شىمكەنتتەگى 17 بازار نەگە جابىلدى
شىمكەنت. KAZINFORM - وتكەن جىلى شىمكەنتتەگى كەيبىر بازارلار جاڭعىرتۋدان ءوتتى، دەپ حابارلايدى Kazinform اگەنتتىگىنىڭ ءتىلشىسى.

مەملەكەتتىك كىرىستەر دەپارتامەنتىنىڭ مالىمەتىنە سۇيەنسەك، شىمكەنتتەگى بازارلاردا جالعا الۋشى رەتىندە جۇمىس ىستەيتىن 8807 جەكە كاسىپكەر تىركەلگەن.
ال جالپى شىمكەنتتە 19 بازار بار: «اۆتو نۇر»، «الاش»، «سامال»، «اينا»، «ورتالىق جوعارعى بازار»، «دارحان»، «نازىم اپا»، «اكبار»، «تۇلپار»، «ساندىبايەۆ» مال بازارى، «جابىق بازارى»، «جاڭا قالا»، «جىبەك جولى»، «جۇمانوۆ اۆتوبازارى»، «بارىس»، «بەرەكە»، «كوكتەم»، «نۇر-سايرام»، «پيونەر». ونىڭ جەتەۋى امبەباپ بولسا، 12 ءسى مامانداندىرىلعان.
- بۇعان دەيىن شىمكەنتتە 36 بازار بولسا، ونىڭ 19 ى امبەباپ، 17 ءسى مامانداندىرىلعان ەدى. جاڭعىرتۋ بارىسىندا «ەۋرازيا»، «ىنتىق اتا» مال بازارى، «التىن وردا»، «اسەل»، «يۋج ترانس»، «بەنەفيت»، «ايزارا»، «ارعىماق» سياقتى 8 بازار جابىلدى. «بەكجان»، «كومەش بۇلاق»، «الاتاۋ»، «ارگون»، «جان ۇيا»، «سەيحۋن»، «نۇرلى جول»، «داۋرەحانوۆا»، «زياش انا» سياقتى 10 بازار جانە «ىنتىق اتا» كوك بازارى ماقساتىن وزگەرتىپ، ساۋدا قاتارلارىنا اينالدى. سونداي-اق، «پيونەر» جۇمىس ىستەپ تۇرعان بازارلار قاتارىنا قوسىلدى، - دەپ مالىمدەدى ۇلتتىق ستاتيستيكا بيۋروسىنىڭ ماماندارى.
2018-جىلى شىمكەنت رەسپۋبليكالىق ماڭىزى بار قالا مارتەبەسىن الدى. بۇل بازارلاردىڭ جاي-كۇيى مەن ونداعى ساۋدانى ۇيىمداستىرۋعا قاتىستى تالاپتاردى كۇشەيتتى.
قازاقستان رەسپۋبليكاسى ساۋدا جانە ينتەگراتسيا مينيسترلىگىمەن بەكىتىلگەن جول كارتاسى اياسىندا «الاش»، «سامال»، «جاڭا قالا»، «ورتالىق جوعارعى بازار»، «اۆتو نۇر»، «جابىق بازارى» جانە «نازىم اپا» سياقتى 7 بازاردى جاڭعىرتۋ جۇمىستارى جوسپارعا ەندى.
2024-جىلدىڭ جەلتوقسانىندا «الاش»، «سامال» جانە «جاڭا قالا» بازارلارىن قايتا قۇرۋ جانە جاڭعىرتۋ جۇمىستارى اياقتالدى. ال، «اۆتو نۇر»، «ورتالىق ۇستىڭگى بازار»، «جابىق بازارى» جانە «نازىم اپا» بازارلارىن بارلىق قاجەتتى تالاپتارعا ساي ەتىپ زاماناۋي ساۋدا الاڭدارىنا اينالدىرۋ بيىلعى جىلى ىسكە اسپاق.
- بازارلاردى جاڭعىرتۋ جۇمىستارى كەزەڭ-كەزەڭىمەن جۇرگىزىلۋدە. جوندەۋ جۇمىستارىنىڭ ناتيجەسىندە جاڭا ساۋدا ورىندارى اشىلىپ، قوسىمشا جۇمىس ورىندارى پايدا بولۋدا. ستيحيالىق ساۋدامەن اينالىساتىندار سانى ايتارلىقتاي قىسقاردى، - دەيدى شىمكەنت قالالىق كاسىپكەرلىك باسقارماسى باسشىسىنىڭ ورىنباسارى ۇسەن يسايەۆ.
ساۋدا قاتارلارىن جاڭعىرتۋ - ۋاقىت پەن قوماقتى ينۆەستيتسيانى قاجەت ەتەدى. سونداي-اق، قايتا قۇرۋ جۇمىستارى ءۇشىن بازارلاردى جابۋ جۇمىسسىزدىقتىڭ كۇرت وسۋىنە الىپ كەلەدى جانە جالعا الۋشىلاردى دا قاراجاتسىز قالدىرۋى مۇمكىن. ال جۇمىس اياقتالعاننان كەيىن نىسان يەلەرى ينۆەستيتسياسىن قايتارۋ ءۇشىن جالداۋ اقىسىن كوتەرۋگە ءماجبۇر بولادى. بۇل تاۋار باعاسىنىڭ وسۋىنە اكەلەدى. سوندىقتان بازارلاردى كەزەڭ-كەزەڭىمەن جاڭعىرتۋ ءتيىمدى بولىپ وتىر.
— «اۆتو نۇر»، «ورتالىق ۇستىڭگى بازار» جانە باسقا دا بازارلارداعى باستى ماسەلە - قارجى تاپشىلىعى جانە جاڭعىرتۋ كەزەڭىندە جەكە كاسىپكەرلەردى ساۋدا ورىندارىمەن قامتاماسىز ەتۋ قاجەتتىلىگى. شىمكەنت رەسپۋبليكالىق ماڭىزى بار قالا مارتەبەسىنە يە بولعاندىقتان، بازارلارعا قايتا قۇرۋ جۇمىستارىن جۇرگىزۋ ءۇشىن سۋبسيديالانعان پايىزدىق مولشەرلەمە قاراستىلىلماعان. بارلىق جۇمىستار جەكە قاراجات ەسەبىنەن جۇرگىزىلەدى، - دەپ ءتۇسىندىردى ۇسەن يسايەۆ.
قۇرىلىس ماتەريالدارىنىڭ تۇرعىن ۇيلەردىڭ ماڭىندا جانە جول بويىندا ساتىلۋى قالادا كوپتەن بەرى شەشىلمەي كەلە جاتقان ماسەلەلەردىڭ ءبىرى. كليەنتتەردى جوعالتىپ الۋدان قورقاتىن كەيبىر ساتۋشىلاردىڭ قارسىلىعىنا قاراماستان بۇل جاعدايدى رەتتەۋ ءىسى قولعا الىنا باستادى. جەرگىلىكتى بيلىك بۇل جاي عانا تۇرعىندارعا جاسالعان ىڭعايلىلىق قانا ەمەس، قالاداعى قاۋىپسىزدىك پەن تارتىپكە باعىتتالعان قادام ەكەنىن مالىمدەدى.
- قۇرىلىس بازارلارىن قالا سىرتىنا شىعارۋ ءۇشىن ءتورت قۇرىلىس ساۋدا ورتالىعى قۇرىلدى: «سولتۇستىك-1» (6 گ ا، قاراتاۋ اۋدانى)، «سولتۇستىك-2» (7,6 گ ا، اباي اۋدانى)، «ىنتىماق» (77 گ ا، اباي اۋدانى) جانە «قۇرساي» (29 گ ا، تۇران اۋدانى). 2024-جىلدىڭ شىلدەسىنەن باستاپ زاڭسىز ساۋدا نۇكتەلەرىندە قۇرىلىس ماتەريالدارىن ساتۋشىلاردى وسى ارنايى بولىنگەن اۋماقتارعا كوشىرۋ جۇمىستارى باستالدى، - دەپ مالىمدەدى كاسىپكەرلىك باسقارماسىنان.
شىمكەنت كوپ جىلدان بەرى جاياۋ جۇرگىنشىلەر جولىنداعى ستيحيالىق ساۋدامەن كۇرەسىپ كەلەدى. حالىق كوپ جۇرەتىن ايماق ساتۋشىلاردىڭ سۇيىكتى مەكەنى ەكەنى انىق. رەتسىز ساۋدا جاساۋشىلارعا بۇگىنگە دەيىن بىرنەشە رەت ەسكەرتۋ بەرىلگەن. ايىپپۇل دا سالىنىپ جاتىر. ءبىراق پوليتسيا كەتىسىمەن ساۋدا قايتا قىزادى.
- 10 كۇن ىشىندە ءال-فارابي اۋدانى اكىمى اپپاراتىنىڭ جانە اۋداندىق ىشكى ىستەر ءبولىمىنىڭ قىزمەتكەرلەرىمەن بىرلەسىپ ايتەكە بي كوشەسىنىڭ بويىندا رۇقسات ەتىلمەگەن ورىنداردا ساۋدا جاساعانى ءۇشىن جانە اباتتاندىرۋ ەرەجەلەرىن بۇزعان 4 كاسىپكەرلىك سۋبەكتىسىنە ايىپپۇل سالىندى. ايىپپۇلدىڭ جالپى سوماسى - 160500 تەڭگە، قاراجات تولىعىمەن ءوندىرىلدى. رەيدتىك ءىس-شارالار جوسپارلى تۇردە جالعاساتىن بولادى، - دەلىنگەن شىمكەنت قالالىق پوليتسيا دەپارتامەنتىنىڭ حابارلاماسىندا.
وسىلايشا، بۇگىندە مەگاپوليستە رۇقسات ەتىلمەگەن ساۋدا ماسەلەسى وزەكتى بولىپ تۇر. ساتۋشىلار ساۋدا ورنىن جالعا الۋدان جانە سالىق تولەۋدەن قاشاتىندىقتان رەتسىز ساۋدا جۋىق ارادا رەتتەلمەسى انىق. الايدا، قالا اكىمدىگى ساۋدا يەلەرى بازارلارعا كوشەتىن بولسا، ولاردان قوسىمشا تولەم الىنبايتىنىن مالىمدەدى. بۇل باعىتتا اكىمدىك پەن بازار يەلەرى اراسىندا كەلىسىم دە جاسالعان.
- رۇقسات ەتىلمەگەن ورىندارداعى ساۋدانى رەتتەۋ شاراسى رەتىندە ساۋدا ورىندارى 1 جىلدان 5 جىلعا دەيىنگى مەرزىمگە كونكۋرستىق نەگىزدە تەگىن بەرىلەدى، - دەپ اتاپ ءوتتى شىمكەنت قالاسى اكىمدىگىنىڭ باسپا ءسوز قىزمەتى.
الماتى وبلىسى قاسكەلەڭ قالاسىنداعى بازاردان ءورت شىققانىن جازعان بولاتىنبىز.