شىمكەنتتەگى 135 جىلدىق تاريحى بار مەشىت بۇزىلمايدى - مۇحامەدجان ەستەمىروۆ

шымкент мешіт
Фото: dzen.ru

شىمكەنت. KAZINFORM - عاسىردان استام ۋاقىت بويى ساقتالعان كونە عيماراتتىڭ مەرەيتويى تاعىلىمدىق جانە تانىمدىق ءىس-شارالارمەن اتالىپ وتەدى.

الەۋمەتتىك جەلىدە شىمكەنت قالاسىنداعى كونە مەشىتتىڭ بۇزىلىپ جاتقانى تۋرالى ۆيدەو تارادى.

وندا عيبادات ءۇيىنىڭ اۋماعىندا ارنايى تەحنيكا جۇمىس ىستەپ جۇرگەنىن كورۋگە بولادى.

ۆيدەو اۆتورى دا ەسكى قالا اۋماعىنداعى مەشىتتىڭ بۇزىلىپ جاتقانىن ايتقان.

اتالعان ماسەلەنىڭ ءمان- جايىن تۇسىندىرگەن شىمكەنت قالاسى باس يمامىنىڭ ورىنباسارى مۇحامەدجان ەستەمىروۆ 135 جىلدىق تاريحي بار نىساننىڭ بۇزىلمايتىنىن جەتكىزدى.

«شىمكەنت قالاسىنىڭ ەسكى قالا اۋماعىندا ورنالاسقان مەشىتتىڭ تاريحي تەرەڭ. عاسىردان استام ۋاقىت بويى ساقتالىپ كەلە جاتقان عيمارات بۇزىلمايدى. قايتا جان-جاعىن رەتتەپ، زامان تالابىنا سايكەستەندىرۋ جۇمىستارى ءجۇرىپ جاتىر. 1990-جىلدارى سالىنعان قاسىنداعى قوسىمشا عيماراتتار بۇزىلىپ جاتىر. سەبەبى، تەحنيكالىق سىنى مەن سىرى كەتكەندىكتەن، اپاتتى دەپ تانىلعان بولاتىن. ونىڭ ورنىنا جاڭا وقۋ كورپۋسى سالىنادى. اۆتوتۇراق ورنالاسادى. جاڭا نىسانداردىڭ قۇرىلىسى دا كوپ ۇزاماي باستالادى. مۇنىڭ ءبارى - قالاعا كەلگەن تۋريستەر مەن مەشىت قاۋىمىنا جاعداي جاساۋ ماقساتىندا قولعا الىنىپ جاتقان ءىس» - دەدى ول.

سونداي-اق، مۇحامەدجان ەستەمىروۆ بيىل ەسكى قالاشىقتاعى كونە مەشىتتىڭ 135 جىلدىق مەرەيتويى تانىمدىق جانە تاعىلىمدىق شارالارمەن اتالىپ وتەتىنىن جەتكىزدى.

ايتا كەتەيىك، شىمكەنت قالاسىندا ورنالاسقان كونە مەشىتتى 1889-جىلى شىڭعىسباي قاجى ءداۋىت ۇلى سالدىرعان.

ⅩⅩ عاسىردىڭ ءبىرىنشى جارتىسىنداعى تىركەۋ، ۇجىمداستىرۋ كەزەڭدەرىنەن ۇلى وتان سوعىسى اياقتالعانشا مەشىت اسكەري كازارما، ميليتسيا ءۇيى رەتىندە پايدالانىلدى.

ال 1947-جىلى ەل يگىلىگىنە قايتارىلدى.

مەشىتتىڭ سىيىمدىلىعى - 2000 ادام، ۇلكەن مۇناراسىنىڭ بيىكتىگى - 12 مەتر، ال كۇمبەزىنىڭ بيىكتىگى - 6 مەتر.

مەشىتكە وتكەن جىلى كۇردەلى جوندەۋ جۇمىستارى جۇرگىزىلگەن بولاتىن.

سوڭعى جاڭالىقتار