار